1A5

page 3

2

THE METRICAL PSALMS OF THE PARIS PSALTER

    
3fore ænigre egesan næfde, ne him fultum þær fæstne
4gelyfde; ac he on his welan spede wræste getruwode,
5and on idel gylp ealra geornost.
6Ic þonne swa elebeam up weaxende on godes huse ece gewene,
7and on milde mod mines drihtnes, and me
8þæt to worulde wat to helpe.
9Ic þe andette awa to feore on þære worulde ðe þu
10geworhtest her; forþan þu eart se gooda, gleaw on
11gesyhðe, þe þinne held curan, þara haligra.
12On his heortan cwæð unhydig sum, ungleawlice, þætte god
13nære; heo onsceoniendlice syndon gewordene
14and heora willan wraðe besmitene.
15Næs þa goddoend se þe god wiste, ne an furðum ealra wære.
16þa of heofenum beseah halig drihten ofer manna bearn,
17hwæðer his mihta ða andgyt ænig ealra hæfde,
18oððe god wolde georne secan.
19Ealle heo on ane idelnesse symle besegan; þa wæs soð
20nan mann þe god wolde georne wyrcan;
21ne an furþum ealra wære.

page 4

22Ac ge þæs ealle ne magon andgyt habban þe unrihtes elne
23wyrceað and min folc fretað swa fælne hlaf,
24ne hio god wyllað georne ciegan; þær hio forhtigað,
25frecnes egesan æniges ne þurfon.
26Forþam manna ban mihtig drihten liste tosceadeð, þa
27him liciað; beoð þa gehyrwede þe forhycggeað
28god.
29Hwylc Israela ece hælu syleð of Sione nymðe sylfa god,
30þonne he his folc fægere alyseð of hæftnyde,
31halig drihten?
32þonne Iacob byð on glædum sælum and Israelas ealle bliðe.
33On þinum þam haligan naman, gedo me halne, god; alys me
34fram laðum þurh þin leofe mægen.
35God, min gebed gearuwe gehyre, and earum onfoh min agen word.
36Forþam me fremde oft facne gestodon, sohtan mine sawle swiðe
37strange, and na heom god setton gleawne on gesyhðe.
38Efne me þonne god gleawe fultumeð, is andfengea ece drihten
39sawle minre; he me swican ne wile.
40Afyr me fæcne yfel feonda minra, and hi soðfæst toweorp
41syððan wide.
42Ic ðe lustum lace cweme, and naman þinne niode swylce
43geara andette, forðon ic hine goodne wat.
44Forþon þu me alysdest, lifes ealdor, of earfoðum eallum
45symble, ealle mine fynd eagum ofersawe.

page 5

46Gehyr min gebed, halig drihten, ne forseoh æfre sariges bene;
47beheald me holdlice and gehyr me eac.
48Grimme ic eom begangen; forðon ic gnornige and me forhtige
49feondes stefne and fyrenfulra fæcne niðas.
50Forðam me on sah unrihtes feala; wurdon me þa on yrre yfele
51and hefige.
52Ys me on hreðre heah heorte gedrefed and me fealleð on
53fyrhtu deaðes.
54Egsa me and fyrhtu ealne forcwomon, and me beþeahton þeostru
55niðgrim.
56Ic þa on mode cwæð, hwa me sealde to fleogenne fiðeru swa
57culfran, and ic þonne ricene reste syððan.
58Efne ic feor gewite, fleame dæle, and on westene wunode
59lange, bide þæs beornes þe me bete eft modes mindom
60and mægenes hreoh.
61Hat nu todælan, drihten usser, heora geðeode geond þas
62woruld wide; forðon ic þær on unriht oft locade,
63and wiðercwyda wearn gehyrde; drugon þæt on burgum
64dæges and nihtes.
65þunie him gewinnes wearn ofer wealles hrof and heom on
66midle wese man and inwit and unsoðfæstnys
67ealle wealde.
68Næfre on his weorþige wea aspringe, mearce mansceat , man
69inwides; forþon gif me min feond fæcne wyrgeð,
70ic þæt abere bliðe mode.
71þeah þe þa ealle ðe me a feodon, wordum wyrigen and wearn
72sprecan,

page 6

73ic me wið heora hete hyde sneome.
74þu eart se man þe me wære on anmede, and æghwæs cuð
75latteow lustum; and wyt gelome eac æton swetne
76mete samed ætgædere, and on godes huse gangan swylce mid
77geþeahtunge þine and mine.
78Hi ofer cume unþinged deað, astigon heo on helle heonan
79lifigende.
80Forðam on heora gasthusum is gramlic inwit, and on hiora
81midle man inwitstæf.
82Ic soðlice to sylfum drihtne cleopode on corðre, and me
83cuðlice gehyrde hælend drihten.
84Ic on æfenne, eac on mergenne and on midne dæg, mægene
85sæcge and bodie, þæt þu bliðe me mine stefne
86stiðe gehyre.
87A ðu symle sawle mine lustum alyse, laðum wiðferige,
88forðon me manige ymb mægene syrewað.
89þæt gehyreð god and hi gehyneð eac, þe ær worulde wæs
90and nu wunað ece.
91Nis him onwendednes on woruldlife, ne him godes fyrhtu georne
92ondrædað.
93Heo besmitað swylce his sylfes þa gewitnesse, þær hi woh
94fremedon; forðon hi synt on yrre ut adælde, ne hi sylfe
95wel geseon æfre, forðon hit wæs his heortan
96gehygde neah.
97Hi word hira wel gesmyredon ele anlicast; eft gewurdon on
98gescotfeohta scearpe garas.
99Sete on drihten þin soð gehygd; he þe butan fracoðum
100fedeð syððan.

page 7

101Ne syleð he soðfæstum syððan to feore þæt him yþende
102mod innan hreðre; ðu arlease ealle gelædest on
103soðe forwyrd seaðes deopes.
104Se blodhreowa wer bealuinwites fæcne gefylled ne
105fæger lif on middum feore gemeteð ahwær; ic me
106on minne drihten deorne getreowige.
107Miltsa me drihten, forðon me man tredeð, and me ealne dæg
108mid unrihte fynd onfeohtað þurh facensearu.
109And me fæcne tredað feondas mine, doð þæt ealne dæg fram
110ærmergene.
111Forðon monige synd ðe to me feohtað; wene ic me wraðe to
112ðe, wuldres drihten.
113Ic wealdend god wordum herige, and on god swylce georne
114gelyfe, þæt minre spræce sped folgie æghwæs
115ealne dæg; eac ic swylce on god drihten gearewe gewene; nis
116me ege mannes for ahwæðer.
117Hwæt, me ealne dæg mine agen word sylfne socon, swyþe
118oncuðon, and wiðer me wæran georne on yfel heora
119geðeaht ealle onwende.
120On eardiað, þa ðe swa þenceað þæt heo gehyden hælun
121mine, swa min sawl bad þæt ðu swylce heo for
122nahwæðer nowiht hæle; on yrre þu folc eall geðreatast.
123Ic nu leofum gode lif min secge, sette on ðinre gesyhðe
124sarige tearas,

page 8

125swa ic ðe on gehate hæfde geneahhige.
126þonne on hinderling hweorfað mine feondas fæcne, ðonne ic
127me freoðu to ðe wordum wilnige; ic wat and can,
128þæt þu min god gleawe wære.
129Ic on god min word georne herige, and on god swylce georne
130gelyfe, and ic ealne dæg ecne drihten wordum weorðige;
131ne me wiht an siteð egesan awiht æniges mannes.
132On me synd, mihtig god, þæt ic þe min gehat on herenesse
133hyldo gylde; forþon ðu mine sawle of swyltdeaðes
134laþum wiðlæddest, dydest lof stunde, aweredest mine
135eagan wraðum tearum and mine fet fæle beweredest,
136þæt ic gearewe gode licode on lifigendra leohte
137eallum.
138Miltsa min, god, and me milde weorð, forþon min sawel on þe
139swyðe getryweð, and ic on fægerum scuan
140fiðera ðinra gewicie, oðþæt gewite forð and unriht me
141eall beglide.
142Heonan ic cleopige to heahgode and to wealdendgode, ðe me wel
143dyde.
144He þa of heofenum hider onsende þe me alysde, laþum
145wiðferede, sealde on edwit þe me ær trædan.
146Sende mihtig god his milde gehigd and his soðfæst mod samod
147ætgædere, and mine sawle sona alysde of
148leon hwelpum reðe gemanan; wæs ic slæpende sare gedrefed.
149Synd me manna bearn mihtigum toðum wæpenstrælas, þa me
150wundedon;

page 9

151wæron hyra tungan getale teonan gehwylcre
152and to yfele gehwam ungemet scearpe.
153Ahefe þe ofer heofenas, halig drihten; is wuldur ðin wide
154and side ofer ðas eorþan ealle mære.
155Fotum heo minum fæcne grine grame gearwodon, and geornlice
156mine sawle swyðe onbigdon.
157Hi deopne seað dulfon widne, þær ic eagum on locade, and hi
158on ðone ylcan eft gefeollan.
159Gearo is min heorte þæt ic gode cweme; gearo is min heorte
160þæt ic gode swylce sealmas singe, soðword sprece.
161Aris, wuldur min, wynpsalterium, and ic on ærmergene eac
162arise and min hearpe herige drihten.
163Ic þe on folcum frine drihten ecne andete, eac geond þeode
164sealmas singe swiðe geneahhige.
165Forðon þin mildheortnes is mycel wið heofenas, is ðin
166soðfæstnes swylce wið wolcnum.
167Ahafen þu eart ofer heofenas, halig drihten; is ofer ealle
168eorðan swylce þines wuldres wlite wide
169and side.
170Gif ge soð sprecan symble wyllen, demað manna bearn domum
171rihtum.
172Eft ge on heortan hogedon inwit, worhton wraðe; forþan ðæs
173wite eft on eowre handa hefige geeode.
174Ge firenfulle fremde wurdon, syððan hi on worlde wæron
175acende and heo on life lygeword spæcon.
176Yrre heom becume anlic nædran,

page 10

177ða aspide ylde nemnað; seo hi deafe deð,
178dytteð hyre earan, þæt heo nele gehyran heahgaldor
179sum þæt snotre men singað wið attrum.
180God heora toðas grame gescæneð, þa hi on muðe mycle
181habbað; tolyseð leona mægen lungre drihten.
182Ac hi forweorðan wætere gelicost, þonne hit yrnende eorðe
183forswelgeð; swa his bogan bendeð, oðþæt bitere eft
184adl on seteð, swa his geearnuncg byð.
185Swa weax melteð, gif hit byð wearmum neah fyre gefæstnad,
186swa heo feallað on þæt; hi sunnan ne geseoð syððan æfre.
187Ærðon eowre treowu telgum blowe, wæstmum weaxe, ær him wol
188becimeð, þæt heo beoð on yrre ealle forswelgene.
189Soðfæst blissað, þonne he sið ongan, hu þa arleasan
190ealle forweorðað, and his handa ðwehð on hæþenra
191and þæra fyrenfulra fæcnum blode.
192And þonne man cweþeð on his modsefan: þis is wæstm wises
193and goodes, þe his soðfæst weorc symble læste,
194hi on eorðan god ealle gedemeð.
195Ahrede me, halig god, hefiges niðes feonda minra, ðe me
196feohtað to; alys me fram laðum þe me lungre
197on risan willað, nymðe þu me ræd geofe.
198Genere me fram niþe nahtfremmendra þe her unrihtes ealle
199wyrceað, and me wið blodhreowes weres bealuwe gehæle.
200þi nu mine sawle swiþe bysige feondas mine fæcne
201ofþryhtun,

page 11

202and me strange eac stundum ongunnon; ne
203me unrihtes on awiht wistan, ne ic firene eac fremde drihtne.
204Gif ic on unriht bearn, ic þæs eft geswac; on minne
205geanryne, aris ðu, drihten, nu, and ðu sylfa gesyhst,
206þæt ic swa dyde; þu eart mægena god, mihtig
207drihten, and Israela god æghwær æt þearfe.
208Beheald holdlice, hu þu hraðe wylle geneosian niða bearna
209ealra ðeoda æghwær landes; ne þu hweðere
210on mode milde weorðest eallum ðe unriht elne wyrceað.
211Hi æt æfene eft in gecyrrað, þonne hy heardne hungor
212þoliað, swa hundas ymbgað hwommas ceastre.
213Efne hi habbað on muðe milde spræce, is him on welerum
214wrað sweord and scearp.
215þonne gehyreð hwylc, hwæt hyra hyge seceð?
216And ðu hi, drihten, dest deope to bysmre; nafast þu for
217awiht ealle þeoda.
218Ic mine strengðe on ðe strange gehealde, forðon þu me god
219eart geara andfencgea, and mildheortnes mines drihtnes me
220fægere becom, þær me wæs freondes þearf.
221Min se goda god, ætyw me þin agen good for minum feondum,
222þe me feale syndun; ne do hy to deadan, þy læs hi dollice
223þinre æ geban anforlæton.
224Ac þu hi wide todrif þurh þines wordes mægen, and hi
225wraðe toweorp, wealdend min drihten.
226Ys hyra muðes scyld manworda feala, ða hi mid welerum wraðe
227aspræcan; wærun hi on oferhygde ealle gescende,
228þa hi on lige lange feredon; forðon hi on ende yrre
229forgripeð

page 12

230and hi syþþan ne beoð samod ætgædere.
231Syððan hi wisslice witon, þætte wealdeð god ofer
232middangeard manna cynnes and ealra eac eorðan gemæru.
233Hi on æfenne eft gecyrrað and heardne eac hungor ðoliað,
234swa hundas ymbgað hwommas ceastre.
235Efne hi to æte ut gewitað, þær hi towrecene wide
236hweorfað; gif hi fulle ne beoð, fela gnorniað.
237Ic þonne ðine strengþu stundum singe and ðin milde mod
238morgena gehwylce.
239Forðon þu min andfengea æghwær wære and ic helpe æt
240ðe hæfde symble, þonne me costunge cnysedon geneahhige;
241þu eart fultum min, ic ðe fela singe.
242Forðon þu me, god, eart geara andfengea and mildheortnes,
243mihtig drihten.
244þu us todrife, drihten user, and us towurpe geond werþeoda,
245yrre us wurde and eft milde.
246Eorðan ðu onhrerdest, ealle gedrefdest; hæl hyre wunde,
247nu heo ahrered is.
248Feala ðu ætywdest folce ðinum heardra wisan and hi
249hraþe æfter mid wynsume wine drenctest.
250þu becnuncge beorhte sealdest þam þe ege ðinne elne
251healdað, þæt hi him gebeorgen bogan and stræle
252and wæron alysede leofe þine.
253Do me þin seo swyðre hand symle halne;

page 13

254gehyr me, halig god.
255Hwæt, ðu holdlice on ðinre halignesse her aspræce: And ic
256blissie, ba gedæle Sicimam et Conuallem,
257ða samod wæron on Metiboris mihtum spedige.
258Min is Galaad, gleaw Mannases and Effrem ys æðele strengþu
259heafdes mines her on foldan.
260Cyninc ys me Iuda cuð; is me Moab mines hyhtes hwer, and ic
261aðenige eac on Idumea, min gescy sende,
262and me syððan gedo Allophilas ealle gewylde.
263Hwylc gelædeð me leofran on ceastre weallum beworhte?
264Hwa wyle swylce me in Idumea eac gelædan?
265Ac ne eart þu se sylfa god, ðe us swa drife?
266Ne ga ðu us on mægene, mihtig drihten.
267Syle us nu on earfoðum æðelne fultum, forðon hælu byð
268her on eorðan manna gehwylces mægene idel.
269Us sceal mægenes gemet mihtig drihten soðfæst syllan, and
270he sona mæg ure fynd gedon fracoþe to nahte.
271    

page 60

272þu eart friðstol us fæste, drihten, of cynne on cynne and
273on cneorisse.
274Ærðon munta gesceaft ofer middangeard oððe ymbhwyrft
275eorðan wære oþþe world wære, þu eart, wuldres
276god.
277Ne ahwyrf þu fram mænn heah eadmedu; and þu cuðlice cwæde
278sylfa: Ic manna bearnum mod onwende.
279For þinum eagum, ece drihten, þusend wintra bið þon
280anlicast, swa geostran dæg gegan wære.
281And swa hi on niht hyrdnesse neode begangað, ne heora
282winterrim for wiht ne doð.
283Morgen gewiteð swa gemolsnad wyrt; oðre morgene eft
284gebloweð and geefneð swa, oþþæt æfen cymeð,
285þonne forwisnað, weorðeð to duste.
286Forþon we on þinum yrre ealle forwurdon, wæron on þinum
287hathige hearde gedrefde.
288þu ure unriht eall asettest, þær þu sylfa to eagum
289locadest, and ure worulde þu eac gestaðelodest on alihtincge
290andwlitan þines.

page 61

291Forþam ðe ure dagas ealle geteorudun, and we on þinum yrre
292synt swiðe gewæhte.
293Wæran anlicast ure winter geongewifran, þonne hio geornast
294bið, þæt heo afære fleogan on nette; beoð ure geardagas
295gnornscendende, þeah þe heora hundred seo samod ætgædere.
296Gif on mihtigum mannum geweorðeð, þæt hi hundehtatig ylda
297gebiden, ealle þe þær ofer beoð æfre getealde wintra on
298worulde, þa beoð gewinn and sar.
299Us manðwærnes becwom micel ofer ealle and we on þam gefean
300forhte gewurdan.
301Hwa ðæs soð me cann sæcgean ænig, hu þines yrres
302egsa standeð and seo micle miht?
303Nis þæt mann ænig þe þa ariman rihte cunne.
304Do us þa þine swiðran hand, drihten, cuðe, þam þe on
305snytrum syn swyðe getyde, and þa heora heortan
306healdað clæne.
307Gehweorf us hwæthwiga , halig drihten; wes þinum scealcum
308wel eaðbede.
309We synd gefyllede fægere on mergenne þinre mildheortnesse;
310þæs we on mode nu habbað ealle dagas æþele blisse.
311We gefeoð swylce for þon fægerum dagum, on þam þu us to
312eadmedum ealle gebrohtest, and for ðam gearum þe we
313on gesawon yfela feala.
314Beseoh on þine scealcas swæsum eagum and on þin agen weorc,
315ece drihten, and heora bearn gerece bliðe mode.
316Wese us beorhtnes ofer bliðan drihtnes, ures þæs godan
317godes georne ofer ealle; gerece ure handgeweorc heah ofer usic.

page 62

318Me eardað æt æþele fultum þæs hehstan heofonrices
319weard, þe me æt wunað awa to feore.
320Ic to drihtne cwæð: þu me dyre eart fæle fultum; hæbbe ic
321freond on him, min se goda god, and ic on
322ðe geare hycge.
323Forðon he me alysde of laðum grine, huntum unholdum, hearmum
324worde.
325He me mid his gesculdrum sceade beþeahte; forþon ic under
326fiðrum fæle hihte.
327Hwæt, me soðfæstnes min scylde wið feondum, ne ðu þe
328nihtegsan nede ondrædest.
329Ne forhtast þu ðe on dæge flan on lyfte, þæt þe
330þurhgangan garas on ðeostrum, oððe on midne dæg
331mære deoful.
332Fealleð þe on þa wynstran wergra þusend, and eac geteledra
333tyn þusendo on þine þa swiðran and þe ne
334sceaðeð ænig.
335Hwæðere þu ðæs eagan eall sceawadest, gesege fyrenfulra
336frecne wite.
337þu me eart se hehsta hyht, halig drihten; þu me friðstol on
338ðe fæstne settest.
339Ne mæg þe ænig yfel egle weorðan, ne heard sweopu huse
340þinum on neaweste nahwær sceþþan.
341Forþon he his englum bebead, þæt hi mid earmum þe on
342heora handum heoldan georne, þæt þu wilwega wealdan mostest.
343And þe on folmum feredan swylce, þe læs þu fræcne on stan
344fote spurne.
345þu ofer aspide miht eaðe gangan, and bealde nu basiliscan
346tredan, and leon and dracan liste gebygean.
347Forðon he hyhte to me, ic hine hraðe lyse, niode hine
348scylde, nu he cuðe naman minne.

page 63

349He cigde me, and ic hine cuðlice hold gehyrde, and hine
350hraðe syþþan of earfoþum ut alysde.
351Ic hine generige and his naman swylce gewuldrige geond
352ealle werðeoda, and him lifdagas lange sylle,
353swylce him mine hælu holde ætywe.
354God is, þæt man drihtne geara andette and neodlice his naman
355asinge, þone heahestan hæleða cynnes.
356And þonne on morgene mægene sæcge, hu he milde wearð manna
357cynne, and his soðe sæcge nihtes.
358Hwæt, ic on tyn strengum getogen hæfde, hu ic þe on
359psalterio singan mihte oððe þe mid hearpan hlyste cweman,
360forðon þu me on þinum weorcum wisum lufadest;
361hihte ic to þinra handa halgum dædum.
362Hu micle synt þine mægenweorc, mihtig drihten; wærun þine
363geðancas þearle deope.
364Wonhydig wer þæs wiht ne cann, ne þæs andgit hafað
365ænig dysigra.
366þonne forð cumað fyrenfulra ðreat, heap synnigra hige
367onlic; ealle þær ætywað, þa ðe unrihtes on weoruldlife
368worhtan geornast, þæt hi forwordene weorðen
369syþþan on worulda woruld and to widan feore.
370þu on ecnesse awa, drihten, heahesta bist, heofonrices
371weard.
372þi nu ðine feond fæcne, drihten, on eorðwege ealle
373forweorþað , and weorðað towrecene wide ealle,

page 64

374þa þe unrihtes æror worhtan.
375þonne anhorna ealra gelicost, min horn weorðeð ahafen
376swiðe and mine yldo beoð æghwær genihtsum.
377And eage þin eac sceawode, hwær fynd mine fæcne wæran, and
378mine wergend wraðe gehyrde efne þin agen
379eare swylce.
380Se soðfæsta samed anlicast beorht on blædum bloweð swa
381palma, and swa Libanes beorh lideð and groweð.
382Settað nu georne on godes huse, þæt ge on his wicum wel
383geblowan.
384Nu gyt syndan manige manna swylce, þe hiom yldo gebidan ær
385to genihte, and þa mid geþylde þenden sægdan.
386Cwædon, þæt wære soðfæst sylfa drihten and hine unrihtes
387awyht ne heolde.
388Drihten hine begyrede gode strengðe, and hine þa mid micle
389mægene begyrde.
390Drihten rixað, dema usser, and hine mid weorðlice wlite
391gegyrede.
392And þa ymbhwyrft eorþan getrymede, swa folde stod fæste
393syþþan.
394Gearu is þin setl, and þu, ece god, ær worulde fruman,
395wunast butan ende.
396Hofan heora stefne streamas, drihten, hofan and hlynsadan
397hludan reorde fram wæterstefnum widra manigra.
398Wræclice syndon wægea gangas, þonne sæstreamas swiðust
399flowað; swa is wundorlic wealdend usser halig drihten
400on heanessum.

page 65

401þin gewitnes is weorcum geleafsum, and mid soðe is swiðe
402getreowed.
403Huse þinum halig gedafenað, drihten usser, and dagas lange.
404þu eart wracena god, and þu miht wrecan swylce, ana
405gefreogan æghwylcne mann.
406Ahefe þe on ellen, eorþan dema, gyld oferhydigum, swa hi
407ær grame worhton.
408Hu lange fyrenwyrhtan foldan wealdað oþþe manwyrhtan
409morðre gylpað?
410Hi oftust sprecað, unnyt sæcgeað and woh meldiað, wyrceað
411unriht.
412Folc hi þin, drihten, fæcne gehyndan, and yrfe þin eall
413forcoman.
414ælðeodige men, earme wydewan, steopcilda feala stundum
415acwealdon.
416Sægdan and cwædan, þæt ne gesawe drihten æfre, dyde swa
417he wolde, ne þæt Iacobes god ongitan cuðe.
418Onfindað þæt and ongeotað þe on folce nu unwiseste
419ealra syndon; dysige hwæthwygu deope þæt oncnawan.
420Se ðe ærest ealdum earan worhte, hu se oferhleoður æfre
421wurde?
422And him eagena gesyhð eallum sealde and he scearpe ne mæge
423gesceawian?
424And se þe ege healdeð eallum þeodum, and his þrea ne si
425þær for awiht, se þe men læreð micelne wisdom?
426God ealle cann guman geðancas eorðbuendra, forðon hi idle
427synt.
428þæt bið eadig mann, þe þu hine, ece god, on þinre soðre
429æ sylfa getyhtest

page 66

430and hine þeodscipe ðinne
431lærest and him yfele dagas ealle gebeorgest, oðþæt bið
432frecne seað þam fyrenfullan deop adolfen deorc and ðystre.
433Næfre wiðdrifeð drihten ure his agen folc, ne his yrfe þon
434ma on ealdre wile æfre forlætan.
435Hwylc þonne gena gehwyrfed byð, þæt he on unriht eft ne
436cyrre; oððe hwylc nymeð me, þæt ic man fleo
437and mid rihtheortum rædes þence?
438Hwylc ariseð mid me, þæt ic riht fremme and wið awyrgedum
439winne and stande, þe unrihtes ealle wyrceað?
440Nymðe me drihten, dema usser, gefultumede fægere æt
441þearfe, wenincga min sawl sohte helle.
442Gif ic þæs sægde, þæt min sylfes fot ful sarlice asliden
443wære , þa me mildheortnes mihtigan drihtnes gefultumede,
444þæt ic feorh ahte.
445Æfter þære menigeo minra sara þe me ær on ferhðe fæste
446gestodan, þa me þine frofre fægere, drihten,
447gesibbedan sawle mine.
448Ne ætfyligeð þe ahwær facen ne unriht; ðu gefæstnast
449facen sares; hi soðfæste sneome gehæftað and heora sawle
450ofslean þenceað, blod soðfæstra bitere ageotan.
451Forðon me is geworden wealdend drihten to friðstole fæst
452and gestaðelad; is me fultum his fæst on drihtne.
453þonne him gyldeð god ælmihtig ealle þa unriht ðe hi
454geearnedan, and on heora facne fæste todrifeð
455drihten eallmihtig, dema soðfæst.

page 67

456Cumað nu togædere, wutun cweman gode, wynnum drihten
457wealdend herigean, urum hælende hyldo gebeodan.
458Wutun his ansyne ærest secean, þæt we andettan ure fyrene
459and we sealmas him singan mid wynne.
460Forðon is se micla god mihtig drihten and se micla cynincg
461ofer eall manna godu.
462Forðon ne wiðdrifeð drihten usser his agen folc æfre æt
463þearfe; he þas heahbeorgas healdeð swylce.
464Eac he sæs wealdeð and he sette þone; worhte his folme eac
465foldan drige.
466Cumað him fore and cneow bigeað on ansyne ures drihtnes, and
467him wepan fore ðe us worhte ær.
468Forðon he is drihten god, dema usser; wærun we his fæle
469folc and his fægere sceap, þa he on his edisce
470ær afedde.
471Gif ge to dæge drihtnes stefne holde gehyran, næfre ge
472heortan geþanc deorce forhyrden drihtnes willan.
473Swa on grimnesse fyrn geara dydan on þam wraðan dæge and on
474westenne, þær min ðurh facen fæderas eowre þisse
475cneorisse cunnedan georne, þær hi cunnedan, cuð
476ongeaton and min sylfes weorc gesawon mid
477eagum.
478Nu ic feowertig folce þyssum wintra rimes wunade neah, aa and
479symble cwæð and eac swa oncneow, þæt
480hi on heortan hyge dysegedan.
481Hi wegas mine wihte ne oncneowan, þæt ic ær on yrre aðe
482benemde, gif hi on mine reste ricene eodon.

page 68

483Singað nu drihtne sangas neowe; singe þeos eorðe eall eceum
484drihtne.
485Singað nu drihtne, and his soðne naman bealde bletsiað;
486beornas sæcgeað fram dæge to dæge drihtnes hælu.
487Secgeað his wuldor geond sigeþeode, and on eallum folcum his
488fægere wundor.
489He is se mycla god; forþon hine mæn sculon elne herian; he
490is egeslic god ofer ealle godu eorðbuendra.
491Syndon ealle hæþenu godu hildedeoful; heofonas þænne
492worhte halig drihten.
493Ys on þinre gesihðe soð andetnes, fæger halignes fæste
494gebletsad and weorðlic wlite wuldres þines.
495Bringað nu drihtne bu ætsomne wlite and are, wuldor ðridde,
496and þæt of hiora eðele don ealle þeode,
497þæt hi naman drihtenes neode herigean.
498Genimað eow arlice lac and in gangað on his wictunas;
499weorðiað drihten on his þære halgan healle geneahhige.
500For his ansyne sceal eorðe beofian; secgað nu on cynnum and
501on cneorissum, þæt from treowe becwom tirfæst rice
502drihten ure; dome he syþþan eorðan ymbhwyrft ealle gesette.
503He ferhtlic riht folcum demeð and on his yrre ealle þeode.
504Heofenas blissiað, hrusan swylce gefeoð fæstlice, and
505floda þrym; sealte sæstreamas sælðe habbað.
506Habbað feldas eac fægere blisse and ealle þa þe on him
507eard weardiað;

page 69

508wærun wudubearuwas on wyndagum for andwlitan
509ecean drihtnes, forþon he cwom on cyneðrymme,
510þæt he þas eorðan ealle demde.
511þonne he ymbhwyrft eorðan folca soðe and rihte syþþan
512demeð.
513Rixað nu mid rihte rice drihten; is eorðe nu eac on blisse,
514and þæs fægerne gefean habbað ealanda mænig ut
515on garsæcge.
516stundum onginnað fægnian mid folmum on gefean ælcne;
517beorgas blissiað, beacen oncnawað, for ansyne
518ecean drihtnes; forþon he eadig com eorþan to demanne.
519He ymbhwyrft eorþan demeð soðe and rihte, and his syndrig
520folc on rihtnesse ræde gebringeð.
521Rixað drihten, and he reðe folc healdeð on yrre ungemete
522swiðe; sitteð ofer cherubin, se þe sona mæg ana eorðware
523ealle onstyrian.
524Drihten is on Sion, dema se mæsta, heah and mære ofer eall
525hæleða folc.
526We andetað þinum þam ecean naman, þæt he mid mannum is
527mycel and egeslic, halig on helpe hæleþa bearnum,
528aare cyninges dom æghwær lufade.

page 70

529þu gegearwadest geara ærest, þæt þu recene, god, rihte
530beeodest; þu on Iacobe gode domas æt fruman
531worlde fægere settest.
532Ahebbað haligne heofena drihten, usserne god
533ellencræfte , and his fota sceamul forð weorþiað;
534forþon he halig is hæleða bearnum.
535Moyses et Aaron mære gebroðor, soðe sacerdas, Samuhel
536ðridda, þa gode his naman neode cigdan.
537Hi cymlice cigdon drihten, and he hi gehyrde holde mode,
538spræc him wordum to þurh wolcnes swyr.
539Hi þa gewitnesse wel geheoldon and his bebodu beorhte
540efnedan, þa he him sealde and sylfa bebead.
541þu gehyrdest hig, halig drihten, and him, meahtig god, milde
542wurde, and heora æfþancan ealle gewræce.
543Hebbað urne god, hælend drihten, and hine on halgum her
544weorðiað mærum beorge; forðon his meahte synt
545and halig is heofonrices weard.
546Nu ge mycle gefean mihtigum drihtne eall þeos eorðe elne
547hyre, and blisse gode bealde þeowie.
548Gangað on ansyne ealle bliðe; witað wislice þæt he is
549wealdend god; he us geworhte and we his syndon.
550We his folc syndan and his fæle sceap, ða he on his edisce
551ealle afedde; gað nu on his doru, god andettað,

page 71

552and hine weorðiað on wictunum mid lofsangum lustum
553myclum.
554Heriað naman drihtnes, forþon he is niðum swæs; is þin
555milde mod ofer manna bearn.
556Mildheortnesse and dom mihtigan drihtnes singe and secge, and
557soð ongyte on unwemmum wege, hwænne
558þu me wylle to.
559Ic mid unbealuwe ealre heortan þurh ðin hus middan halig
560eode.
561Ne sette ic me fore eagum yfele wisan; ealle ic feode facnes
562wyrcend, næs me wyngesið wiðerweard heorte.
563Ic awyrgde fram me wende and cyrde; nolde ic hiora andgit
564ænig habban, þe tælnessa teonan geneahhige wið heora
565þam nehstan nið ahofan; þara ic ehte ealra mid niðe.
566Oferhydegum eagum, unsædre heortan, nolde ic mid þæm men
567minne mete ðicgean.
568Ofer geleaffulle eorðbugende eagan mine georne
569sceawedun, hwær ic tirfæste treowe funde, þa me symble
570mid sæton and eodon; he me holdlice her ðegnade.
571Ne eardað on midle mines huses, þe oferhygd up ahebbe oþþe
572unriht cweþan elne wille.
573Ic on morgenne ofslea manes wyrhtan ealle þe unriht elne
574worhtan and fyrena fela gefremed habbað; ealle ic þa
575of drihtnes drife ceastre.
576    

page 137

577Ic þe, drihten, to dyrum clypige; gehyr me hrædlice holdre
578stefne, þonne ic bene to þe bidde ceare full.
579Sy on þinre gesihþe mines sylfes gebed ful recene gereht,
580swa ricels byð, þonne hit gifre gleda bærnað.
581Swylce is ahafenes handa minra, þonne ic þe æfenlac
582estum secge.

page 138

583Sete swæse geheald swylce, drihten, muðe minum, ne læt
584man sprecan, and æþele dor ymbstandende ,
585þæt on welerum wisdom healde.
586Ne hyld þu mine heortan, þæt ic hearme word þuruh
587inwitstæf ut forlæte, and ic lædend wese laðra firena.
588Ne ic æfre mid mannum manfremmendum gemænnesse micle hæbbe,
589ne on heora gecorenesse becume æfre.
590Ac me soðfæst symble gerecce and mildheorte mode
591þreage; ele synfulra æfre ne mote heafde minum hrinan ahwær.
592Forþon min gebed nu gyt becnum standeð, þæt him on wisum
593is wel lycendlice; syndon hi æt strangum stane forswolgene;
594noldan heora deman mine gedefe word earan gehyran,
595eft ne mihton.
596Swa unefne is eorþe þicce, syndon þas moras myclum
597asprotene, swa ure ban syndon bitere toworpene be
598helwarena hæfteneodum .
599Forþon ic, drihten, on þe dædum minum eagum and mode
600æghwær gelyfe; ne ascuf þu fram me sawle mine.
601Geheald me wið þare gryne þe me grame setton, þæt me ne
602beswice synwyrcende, þa þe unrihtes æghwær
603þenceað.
604Feallað firenfulle on heora fengnettum; ic me syndrig eom,
605oþþæt ic swa fere.
606Min stefn to þe styrmeð, drihten, and ic mid strangere
607stefne swylce

page 139

608eam biddende bealde drihten.
609Ic mine bene bealde swylce on his gesihðe symble ageote, and
610mine earfeþu ealle full georne fore him sylfum
611sæcge geneahhe.
612Gif mine grame þenceað gast teorian, and þu mine stige
613strange ongeate.
614On ðyssum grenan wege, þe ic gange on, me oferhydige
615æghwær setton gearwe grine; geara ic sceawade,
616geseah on þa swyðran, ne me sylfne þær ænig mid gode
617ongitan wolde.
618Ða me eac frecne fram fleam gedydan, næs þa þe mine sawle
619secean wolde, þa ic to þe, drihten, digle
620cleopode and sona cwæð: þu eart min se soða hiht; eart
621þu on lifigendra lande swylce se gedefa dæl, drihten,
622æghwær.
623Beheald mine sawle, hæleþa wealdend, forþon ic geeadmeded
624eom ungemete swiðe.
625Alys me fram laþum; hi me lungre synt ealle ofer me ungemete
626strange.
627Alæd me of carcernes cluse swylce mine sawle, þæt ic
628syþþan forð þinne naman mote neode sæcgean.
629Min soðfæste snotere bidað, oþþæt þu me edlean eft
630forgylde.
631Drihten, min gebed deore gehyre, and mid earum onfoh ungemetum
632georne mine halsunge; heald me syððan on þinre
633soðfæstnesse and me on soðe gehyr.
634Ne ga þu mid þinum esne in to dome, forþon on þinre
635gesihðe ne bið soðfæst ænig þe on ðisse foldan
636feorhlif bereð.
637Forþon mine sawle swiðe feondas

page 140

638ealle ehtan ungemete strange, habbað me gehnæged heanne
639to eorðan and min lif swylce gelytlad is.
640Hi me on digle deorce stowe settan sarlice samed anlice, swa
641þu worulddeade wrige mid foldan; is me
642ænge gast innan hreðres, and me is heorte on hearde
643gedrefed.
644þonne ic on mode gemyndgade, hu me ærran dagas oft alumpan,
645metegade on mode ealle þine mæran weorc
646and ymbe þine handgeweorc hogode georne.
647þonne ic mine handa to þe holde þenede and mine sawle sette
648mid mode, swa eorðan bið ansyn wæteres;
649gehyr me hrædlice, hæl me syþþan.
650Nu me deope is, drihten leofa, min sylfes gast swær geworden,
651ne awend fram me, wuldres ealdur, þine ansyne; wese ic
652earmum gelic þe on sweartne grund syþþan astigað.
653Gedo þæt ic gehyre holde on morgene þine mildheortnesse,
654mihtig drihten, forþon ic hycge to ðe, helpe gelyfe.
655Do me wegas wise, þæt ic wite gearwe on hwylcne ic gange
656gleawe mode; nu ic to drihtnes dome wille
657mine sawle settan geornast.
658Afyrr me, frea drihten, feondum minum; nu ic helpe to þe
659holde gelyfe; lær me, hu ic þinne willan wyrce and fremme,
660forþon þu min god eart, þu me god dydest.
661Me þin se goda gast gleawe lædde, þæt ic on rihtne weg
662reðne ferde; for naman þines neodweorðunge,
663drihten usser, do me halne,

page 141

664þæt ic on ðinum rihte rædfæst lifige.
665And þu of costunge clæne alæddest sawle mine, þær heo
666syððan forð on þinre mildheortnesse mote wunian;
667and þu mine feondas fæcne todrife, and eac forleose
668laðra gehwylcne þe mine sawle synne ætfæsten,
669forþon ic þin esne eom agen symble.
670Drihten is gebletsad, min se deora god, þe mine handa to
671hilde teah and mine fingras to gefeohtanne.
672He is mildheortnes min æt þearfe, frið and fultum,
673fæst andfengea and alysend is lifes mines.
674Min þu mære eart mihtig scyldend; ic hiht on ðe hæbbe
675fæste, þæt þu me folc mænig fægere underþeoddest.
676Hwæt is se manna, mihtig drihten, þe þu him cuðlice cyþan
677woldest, oððe mannes sunu, þæt hit gemet
678wære, þæt þu him aht wið æfre hæfdest?
679Man byð merwe gesceaft, mihtum idel; beoð his dagas
680swylce demde gelice, swa þu on scimiendre sceade locige.
681Ahyld þine heofenas, halig drihten, onhrin þissum muntum,
682and hi hraðe reocað.
683þine ligetta leohtað and beorhtað , and þu hi
684toweorpest wide æfter; synd þine strele strange swylce,
685and ðu hi gedrefed hafast deope syþþan.
686Onsend þine handa of heanessum, alys me and genere wið
687lagustreamum manegum wæterum and wið manfolmum

page 142

688fremdra bearna and frecenra.
689þara muðas sprecað manidel word, bið hyra seo swiðre
690symble abysgod, þæt hi unrihtes elne tiligeað.
691Ic niwlice niwne cantic þam godan gode gleawne singe on
692psalterio, þe him swynsað oft mid tyn strengum getogen
693hearpe, on þære þe ic þe singe swiþe geneahhe.
694þu healdest and sylest hælu cyningum; þu alysdest eac
695leofne Dauid, þinne agenne ombihtmæcg, of þam
696awyrgedan wraðan sweorde.
697Alys me and oðlæd laþum wætrum, manegum merestreamum,
698mærum handum, þa me fremde bearn fæcne syndan.
699þara muðas sprecað manidel word, byð hyra seo swiðre
700symble abysgad, þæt hi unrihtes awa tiligean.
701þara bearn swylce bogum æþelum settum beamum samed
702anlice, standað on staðule stiðe wið geoguðe.
703Wærun heora dohtru deore gesette and ymb frætwum utan
704gegyrede, efne anlicast æþelum temple.
705Heora frumwæstme fulle syndon, þæt hi rumlice roccettað
706swiðe, of þissan on þæt þonne wendað.
707Heora sceap wærun swylce tydred and on siðfatum swiþe
708genihtsum, heora oxan eac ungemete fætte.
709Ne hreosað hi to hrusan hearde gebiged, ne þær fernes is
710folca mænegum, ne care micle cleopiað on worðum .

page 143

711Eadig bið þæt folc, oðre hatað, þe him swa on foldan
712fægre limpeð; eadig bið þæt folc þe ælmihtig
713wile drihten god dema weorðan.
714Ic me heahne god hæbbe to kyninge, and ic naman þinne neode
715herige on ecnesse awa to worulde.
716þuruh syndrige dagas symble ic ðe bletsige, and naman þinne
717neode herige on ecnesse awa to worulde.
718Mycel is drihten, hine man mægene sceal holde mode herian
719swiðe; nis his micelmodes mægenes ende.
720Cneorissa kynn cwidum symble þin weorc herigen wordum georne,
721and þine mihte eac micle sæcgeon.
722Mycel mod and strang þines mægenðrymmes and þine
723halignesse holdes modes wise wordum sprecað,
724weredum secggeað eall þin wundur wide mære.
725And hi mægen swylce mære and egeslic þinra wundra wislic
726sæcgen and þine mægenstrengðu mærsien wide.
727Gemune þines modes þa miclan geniht, þinre weðnesse wise
728sæcgenum roccette and ræd sprece, and þine
729soðfæstnesse sæcge geneahhe.
730Mildheort is drihten and mannþwære and geþyldig eac,
731þearle mildheort.
732Swylce eallum is ure drihten manna cynne milde and bliðe;
733syndan his miltsa ofer us mære weorc eall yldum cuð
734awa to feore.

page 144

735Andetten þe, drihten, ealle þine weorc and þe þine þa
736halgan her bletsien.
737And hi þine mihte manna bearnum cyþan mid cynnum and mid
738cneorissum, þines mægenþrymmes mære wuldur
739riht and reðe rices þines.
740þæt þu cuð gedydest ofer cneorisse, þær synd manna bearn
741manig ætsomne, and þæt þin miht is ofer middaneard
742and þines rices rædfæst wuldur.
743Rice is þin, drihten, ræde gefæstnod, and þu woruldricum
744wealdest eallum; is þin anweald eac ofer eorðware of cynne
745on cynn and on cneorissum.
746Drihten is on wordum dædum getreowe and on eallum his
747weorcum wis and halig.
748Ahefeð halig god þa ðe hreosað ær, and he ealle areceð
749earme gebrocene.
750Eagan on þe ealra, drihten, wisra gewenað wiste to genihte,
751and þu him mete sylest mæla gehwylce and þæs tidlice
752tid gemearcast.
753Onhlidest ðu þine handa and hi hraðe fyllest, ealra
754wihta gehwam wis bletsunga.
755Soðfæst is drihten on his sylfes wegum eallum on eorðan,
756and he æfter þan on his weorcum is wis and
757halig.
758Neah is drihten niþum eallum þe hine mid soðe hige seceað
759and ciegað and his willan her wyrceað georne and his
760ege swylce elne ræfnað; he heora bene
761bealde gehyreð and hi hrædlice gedeð hale sona.
762Ealle gehealdeð halig drihten þe lufan wið hine lustum
763healdeð, and he synfulle swylce todrifeð geond widwegas
764wearnum ealle.

page 145

765Sceal lof drihtnes on lust sprecan min muð mannum mæla
766gehwylce, and flæsca gehwylc þurh fæle word
767his þone haligan naman her bletsian on ecnesse awa to feore.
768Herige min sawl hælend drihten, and ic on minum life lustum
769drihten herige haligne and holdum gode
770sealmas singe, þenden ic sylf lifige.
771Nelle ge on ealdurmenn ane getreowian, ne on manna bearn; nis
772þær mycel hælu.
773Heora gast gangeð, gearwe onwendeð on þa eorðan þe hi of
774comon; of þam sylfan dæge syðþan forweorðað ealle
775þa geþohtas þe hi þohtan ær.
776þonne bið eadig þe him æror wæs Iacobes god geara
777fultumiend, and ær his hiht on god hæfde fæste.
778Se þe heofon worhte, hrusan swylce and sidne sæ samed
779ætgædere, and ealle þa þe him on ahwær syndon.
780He his soðfæst word swylce gehealdeð, and on worulde his
781wise domas deð gedefe þe her deorce ær teonan
782manige torne geþoledan; syleð mete swylce þe her
783murcne ær hungur heaðugrimne heardne geþoledan.
784Wreceð to ræde rice drihten þara manna bearn þe ær man
785gebræc, swylce þa gefetredan fægre drihten lungre alyseð
786and him lif geofeð, and blinde eac bealde drihten on
787heora eagum eft onleohteð;

page 146

788soðfæste drihten swylce lufade.
789Þa elðeodigan ealle drihten lustum healdeð, and lif geofeð
790weodewum wencelum; he hiom wel onfehð, fyrenfulra weg frecne
791toweorpeð.
792Rixað mid ræde rice drihten on ecnesse awa to feore, and
793þin, Sione, god symble to worulde.
794Heriað drihten, he is heah and good; singað him sealmas
795swiðe geneahhe and hine wlitegum wordum herigeað.
796Eft Hierusalem georne drihten timbreð tidum, and to somnað
797þa þe ut gewitan of Israhelum.
798Se hæleð eac heortan geðræste and heora unrotnesse ealle
799gewriðeð.
800He recene mæg riman steorran and þa neodlice be naman sona
801full cuðlice cigean ealle.
802Micel is ure mihtig drihten, and his mægen is micel and
803mihtum strang; ne his snytru mæg secgean ænig,
804on þyssum ealdre æfre ariman.
805Milde mode and manþwære he onfehð fægere, and fyrenfulle
806wið eorðan niþer ealle gehnegeð.
807Onginnað ge drihtne geare andettan, singað gode urum gleawe
808be hearpan.
809Se þe heofen þeceð hadrum wolcnum and regn þanon recene
810sendeð þe þeos eorðe fram æfter groweð.
811He of beorgum ut blæde lædeð, hig to helpe hæleða
812bearnum.

page 147

813Se þe mete syleð manegum neatum, hrefnes briddum, þonne
814heo hropende him cigeað to, cuðes æses.
815Nafast ðu to manna mægene willan, ne þe on þinum
816selegescotum swiðe licað, þeah þe weras wyrcean
817wræst on eorðan.
818Ac wel licað wuldres drihtne, þa þe hine him ondrædað
819dædum and wordum, and on his milde mod mægene
820gewenað.
821Herige Hierusalem georne drihten, here þu, Sion, swylce
822þinne soðne god .
823Forþon he getrymede wið teonhete, þæt þu þine doru
824mihtest bedon fæste, and gebletsade bearna æghwylc
825þe on innan þe ahwær wæren.
826He þine gemæru gemiclade, þu on utlandum ahtest sibbe, and
827þe gesadade mid þy selestan hwætecynnes
828holde lynde.
829He his spræce hider spowendlice on þas eorðan ærest
830sendeð, and his word yrneð wundrum sniome.
831He snaw sendeð samed anlice swa þu wulle flys wolcnum
832bringe, and þone toweorpeð wide swa æscean.
833He his cristallum cynnum sendeð swylc swa hlafgebrece of
834heofonwolcnum; for andwlitan celes þær ænig
835ne mæg him standan stiðe mode.
836He his word sendeð þuruh windes gast; blaweð beorhtlice,
837burnan floweð and to wætere weorðeð sniome.
838He his word eac ær mid wisdome

page 148

839godum Iacobe geara foresægde, and Israhele eac his domas.
840Ne dyde he ahwær swa eldran cynne, þæt he him his domas
841digle gecydde.
842Heriað ge on heofenum hælend drihten, heriað hlude on
843heanessum.
844Heriað hine ealle engla ðreatas, lofige hine swylce eall
845his leodmægen.
846Herigen hine swylce sunna and mona, æghwylc steorra and þæt
847æðele leoht.
848Heofenas hine heofena herian georne, and þa wæter swylce ðe
849ofer wolcnum synt on heofenhame, herigen drihten.
850Forðon he sylfa cwæð, sona wærun wræclice geworht
851wætera ðryþe, and gesceapene wærun, þa he sylfa
852het.
853þa he on ecnesse eall staðelade and on worulda woruld wolde
854healdan; he sette bebod, syþþan heo þæt
855heoldon.
856Herigen dracan swylce drihten of eorðan, and ealle
857neowelnessa herian naman drihtnes.
858Fyr, forst, hægel and gefeallen snaw, is and yste, ealra
859gastas þe his word willað wyrcean georne.
860Muntas and geswyru, micle beamas, þa þe mæst and wæstm
861mannum bringað, and on eallum cedrum ciið alæded.
862Deor and neat, do þæt sniome; nifle nædran cynn be naman
863ealle, and fugla cynn fiðerum gescyrped.
864Eorðcyningas eac ealle swylce þe folcum her fore wisien

page 149

865and ealdormen ahwær syndan, and ealle þe þas eorþan
866ahwær demeð.
867Beon ge, hægestealdas and glade fæmnan, ealde and geonge
868ealle ætsamne; herian naman drihtnes mid neodlofe.
869Forþon his anes nama ofer ealle is ahafen healice hæleða
870ealra; is upp ahafen his andetness heah ofer myclum heofone
871and eorðan.
872He horn hefeð holdes folces, he lofe leohteð leofe þa
873halgan; wese awa frið on Israhela fælum folce,
874and hi forð heonan on his neaweste neode wunian.
875Singað samheorte sangas drihtne and him neowne sang nu ða
876singað; wese his herenes on haligra clænre cyricean
877cyðed geneahhe.
878Israhelas on hine eac blissien, and Sione bearn symble hihtan
879swiðust ealra.
880Herigen his naman neode on ðreatum, on timpano tidum heriað
881and on psalterio singað georne.
882Forðon on his folce is fægere drihtne wel licendlic, and he
883wynlice þam manþwærum syleð mære hælu.
884þonne on wuldre gefeoð wel þa halgan, beoð on heora husum
885bliðe gedreme.
886Him on gomum bið godes oft gemynd; heo þæs wislice wynnum
887brucað, and sweord habbaþ swylce on folmum.
888Mid þy hi wrecan þenceað wraðum cynnum

page 150

889and ðrea þearle þeodum eawan.
890And hio bindan balde þenceað cyningas on campum, and
891cuðlice heora æðelingas don on isene bendas.
892þæt hio dom on him deopne gecyðan and þæt mid wuldre
893awriten stande: þis is haligra wuldor her on
894eorðan.
895Heriað on þam halgum his holdne drihten, heriað hine on his
896mægenes mære hælu.
897Heriað hine swylce on his heahmihtum, heriað hine æfter
898mode his mægenþrymmes.
899Heriað hine on hleoðre holdre beman.