1B1.8.2

page 68

    
2Us bisceopum gedafenað, þæt we þa boclican lare þe ure
3canon us tæcð and eac seo Cristes boc, eow
4preostum geopenigan on engliscum gereorde; forþonþe ge ealle
5ne cunnon þæt leden understandan.
6And we ne durran forsuwian, þæt we eow ne secgan þa

page 70

7deopan lare and ures drihtenes beboda, þylæsþe
8we scyldige beon, gif we hit forsuwiað.
9Ac we awerigað us.
10Wite ge hwæt ge don.
11Ic wat to gewissan, þæt wyle mislycian þeos ure mynguncg
12eow for wel manegum.
13Byð swaþeah sum swa onbryrd þurh God, þæt him lyst
14gehyran þa halgan lare and hine sylfne gerihtlæcan to his
15sawle þearfe.
16þa godan wyllað gehyran Godes bebodu and þa yfelan nellað.
17Ac hi sceolan swaþeah, þæt him on sumne sæl huru
18gesceamige hyra stuntnyssa, þæt hi geswycan yfeles.
19Ge sceolan eowerne had healdan arwurðlice and mid godum
20þeawum symble geglencgan and mid clænum mode Criste þenigan
21æt his halgum weofode, swaswa eowrum hade gerist.

page 72

22Forþanþe ge synd gesette soðlice to lareowum ofer Godes
23folce, þæt ge hig Gode gestrynan.
24Tria enim sunt tempora huius sæculi: Ante legem, tempore
25patriarcharum sub lege, tempore Christianorum, post Christi
26aduentum in carne ; þreo tyda synt on þisse worulde:
27An tyd wæs ær Godes æ, on þære heahfædera tyman;
28Oþer under Godes æ, on Moyses tyman; þrydde under Cristes
29gyfe, æfter Cristes tocyme.
30Fram Adame menn wunedon on flæsclicum lustum, and sume on
31hæþenscype unsnoterlice gelyfdon and mid
32deofles biggencgum higsylfe fordydon and þone scyppend
33forsawon, þe hig gesceop to mannum þurh þæs
34deofles lare, þe Adam forlærde.

page 74

35Hwæt þa se ælmihtiga God on Moyses tyman, þæs mæran
36heretogan, mancynne to steore sette þa fif bec,
37on þam þe is Godes æ, and Moyses hy awrat and mancynne
38forbead, þæt hi nænne hæþenscype habban ne
39mostan, ac sceolde efre wurþian þone soþan God, seþe ana
40is ælmihtig scyppend.
41And seo æ forbead eac swylce synna and eac gewitnode þa þe
42wolice syngodon.
43þa æt nyhstan soðlice se soðfæsta hælend, þæs
44ælmihtigan Godes sunu, þe ealle þing gesceop, com on
45þas woruld on soþre menniscnysse, to þig þæt he wolde þa
46synfullan alysan and þa forlorenan to lyfes wege gebringan.
47And astealde cristendom and clænnysse tæhte.
48þa clænnysse he lufað on his clænum þenum, þe him
49sceolan þeowigan symle on clænnysse, þæt is, on munecum
50and on mynecynum and on mæssepreostum.
51Cuius gratie tempus permanet usque ad consummationem

page 76

52sæculi ; þæs gyfu tyma wunað nu oþ þyssere worulde
53geendunge.
54Se ylca Godes sunu geceas him to meder þæt halige mæden,
55Marian gehaten and he sylf is ordfruma eallre clænnysse
56and he ana wunode on þyssere worulde butan
57ælcere synne swaswa nan oþer man.
58Iohannes se fulluhtere, þe hine gefullade, þurhwunade on
59mægðhade on mycelre forhæfednysse.
60And Iohannes se godspellere, þæs hælendes mæg, lyfode on
61mægðhade oþ his lyfes ende.
62Quia uirginitas non solum in feminis sed etiam in castis
63uiris habetur þæt is, forþanþe þa haligan bec us
64bysniað be þam, þæt se haliga mægðhad wunað on
65þam mannum þe næfre wifes ne brucað, swaswa
66he wunað on þam wifmannum þe næfre weres ne brucað, ac
67hi for Godes lufan þa galnysse forhogiað.
68Eac þa twelf apostolas þe þam hælende folgodan, þaþa

page 78

69he her on worulde wunode mid mannum, and þa twa and
70hundseofontig wera, þe wunedon mid him on his lareowdome,
71þa synd leorningccnihtas, ealle hi forletan heora æhta
72and wif and wunedon on clænnysse, Criste folgigende.
73Swaswa Petrus cwæð to Criste sylfum: Ecce nos reliquimus
74omnia et secuti sumus te ; þæt is on englisc: Efne we
75forleton ealle ure woruldþing and we þe folgiað.
76Ge sceolan witan, gif ge wisdom lufiað, hwæt sy betwux þam
77twam gecyðnyssum, þære ealdan æ, ær Cristes tocyme,
78and þære niwan gecyðnysse, under Cristes gife;
79forþonþe men moston ær Moyses æ mislice
80libban, and under Moyses æ mancyn lifode on oþre wisan.
81On oþre we sceolan don be ures drihtnes lare.
82Swaswa he sylf cwæð on his haligan godspelle: Lex et
83prophetæ usque ad Iohannem ;

page 80

84A diebus autem Iohannis
85baptistę usque nunc regnum celorum uim patitur et
86uiolenti rapiunt illud , þæt is on englisc: Seo ealde æ
87wæs and witigan wæron on þissere worulde oþ þæt
88Iohannes com, þe Crist gefullade, and fram his dagum
89heofenarice þolað mycele neadunge and þa
90strecanmod mid hyra strecnysse hit gegripað.
91þa ealdan men leofodon on hyra lustum swiðe, ær Cristes
92tocyme.
93Ac he cwæð, þæt we sceoldan mid strecum mode stiðlicor
94libban and winnan wið leahtras and unlustas
95forseon, þæt we heofena rice habban motan.
96He cwað be þam martyrum, þe he wiste towearde æfter his
97þrowunge for his geleafan: Ne ondræde ge eow þa þe
98ofsleað eowerne lichaman, forþanþe hi þa sawle
99ofslean ne magan.
100Ac ondrædað þone þe þa sawle mæg and eac þone
101lichaman on helle besencan.
102þurh þas myngunge and manegum oþrum wordum wurþan
103gemartyrode manega

page 82

104þusenda wide into þas woruld,
105ægðer ge weras ge wifmen for Cristes geleafan mid ænum mode
106and hi swa mid strecnysse astigan to heofonum.
107Eft cwæð se hælend be his haligum anddetterum, þa þe
108hatað confessores on haligum bocum: Sint lumbi uestri
109precincti Et lucerne ardentes in manibus uestris ;
110Beon eower lendena ymbgyrde and leohtfatu byrnende on eowrum
111handum.
112On þam lendenum is, swaswa we leornigað on bocum, seo fule
113galnys and we sceolan fæstlice þa gewriþan and gewyldan us
114to clænnysse.
115And habban us on handum halige weorc, symle on ælmes dædum
116and on eallum godnyssum, mannum to bysene, swaswa byrnende
117leohtfatu.
118Johannes se godspellere on his gastlican gesyhþe þone

page 84

119hælend geseah, syþþan he to heofenum astah, mid alban
120his breost wæs gegyrd.
121He het us begyrdan ure lendena, swa þæt we forseon þa
122fulan galnysse, and he sylf wæs begyrd mid gyldenum gyrdle
123æt his haligan breoste, forþanþe we habban sceolan ures
124modes clænnysse on ure heortan symble, we þe Criste
125þenigað on his haligan þeowdome.
126Eft Daniel se witega, awrat on his witegunge æ, þæt he God
127gesawe on his gastlican gesyhþe and he wæs lineweard and
128his lendena ymbgyrde.
129And Iohannes geseah, swaswa we sædon ær, þone hælend
130ymbgyrdne æt his haligan breoste.
131Nu is us geswutelad soðlice mid þam, ge on þære ealdan æ,
132ge eac on þære niwan, þæt God wile habban
133on his gastlican þeowdome halige þenas

page 86

134and halige þinena, þaþe mid clænnysse lichaman
135and modes þæt halige husel him geoffrian,
136swaswa he sylf getæhte ær his þrowunge.
137þyses wæron gemyndige þa mæran andetteras, þe we hatað
138confessores , and þa haligan mædenu, þe on clænnysse
139lyfedon hyra lif æfre and Criste þenedan æfter þæra
140cwellera ehtnyssa, þe þa martyras ofslogan, swaswa we sædon
141ær.
142æfter þæs hælendes þrowunge and his upstige to heofenum
143com se haliga gast of heofenum to eorþan swaswa byrnende fyr
144mid bradum liggette ofer Cristes apostolos, swaswa Crist him
145ær behet and hig ealle gefylde butan frecednysse, swa þæt
146hi ealle cuþon eallre þeoda gereord.
147And hi ealle þa lare, þe we leorniað on bocum, awriton and
148gesetton be Godes wissunge.
149Hi worhton eac swylce fela wundra þurh Crist, þa ylcan
150wundra, þe he sylf ær worhte.

page 88

151þa bodade Petrus on þære byrig Hierusalem þam iudeiscum
152folce and þa gebugon to fulluhte of þam folce þreo þusend
153manna on anum dæge and eft gebugon æt oþre bodunge fif
154þusend manna.
155Swa mycclum onbryrde, þæt hi hyra æhta ealle beceapedon
156and þæt wurð brohton to þæra apostola fotan, and hyra nan
157næfde naht synderlices, ac didan him gemæne,
158ælcon be his neode.
159And Iacob, se rihtwisa, bewyste hi ealle and heold Cristes
160setl þrittig geara swa.
161Her wæs asteald þurh þisne haligan heap þæra muneca lif,
162þe libbað æfter regule under hyra abbode;
163ealle hyra þingc him doð gemæne, swaswa him diht se abbod.
164þa toferdon þa apostolos to fyrlynum landum, geond ealle
165þas woruld, wundra wyrcende and bodigende geleafan,
166and þa gelyfeda gefulledon and cyrcean arærdon

page 90

167and gesetton bisceopas and mæssepreostas gehadedon and manega
168Godes þeowan on þam seofon hadum, swaswa us segð se canon.
169And Godes geleafa weox and wanode se hæþenscype.
170Hwæt þa æfter fyrste asprang færlice ormæte ehtnys ofer
171þa cristenan and man hi gemartirode mid mænigfealdum witum,
172and ælcne acwealde þe on Crist gelyfde.
173Ac God geworhte æfre wundra þurh hig, swa þæt þa
174hæþenan on þone hælend gelyfdon, oft an þusend manna,
175þær man ænne ofsloh, þurh þa myccla tacna, þe se
176martyr gefremode, and se cristendom ne mihte beon acwenced
177næfre and God þa syþþan sealde sybbe on
178fyrste on his gelaþunge, and se geleafa weox.
179þa feng se casere Constantinus to rice on Romana byrig and he
180rices geweold ofer

page 92

181eallne middaneard, swa þæt him ealle men abugon.
182He wæs se forma casere þe on Crist gelyfde, sancte Elenan
183sunu, þære eadigan cwene.
184Se het gegaderigan bisceopa synað.
185Wolde gehiran þa haligan lare and þone soþan geleafan be
186þam soðfæstan Gode, þe he ongelyfde, aworpenum
187hæþenscype.
188þa coman þær togædere on Nycea byrig þreo hund bisceopa
189and XVIII bisceopas.
190And se casere com him þær togeanes and mid eallre
191arwurðnysse hy gewylcumode and him eallon gedon het biglyfan
192genohne and hyra lare hliste mid geleaffullan mode.
193þær wæron þa manega, þe mihtan wyrcean wundra þurh God.
194And hig wunedon þær lange.
195þær wæs eac sum arleas preost, Arrianus gehaten, of
196Alexandrigan byrig, ablend on his mode, se mæsta gedwola
197þe of mancynne come.
198Se wolde gelytlian þone lyfigendan hælend and sæde, þæt

page 94

199he nære on godcundnysse his fæder gelic,
200ac wære læssa on mihte.
201þa amansumedon þa bisceopas þone manfullan gedwolan.
202Ac he nolde geswycan swaþeah his gedwyldes, ærþamþe him
203wand ut his innoð æt his setle, þaþa he to
204gange eode.
205And he geendode swa æmtig on his innoþe, swa he on his
206geleafan wæs.
207Oþer sinoð wæs eft, þæt wæs oþer healf hund bisceopa,
208on þeodosiges tyman, þæs, æþelan caseres, and
209hy þær fordemdon þone dweligendan bisceop, Macedomum
210gehaten, and hine amansumedon, forþonþe he wiðsoc and sæde
211on his gedwylde, þæt se haliga gast nære on anre
212godcundnysse mid þam heofenlican fæder and þam hælende
213Criste, and hi getæhtan þa swutelice, þæt he soð God is,
214on anre godcundnysse mid þam ælmihtigan fæder and his
215acennedan sunu, æfre wunigende.
216Se þridda sinoð wæs eft, þæt wæs twa hund bisceopa,
217under þam gingran þeodosige,

page 96

218and hi fordemdon þær Nestorium, þone gedwolan,
219þe dyrstelice cwæð, þæt on Criste wæron twegen hadas,
220and hi his gedwyld adwæscton þær midealle,
221forþanþe se hælend is soðlice an Crist,
222on anum hade æfre wunigende. Se feorþa sinoð wæs eft,
223þæt wæs syx hund bisceopa and þrittig sacerda on Martianus
224tyman, þæs mæran caseres, se fordemde þone deoflican abbod,
225þe cwæð on his gedwylde, þæt ures drihtenes lichama and
226his godcundnes wære anes gecyndes.
227þa wearð he amansumod fram þam mycclan sinoþe, forðanþe
228se hælend is, swaswa ge gehyrdan oft, soð man and soð God,
229symle wunigende.
230Syððan wæron for oft oþre sinoþas wisra bisceopa, ac þas
231wæron þa fyrmestan, þe mid fulre lare þone
232geleafan getrymedon and þa gedwolan amansumedon, þe mid
233hyra gedwylde woldon awendan woh to rihte
234and adweligan mancyn fram hyra drihtne.
235þas feower sinoþas gesettan eac ealle þa þenunga to Godes
236þeowdome, to mæssan

page 98

237and to uhtsange and to eallum tydsangum.
238LATIN OMITTED
239Seofan tidsangas hi gesettan us to singanne dæghwamlice urum
240drihtne to lofe.
241Swaswa se witega Dauid on his witegunge cwæð: Seofan syþan,
242drihten, ic sæde þe lof on anum dæge for þinra doma
243rihtwisnyssa.
244Se forma tydsang is: Uhtsang mid þam æftersange,

page 100

245þonne primsang and Undernsang, Middægsang, Nonsang,
246æfensang, Nihtsang.
247þas seofon tidsangas ge sceolon syngan mid mycelre gymenne
248eowrum drihtene to lofe, dæghwamlice on
249cyricean; and eac swylce mæssian.
250Mycel bið, þæt man mote mæssian æne to anum dæge,
251þeahþe he hit oftor ne do, forðanþe ure drihten æne
252þrowade and us ealle alysde.
253Nu is seo mæsse gemynd his mæran þrowunge and mycclum mæg
254fremigan eallum mancynne, ægðer ge libbendum ge þam
255forðfarenum; swaswa we leornigað on bocum.
256Man sceal mæssian mid mycelre clænnysse.
257Swaswa þa haligan dydan, þe we hatað confessores .
258Sume hy wæran wunigende æfre butan wife, sume hy forleton
259þæt unalyfede þing.
260And mid clænnysse Criste þenedon.

page 102

261Swaswa þa canones us cyþað openlice: Quod nullus
262episcopus aut presbiter aut diaconus aut regularis canonicus
263habeat in domo sua mulierem manentem, nisi sit mater ei aut
264soror aut amita aut matertera, ex quibus nulla mala suspicio
265nascatur, et si quis aliter facit, degradetur ;
266þæt is on englisc, þæt nan bisceop ne nan mæssepreost,
267diacon oþþe mynsterpreost næbbe on his wununge ne on his
268huse wunigende ænigne wifman, butan hit syg his modor oþþe
269his swustor, faþu oþþe moddrige of þæm þe ne mage nan
270unhlysa aspringan, and gif he elles do, þolige his hades.
271þis eow þingð hefelyc, forþanþe ge habbað on gewunan
272eowre yrmþe, swa þæt eow sylfum þingð, þæt eow
273nan syn ne sy, þæt ge swa libban swaswa læwede men.
274Ge secgað for oft, þæt Petrus, se apostol, hæfde wif and
275cild; and we eac secgað, þæt he swa hæfde
276and sume þa oþre, þe þam hælende folgodan, hæfde wif and
277cild ær hyra gecyrrednysse; ac hi geswycon

page 104

278þæs, syþþan hi coman to Cristes lareowdome, and hyra
279æhta forleton and ealle woruldþing.
280We ne magan eow neadian, ac we myngiað eow, þæt ge
281clænnysse healdan, swaswa Cristes þegenas on godum
282geþingðum, Gode to cwemnysse, swaswa þa haligan dydon,
283þe we her beforan ræddon, þe eall hyra lif lyfedon on
284clænnysse.
285Be swylcum witegode se witega Isaisas, þus cweþende:
286Fratres, corde simplici audite uerba domini.
287Ego nunc his, qui custodierint sabbata mea et elegerint
288que ego uolui, et tenuerint foedus meum, dabo eis in
289domo mea et in muris meis locum et nomen melius a filiis
290et a filiabus ;
291Nomen sempiternum dabo eis quod non peribit ;
292God soðlice gecwæð, swaswa us sæde
293se witega: Ic forgife þam clænum, þe gecuran minne wyllan
294and min wed healdað and mine restendagas, þa beteran wununge
295on minum weallum; And on minum huse hi habbað wununge, and
296hyra nama bið toforan oþrum bearnum; Ecne naman ic him
297forgife.
298Be þisum ylcan cwæð Crist on his godspelle: Sunt eunuchi
299qui se castrauerunt propter regnum cęlorum ;

page 106

300þæt is: Ne mot nan man aceorfan his gesceapu him fram;
301se man þe hit deð, he bið amansumod.
302Ac Crist cwæð swaþeah, swaswa her cwyð on leden, þæt
303synd sume men, ge wel manega syndon, þe for heofenarice
304hisylfe geclænsiað fram fulre galnysse and beoð
305gastlice gehælede.
306Hi habbað hira lima and libbað on clænnysse.
307Hi ne beoð na forcorfene, ac Gode gecorene.
308þæt synd wæpmen and wifmen, þe wuniað on clænnysse.
309And hi sylfe offriað eall Gode on sægdnysse, ge on sawle ge
310on lichama.
311And hi sceolon habban þa selran wununge binnan Godes weallum
312and þone ecean naman on his huse mid him.
313Ne þurfan we us ondrædan þa deoflican costnunga.
314Ne magon hig us derian, gif hi us ne licyað.
315Swa mycel bið seo synn, þe man sylfwilles deð, swa mycel
316yfel hit bið.
317þæt us ne mæg derigan, gif us hwæt unþances of þam
318deofle becymð TORONTO CORPUS: be cymð þurh his
319TORONTO CORPUS: nis searo
320cræftas, slapende oþþe wæccende.
321Seofan hadas syndan gesette on bocum to Godes þenungum into
322Godes ciricean.

page 108

323An is hostiarius , oþer is lector , þridda
324Exorcista , feorþa acolitus , fifta subdiaconus ,
325sixta diaconus , se seofoþa presbyter siue episcopus .
326Hostiarius is dureweard, seþe cyricean cægan healt.
327Lector is rædere, seþe ræt on cyricean.
328Exorcista is halsiend, seþe ræt ofer þa witseocan men
329and ofer þa untruman.
330Acolitus is seþe tapor byrð æt Godes þenungum.
331Subdiaconus is underdiacon, seþe þone calic and þone
332disc byrð to þære mæssan and þenað þam diacone.
333Diaconus is gecweden þegn se þenað þæm
334mæssepreoste oþþe þæm bisceope æt þære mæssan and
335godspel ræt; He mot hlaf syllan and cild fullian.
336Gif mæssepreost bið butan diacone, he hæfð þone naman
337and he næfð þa þenunge.
338Presbyter is grecisc nama, þæt is on leden senior
339and on englisc ealdwita.

page 110

340Na þæt hi ealle ealde beon magon, þe to mæssepreoste
341gehadode synd, ac for þam wurðscype and þæm wisdome,
342þe hi habban scylan, hi synd swa gehatene.
343begen synd on anum hade, se bisceop and se mæssepreost, on
344þæm seofoþan hade.
345Swaswa us secgað bec.
346Begen hi mæssiað and mannum bodiað.
347And nis nan had geteald to þære haligan þenunge butan þa
348seofon hadas þe we fore secgað.
349Se bisceop is geset to maran bletsunge: cyricean to halgienne
350and to hadigenne preostas, men to bisceopigenne forþan hit
351wære to mænigfeald, gif ealle mæssepreostas þis don mostan.

page 112

352Ac him gedafenað, þæt hi hyra bisceope beon underþeodde
353and be his wissunge and wisdome libban, and
354he hi ofersceawige, swaswa his nama is gecweden, þæt is
355ofersceawiend on englisc, swa þæt he ofersceawige symle his
356underþeoddan and hi gerihtlæcean to rihtum þeawum æfre.
357Munuchad and mynecena, abbodas and abbedessan ne synd na
358getealde to þyssum seofon hadum.
359Forþonþe he mot mæssian, þeahþe he munuc ne sy, and munuc
360ne mot mæssian, butan he mæssepreost sy.
361Se forma bisceop wæs, þe God sylf gesette on þære ealdan
362æ, Aaron gehaten, Moyses broþor, þæs mæran heretogan.
363Ac he ne mæssade næfre.
364Forþanþe mæsse næs gyt geset, ærþanþe Crist sylf on
365þære niwan gecyðnysse gehalgode

page 114

366husel and het us eac swa don on his gemynde.
367Nu wæs seo mæsse asteald þurh urne hælend Crist.
368And se haliga Petrus gesette þone Canon, þe we te igitur
369cweþað.
370Ac se Aaron sceolde and þa ealdan bisceopas geoffrian Gode on
371þa ealdan wisan fearras and rammas and buccan and lambru and
372gehwylcu nytenu.
373Swaswa nan man ne moste on þissum dagon don.
374Forþanþe þa offrunga ealle getacnedan ures hælendes slege,
375þe wæs ofslagen for us and on rode gefæstnode for ure
376alysednysse.
377And he swa geendode þa ealdan gecyðnysse.
378þa moste se Aaron and his æftergengan niman him to
379gemacan, æfter Moyses æ an clæne mæden.
380Forþanþe nan ne moste of oþrum cynne becuman to þæm hade,
381þæt he bisceop wære, butan of Aarones cynne.

page 116

382Hi ne mostan na wifian on nanre wudewan ne on forlætenan wife
383be Godes leafe þa, ac on clænum mædene.
384And hyra clænnysse healdan, swa oft swa hi offredon þa
385ælican onsægdnysse.
386Hy moston þa wel wif habban, þæt ne wurde ateorad þæt
387mære bisceopcyn þe com of Aarone.
388Forþanþe nan cyn ne moste becuman to þam hade butan þæt
389an cyn, þe com of Aarone.
390And hit stod æfre swa on þære ealdan æ.
391Nu is seo ealde æ geendod æfter Cristes tocyme.
392And men ne ceosað nu on þissere nywan gecyðnysse of nanum
393bisceopcynne oþerne bisceop, ac of ælcum
394cynne, þær þær he clæne bið and on þeawum geþogen to
395Godes þenungum.
396Ge of munuchade ge of preosthade.

page 118

397Munuc wæs Martinus and mære bisceop.
398Munuc wæs Gregorius and mære bisceop and munuc wæs
399Cuthberhtus and mære bisceop and manega oþre of
400munuchade bisceopas wæron, swaswa we on bocum rædað.
401And of preosthade on clænnysse libbende manega wæron mære
402bisceopas and mæssepreostas, on mycelre drohtnunge, swyþe
403halige weras, þe we hatað confessores .
404Ac ge wyllað beon, þæs þe we wenað, of þam yfelan heape
405gehadedra manna, be þam þe se hælend cwæð
406on his haligan godspelle.
407He cwæð: Multi dicunt mihi in illo die, hoc est in die
408iudicii: DOMINE, DOMINE ET RELIQUA ; Manega cweþað to me on
409þam dæge: drihten, drihten leof, on urum life we worhtan
410manega tacna on þinum mæran naman and we eac witegodan
411þe to wurþmynte.
412þonne cweðe ic him anto: Ne cann ic eow to soþan.
413Gewitað fram me, ge unrihtwise

page 120

414wyrhtan, þærþær bið wop and toþa gristbitung.
415Seþe cild gefullað, se afligeð deoflu and he wyrcð wundra;
416and se witegað, seþe þam folce segð hyra sawle þearfe;
417ac mænig bið swaþeah swa mycelre þenunge swyþe unwyrðe,
418þonne he sylf bið unclæne, and se gehyrð æt Criste þone
419heardan dom, swaswa her segð on þyssum sceortum cwyde.
420Crist wat ealle þing, ac he ne oncnæwð swaþeah þa
421unclænan þegnas, þe ne gecwemdon him.
422Ne hi naht nabbað þæs þe him gelicige, ne hi swa fule ne
423motan into his fægeran healle, ac beoð utan belocene,
424to þam ecum witum.
425Ne mæg se yfela preost mid his yfelnysse, þeah he manslaga
426sy and manful on dædum, Godes þenunge befylan, ne þæt
427fulluht ne þa mæssan.

page 122

428Nu ge habbað gehyred be gehadedum mannum, ge on þære ealdan
429æ ge on þære niwan gecyðnysse.
430Nu mæg eaþe getimian, þæt eower sum ahsige, hwi he ne mote
431wif habban swaswa Aaron hæfde.
432þonne secge we eow, þæt seo ealde æ wæs ær Cristes
433tocyme eall getacniendlic.
434And hi þa wif hæfdon, forþonþe hi wæron flæsclice and hi
435næfre ne mæssedon and mihton þa swa don.
436Nu is seo ealde æ eall awend on oþer to gastlican þingum,
437and Godes þenas sceolon healdan hyra clænnysse, swaswa Crist
438hit astealde.
439And seþe nu hilt þa ealdan æ æfter Cristes tocyme on þa
440ealdan wisan, he bið amansumod, Canones us tæcað.

page 124

441Canones sind gecwedene rihte regulas, þe us gerihtlæcað.
442þæt seþe wuduwan genimð oþþe forlæten wif, þæt he
443næfre syþþan ne beo diacon oþþe mæssepreost.
444And seþe forliger gefremme, þolige his hades.
445We ne durran forsuwian, þæt we ne secgan eow þa haligan
446gesetnysse, þe ge healdan sculan.
447We beoð unscyldige, gif we hit secgað eow.
448Wite ge hwæþer ge wyllan eow gerihtlæcean.
449Se læweda man mot oþre siþe wifian, and geong wuduwe mot
450eft ceorlian ac nan

page 126

451ne mot swaþeah syllan him bletsunge, buton heo mæden sy,
452ac hy ma sceolan dædbote gedon for hyra ungehealtsumnysse.
453Ge sceolan beon gebocade, swaswa eower hade gebyrað.
454Mæssepreost sceal habban mæsseboc and pistelboc, and sangboc
455and rædingboc and saltere and handboc,
456and penitentialem and gerim.
457And þa beon wel gerihte.
458And clæne mæssereaf to Cristes þenungum.
459And sceolon singan sunnauhtan and mæsseuhtan æfre nigan
460repsas æfre mid nigon rædingon.
461Beo his calic geworht of ecum antimbre, gylden oþþe sylfren,
462glæsen oþþe tinen.
463Ne beo he na hyrnen ne huru treowen.
464Ne man ne mæssige mid nanum oþrum fæte butan mid

page 128

465þæm calice, þe Criste sig gehalgod.
466And his weofod beo clæne and wel gescryd æfre, na mid musa
467tyrdlum ne mid meoxe befiled.
468Hwi scyle ge waccran beon þonne woruldcræftan on eowrum
469gastlicum þeowdome to Godes þenungum, þæt
470ge næbban þa wæpnu to þam gastlicum gewinne þæt syndon
471þa þing, þe we nu eow sædon.
472Se smið him begyt slecge and anfylte and tangan and bylias
473and gehwylce tol.
474Se trywwyrhta eac æhxe and nafegar and ealle þa tol, þe to
475trywe gebyriað.
476Se fiscere and se hunta foresceawiað him mid net.
477And ealle woruldcræftige men wyrcað hira tol.
478And se eorðlingc ne erat, butan ne erigan cunne.
479Warniað eow nu, ic bidde, þæt ge beon beteran on eowrum
480gastlicum cræfte to Cristes þenungum, swaswa
481eow gebyrað þæt ge beon scylan, þonne

page 130

482þa woruldmen syndon on hyra woruldcræftum.
483Lange sceal leornian seþe læran sceal; gif he nele leornian,
484þæt he lareow beo, he sceal beon ealdor eft syþþan
485gedwyldes.
486Swaswa Crist sylf cwæð on sumum his godspelle: Cæcus si
487ceco ducatum prestat, ambo in foueam cadent ; Gif se blinda
488man bið þæs blindan ladþeow, þonne befeallað
489hi begen on sumne pytt gewiss.
490Blind bið se lareow, þe læran sceal folc, gif he læran ne
491cann, ne he leornian nele, ac mislæt his
492hyrimen and hine sylfne forðmid.
493Se mæssepreost sceal mannum bodian þone soþan geleafan and
494hym larspel secgan.
495And þa seocan geneosian.
496And cild fullian, swa raþe swa man raþost mæge hi geradian
497to fulluhte.
498Gif se seoca man gyrnað, þæt man hine smyrige, he do þonne
499anddetnysse ær þære smyrunge.

page 132

500And gif he eft gewyrpð æfter þære smyrunge, he mot wifes
501brucan and flæsces, gif he wile.
502On þære smyrunge bið synna forgifennys, him to beterunge,
503and ne bið na hadung.
504And gif he eft seoc bið, hine man eft smyrige.
505Sume preostas fægnieð, þonne men forðfarað and
506gegaderiað hy to þam lice, swaswa grædige hremmas,
507þærþær hy hold geseoð, on holte oþþe on felda.
508Ac hym gebyrað to bestandenne þa men, þe gehyrað to his
509hyrnysse into his mynstre.
510And he ne sceal na faran on oþres folgoþe to nanum lice,
511butan he gelaþod sy.

page 134

512Ne mot nan preost beon mangere oþþe gerefa.
513Ne drincan æt wynhuse, ne druncengeorn beon.
514Ne modig, ne gylpende, ne on his gyrlum ranc, ne mid golde
515geglenged ac mid godum þeawum.
516Ne he sacful ne beo.
517Ne he ceaste ne astyrige.
518Ac he sceal þa sacfullan gesibbian, gif he mæg.
519Ne mot he wæpnu werian ne to gefeohte faran.
520Forþonþe se canon us segd: gif he ofslagen bið on folces
521gefeohte oþþe for sumere ceaste, þæt man nateshwon ne mot
522him mæssian fore ne him fore gebiddan, ac bebyrian swaþeah.

page 136

523Nu secgað sume preostas, þæt Petrus hæfde sweord, þaþa
524he of asloh þæs forscyldigan eare, þæs iudeiscan þeowan,
525swaswa we rædað be þam.
526Ac we secgað to soþan, þæt se soðfæsta hælend, ne þa
527þe him folgodon, ne ferdon gewæpnode, ne mid nanum wige.
528Swaswa hit awriten is be him, þæt he ferde geond land,
529geleafan tæcende, god wyrcende and þa witseocan gehælde
530and ealle untrumnysse and adla gehælde
531He ne flat, ne ne hrymde, ne mid hreðnysse ne ferde, ac wæs
532gebroht to slege swaswa unscæþþig lamb.
533þær com þeah færlice, swaswa hit gecweden is: domine;
534ecce gladii duo hic ; Drihten leof, her syndon
535twa sweord.

page 138

536Gif þær ær wæron, ne cwædon hi na swa.
537And gif Petrus moste þone man fulslean, þonne ne hete Crist
538hine behydan þa sweord.
539He cwæð: Do þæt sweord into þære scæþe.
540He nolde geyfelian þam arleasan menn, ac he hine sona
541gehælde on besettum eare.
542Se ylca Petrus eft, þe þæt eare of asloh, wearð ahangen on
543rode for þæs hælendes geleafan, and he ongean ne wan, naþer
544ne mid worde ne mid dæde.

page 140

545We ne moton beon ymbe mannes deað.
546þeahþe he manslaga beo oþþe morð gefremede oþþe mycel
547þeofman, swaþeah we ne scylan him deað getæcean.
548Na we ne motan deman ymbe þæt.
549Ac tæcean þa læwedan men him lif oþþe deað, þæt we ne
550forleasan þa liþan unscæþþignysse.
551We ne furþon ne moton ænne fugel acwellan.
552Na we ne motan huntian ne hafecaras beon.

page 142

553Ac we motan fixian and swa us fodan begytan.
554Forþanþe nan hunta næs næfre halig, ac fisceras wæron,
555swaswa Petrus wæs and his broþor Andreas and oþra gehwylce.
556Ne mot nan mæssepreost werian munucscrud on symbel, buton he
557þone had sylf habban wylle.
558Na he ne mot beon mid læwedum scrude gescryd.
559Ne wer mid wifscrude, ne wif mid weres scrude.
560Gif hit hwa þonne deð, he bið amansumod.
561Ne sceal nan preost his cyricean forlætan, þe he to gehadod
562bið and to oþere faran, buton his bisceop lyfe for sumon
563gesceade.
564Na he ne mot habban twa mynstre ætgædere, forþanþe he ne
565mæg gefyllan þone fullan þeowdom on ægðrum
566stede on an togædere.
567Ne nan uncuð preost, þe cymð of oþre scyre, ne mot mæssan
568syngan ne mynster underfon butan þæs bisceopes leafe, þe on
569þære scyre bið.
570And se bisceop gewite, þæt he þæs wyrþe sy, þilæsþe he
571fare mid ænigum facne.
572We biddað eow preostas: beoð þyses gemyndig, þæs þe ge
573nu gehyrdon.

page 144

574þæt ge habban þa mede, þe ure hælend behet þam, þe him
575þeniað.
576LATIN OMITTED