1B15.5.9

page 90

    
2Se fruma wæs þæt mon forstæl ænne wimman æt Ieceslea
3ælfsige Byrhsiges suna.
4þurwif hatte se wimman.
5þa befeng ælfsige þone mann æt Wulfstane Wulfgares fæder.
6þa tymde Wulfstan hine to æþelstane æt Sunnanbyrg.
7þa cende he tem & let þone forberstan & forbeh þone
8andagan.
9æfter þam bæd ælfsige ægiftes his mannes & he hine agef &
10forgeald him mid twam pundum.
11þa bæd Byrhferð ealdormann æþelstan hys wer for þam
12tembyrste.
13þa cwæð æðelstan þæt he næfde him to syllanne.
14þa cleopode Eadweard æðelstanes broðor & cwæð, ic hæbbe
15Sunnanburges boc ðe uncre yldran me læfdon,
16Læt me þæt land to handa ic agife þinne wer ðam cynge.
17þa cwæð æðelstan þæt him leofre wære þæt hit to fyre
18oððe flode gewurde þonne he hit æfre gebide.
19ða cwæð eadweard, hit is wyrse þæt uncer naðor hit
20næbbe.
21þa wæs þæt swa.
22& forbead Byrhferð þæt land æðelstane & he of ferde &
23gebeh under Wulfgare æt Norðhealum.
24Binnan ðam wendun gewyrda & gewat Eadræd cyng & feng Eadwig
25to rice.
26& wende æðelstan hine eft into Sunnanbyrg ungebetra þinga.
27þa geahsode þæt Eadwig cyng & gesealde þæt land Byrnrice
28& he feng to & wearp æðelstan ut.
29Gemang þam getidde þæt Myrce gecuran Eadgar to cynge & him
30anweald gesealdan ealra cynerihta.
31þa gesohte æðelstan Eadgar cyng & bæd domes.
32þa ætdemdon him Myrcna witan land buton he his wer agulde
33þam cynge swa he oðrum ær sceolde.
34þa næfde he hwanon ne he hit Eadwearde his breðer geðafian
35nolde.
36þa gesealde se cyng & gebecte þæt land æðelstane
37ealdormenn to hæbbenne & to syllanne for life &
38for legere þam him leofost wære.
39æfter þam getidde þæt Ecgferð gebohte boc & land æt
40æðelstane ealdormenn on cynges gewitnesse & his
41witena swa

page 92

42his gemedo wæron hæfde & breac oð his ende.
43þa betæhte Ecgferð on halre tungan land & boc on cynges
44gewitnesse Dunstane arcebisceope to
45mundgenne his lafe & his bearne.
46þa he geendod wæs þa rad se bisceop to þam cynge myngude
47þære munde & his gewitnesse.
48þa cwæð se cyng him to andsware, mine witan habbað
49ætrecð Ecgferðe ealle his are þurh þæt swyrd þe
50him on hype hangode þa he adranc.
51Nam þa se cyng ða are þe he ahte XX hyda æt Sendan
52X æt Sunnanbyrg, & forgef ælfhege
53ealdormenn.
54þa bead se bisceop his wer þam cynge.
55þa cwæð se cyng, þæt mihte beon geboden him wið clænum
56legere ac ic hæbbe ealle þa spæce to ælfhege
57læten.
58þæs on syxtan gere gebohte se arcebisceop æt ælfhege
59ealdormenn þæt land æt Sendan mid XC pundum
60& æt Sunnanbyrg mid CC mancussan goldes unbecwedene &
61unforbodene wið ælcne mann to þære
62dægtide.
63& he him swa þa land geagnian derr swa him se sealde ðe to
64syllenne ahte & hi þam se cyng sealde
65swa hi him his witan gerehton.