1B14.44

page 444

    
2Ðegenes lagu: Ðegenlagu is, þæt he sy his bocrihtes
3wyrðe & þæt he ðreo ðinc of his lande do: fyrdfæreld
4& burhbote & brycgeweorc.
5Eac of manegum landum mare landriht arist to cyniges gebanne,
6swilce is deorhege to cyniges hame &
7scorp to friðscipe & sæweard & heafodweard & fyrdweard,
8ælmesfeoh & cyricsceat & mænige oðere mistlice ðingc.

page 445

9Geneates riht: Geneatriht is mistlic be ðam ðe on lande
10stænt: on sumon he sceal landgafol syllan
11& gærsswyn on geare & ridan & auerian & lade lædan, wyrcan
12& hlaford feormian, ripan & mawan, deorhege heawan & sæte
13haldan, bytlian & burh hegegian, nigefaran to tune feccan,
14cyricsceat syllan & ælmesfeoh, heafodwearde healdan
15& horswearde, ærendian fyr swa nyr,
16swa hwyder swa him mon to tæcð.
17Kotsetlan riht: Kotesetlan riht be ðam ðe on lande stent:
18on sumon he sceal ælce Mondæge ofer geares fyrst his
19laforde wyrcan oðð III dagas ælcre wucan on hærfest.

page 446

20Ne ðearf he landgafol syllan.
21Him gebyriað V æceres to habbanne; mare, gyf hit on lande
22ðeaw sy; & to lytel hit bið, beo hit a
23læsse; forðan his weorc sceal beon oftræde.
24Sylle his heorðpænig on halgan Ðunresdæg, ealswa ælcan
25frigean men gebyreð, & werige his hlafordes
26inland, gif him man beode, æt sæwearde & æt cyniges
27deorhege & æt swilcan ðingan, swilc his mæð sy,
28& sylle his cyricsceat to Martinus mæssan.
29Gebures gerihte: Geburgerihta syn mislice: gehwar hy syn
30hefige, gehwar eac medeme; On sumen lande is,
31þæt he sceal wyrcan to wicweorce II dagas swilc weorc,
32swilc him man tæcð, ofer geares fyrst
33ælcre wucan, & on hærfest III dagas to wicweorce & of
34Candelmæsse oð Eastran III; gif he aferað, ne
35ðearf he wyrcan ða hwile ðe his hors ute bið.
36He sceal syllan on Michaeles mæssedæig X gafolpænigas &
37on Martinus mæssedæg XXIII systra beres
38& II henfugelas, on Eastran an geong sceap oððe II pænigas.

page 447

39& he sceal licgan of Martinus mæssan oð Eastran æt
40hlafordes falde, swa oft swa him to gebæð.
41& of ðam timan, ðe man ærest ereð, oð Martinus mæssan
42he sceal ælcre wucan erian I æcer & ræcan sylf
43þæt sæd on hlafordes berne; toeacan ðam III æceras to
44bene & II to gærsyrðe; gyf he maran gærses
45beðyrfe, ðonne earnige ðæs, swa him man ðafige.
46his gauolyrðe III æceras erige & sawe of his aganum berne,
47& sylle his heorðpænig & twegen & twegen fedan ænne
48headorhund & ælc gebur sylle VI hlafas ðam
49inswane , ðonne he his heorde to mæstene drife.
50On ðam sylfum lande, ðe ðeos ræden on stænt, gebure
51gebyreð, þæt him man to landsetene sylle II oxan
52& I cu & VI sceap & VII æceras gesawene on his gyrde
53landes; Forðige ofer þæt gear ealle gerihtu,
54ðe him to gebyrigean; & sylle him man tol to his weorce &
55andlaman to his huse; ðonne him forðsið gebyrige,
56gyme his hlaford ðæs he læfe.
57Ðeos landlagu stænt on suman lande; gehwar hit is, swa

page 448

58ic ær cwæð, hefigre, gehwar eac leohtre; forðam
59ealle landsida ne syn gelice.
60On sumen landa gebur sceal syllan huniggafol, on suman
61metegafol, on suman ealugafol.
62Hede se ðe scire healde, þæt he wite a, hwæt
63ealdlandræden sy & hwæt ðeode ðeaw.
64Be ðam ðe beon bewitað: Beoceorle gebyreð, gif he
65gafolheorde healt, þæt he sylle ðonne lande
66geræd beo.
67Mid us is geræd, þæt he sylle V sustras huniges to gafole;
68on suman landum gebyreð mare gafolræden.
69Eac he sceal hwiltidum geara beon on manegum weorcum to
70hlafordes willan, toeacan benyrðe & bedripe & mædmæwecte.
71& gyf he wel gelend bið, he sceal beon gehorsad, þæt he
72mæge to hlafordes seame þæt syllan oððe sylf lædan,
73swæðer him man tæce.
74& fela ðinga swa gerad man sceal don; eal ic nu atellan ne
75mæig.
76ðonne him forðsið gebyrige, hede se hlaford ðæs he
77læfe, bute hwet friges sy.
78Gafolswane: Gafolswane gebyreð, þæt he sylle his slyht,
79be

page 449

80ðam ðe on lande stent.
81On manegum landum stent, þæt he sylle ælce geare XV swyn
82to sticunge, X ealde & V gynge hæbbe sylf, þæt he ofer
83þæt arære; on manegum landum gebyreð deopre swanriht.
84Gyme eac swan, þæt he æfter sticunge his slyhtswyn wel
85behweorfe sæncge: ðonne bið he ful wel gewyrces wyrðe.
86Eac he sceal beon swa ic ær be beocere cwæð oftræde to
87gehwilcon weorce & gehorsad to hlafordes neode.
88ðeow swan & ðeow beocere æfter forðsiðe be anre lage
89wyrðe.
90Be æhteswane: Æhteswane, ðe inheorde healt, gebyreð
91stifearh & his gewirce, ðonne he spic behworfen hæfð,
92& elles ða gerihtu, ðe ðeowan men to gebyriað.
93Be manna metsunge: Anan esne gebyreð to metsunge XII pund
94godes cornes & II scipæteras & I god metecu,
95wuduræden be landside.

page 450

96Be wifmonna metsunge: Ðeowan wifmen: VIII pund cornes to
97mete, I sceap oððe III pænigas to wintersufle,
98I syster beana to længtensufle, hwæig on sumera oððe
99I pænig.
100Eallum æhtemannum gebyreð Midwintres feorm & Eastorfeorm,
101sulhæcer & hærfesthandful toeacan heora
102nydrihte.
103Be folgeran: Folgere gebyreð, þæt he on twelf monðum II
104æceras geearnige, oðerne gesawene & oðerne unsawene;
105sædige sylf ðæne; & his mete & scoung &
106glofung him gebyreð.
107Gyf he mare geearnian mæig, him bið sylfum fremu.
108Be sædere: Sædere gebyreð, þæt he hæbbe ælces
109sædcynnes ænne leap fulne, ðonne he ælc sæd wel
110gesawen hæbbe ofer geares fyrst.
111Be oxanhyrde: Oxanhyrde mot læswian II oxan oððe ma mid
112hlafordes heorde on gemænre læse be his ealdormannes
113gewitnesse; earnian mid ðam scos & glofa him sylfum.
114& his metecu mot gan mid hlafordes oxan.
115Be kuhyrde: Cuhyrde gebyreð, þæt he hæbbe ealdre cu
116meolc VII niht, syððan heo nige cealfod

page 451

117hæfð, & frymetlinge bystinge XIIII niht.
118& ga his metecu mid hlafordes cu.
119Be sceaphyrdan: Sceaphyrdes riht is, þæt he hæbbe twelf
120nihta dingan to Middanwintra & I lamb of
121geares geogeðe & I belflys & his heorde meolc VII niht
122æfter emnihtes dæge & blede fulle hweges oððe syringe
123ealne sumor.
124Be gathyrde: Gathyrde gebyreð his heorde meolc ofer
125Martinus mæssedæig, & ær ðam his dæl hwæges
126& I ticcen of geares geogoðe, gif he his heorde wel begymeð.
127Be cyswyrhte: Cyswyrhtan gebyreð hundred cyse, & þæt heo
128of wringhwæge buteran macige to hlafordes beode;
129& hæbbe hire ða syringe ealle butan ðæs hyrdes dæle.
130Be berebrytte: Berebryttan gebyreð corngebrot on hærfeste
131æt bernes dure, gif him his ealdorman ann, & he hit mid
132getrywðan geearnoð.
133Be bydele: Bydele gebyrað, þæt he for his wycan sy
134weorces frigra ðonne oðer man; forðan he sceal
135beon oftræde.
136Eac him gebyreð sum landsticce for his geswince.

page 452

137Be wudewarde: Wuduwearde gebyreð ælc windfylled treow.
138Hæigwerde gebyreð, þæt man his geswinces lean gecnawe on
139ðam endum, ðe to etenlæse licgan; forðam
140he mæig wenan, gyf he þæt ær forgymð, þæt him man.
141THE SCRIBE OF MS B HAS SKIPPED ONE LINE
142hwilces landsticces geann, þæt sceal beon mid folcrihte
143nyhst etenlæse; forðam gyf he for slæwðe his hlafordes
144forgymð, ne bið his agnum wel geborgen, gif hit
145bið ðus funden.
146Gyf he ðonne eal wel gefriðað, he healdan sceal, ðonne
147bið he godes leanes ful wel wyrðe.
148Landlaga syn mistlice, swa ic ær beforan sæde.
149Ne sette we na ðas gerihtu ofer ealle ðeoda, ðe we ær
150beforan ymbe spræcon; ac we cyðað, hwæt ðeaw
151is ðær ðær us cuð is.
152Gyf we selre geleorniað, þæt we willað georne lufian &
153healdon, be ðære ðede ðeawe, ðe we ðænne onwuniað.
154Forðam laga sceal on leode luflice leornian, lof se ðe on
155lande sylf nele leosan.
156Feola syndon folcgerihtu: on sumre ðeode gebyreð
157winterfeorm, Easterfeorm, bendform for ripe, gytfeorm for
158yrðe, mæðmed, hreacmete, æt wudulade

page 453

159wæntreow, æt cornlade hreaccopp & fela ðinga,
160ðe ic getellan ne mæig.
161ðis is ðeah myngung manna biwiste & eal þæt ic ær
162beforan ymberehte.
163
164B14.45

page 453

    
165Be gesceadwisan gerefan: Se scadwis gerefa sceal ægðær
166witan ge hlafordes landriht ge folces gerihtu,
167beðam ðe hit of ealddagum witan geræddan, & ælcre
168tilðan timan, ðe to tune belimpð.
169forðam on manegum landum tilð bið redre ðonne on oðrum:
170ge yrðe tima hrædra, ge mæda rædran, ge winterdun eac swa,
171ge gehwilc oðer tilð.
172Hede se ðe scire healde, þæt he friðige & forðige ælce
173be ðam ðe hit selest sy; & be ðam he eac mot,
174ðe hine weder wisað.
175He sceal snotorlice smeagean & georne ðurhsmugan ealle ða
176ðing, ðe hlaforde magan to ræde.
177Gyf he wel aginnan wile, ne mæig he sleac beon ne to
178oferhydig; ac he mot ægðer witan ge læsse ge
179mare, ge betere ge mætre ðæs ðe to tune belimpð, ge on
180tune ge on dune, ge on wuda ge on wætere, ge
181on felda ge on falde, ge inne ge ute.
182Forðam to soðe ic secge: oferhogie he oððe forgyme ða
183ðing to beganne & to bewitanne, ðe to scipene oððe
184to odene belimpað, sona hit wyrð on berne þæt to
185ðam belimpað.
186Ac ic lære, þæt he do, swa ic ær cwæð: gyme ægðer ge
187ðæs selran ge þæs sæmran, þæt naðor ne misfare,
188gyf he wealdan mæge, ne corn ne sceaf, ne flæsc ne
189flotsmeru, ne cyse ne cyslyb, ne nan ðera ðinga
190ðe æfra to note mæge.
191Swa sceal god scyrman his hlafordes healdan, do ymbe his
192agen, swa swa he wylle.

page 454

193A swa he gecneordra swa bið he weorðra, gyf he wið witan
194hafoð his wisan gemæne.
195Symle he sceal his hyrmen scyrpan mid manunge to hlafordes
196neode & him eac leanian be ðam ðe hy earnian.
197Ne læte he næfre his hyrmen hyne oferwealdan, ac wille he
198ælcne mid hlafordes creafte & mid folcrihte:
199selre him his æfre of folgoðe ðonne on, gyf hine magan
200wyldan ða ðe he scolde wealdan; ne bið
201hit hlaforde ræd, þæt he þæt ðafige.
202æfre he mæig findan, on ðam he mæig nyt beon & ða nytte
203don, ðe him fylstan scylan; huru is mæst neod,
204þæt he asece, hu he yrde mæge fyrme geforðian, ðonne
205ðæs tima sy.
206Me mæig in Maio & Iunio & Iulio on sumera fealgian,
207myxendincgan ut dragan, lochyrdla tilian, sceap scyran,
208bytlian, boteatan, tynan, tymbrian, wudian, weodian,
209faldian, fiscwer & mylne macian.
210on hærfeste ripan, in Agusto & Septembri & Octobri mawan,
211wad spittan, fela tilða ham gæderian, ðacian, ðecgan
212& fald weoxian, scipena behweorfan & hlosan eac swa,
213ær to tune to stið winter cume,
214& eac yrðe georne forðian.
215on wintra erian & in miclum gefyrstum timber cleofan, orceard
216ræran & mænige inweorc wyrcean, ðerhsan, wudu cleofan,
217hryðeran styllan, swyn stigian, on odene
218cylne macian ofn & aste & fela ðinga sceal to tune
219ge eac henna hrost.
220on længtene eregian & impian, beana sawan, wingeard settan,
221dician, deorhege heawan & raðe æfter
222ðam, gif hit mot gewiderian, mederan settan, linsed sawan,
223wadsæd eac swa, wyrtun plantian & fela ðinga;
224ic eal geteallan ne mæig, þæt god scirman bycgan sceal.
225A he mæig findan, hwæt he mæig on byrig betan ne ðearf he
226na unnyt beon, ðonne he ðær

page 455

227binnan bið: oððe hus godian, rihtan & weoxian & grep
228hegian, dicsceard betan, hegas godian, weod wyrtwalian,
229betweox husan bricgian, beoddian, bencian, horsan styllan,
230flor feormian oððe synnes sum ðing ðe to nyte mæge.
231He sceal fela tola to tune tilian & fela andlomena to husan
232habban.
233æcse, adsan, bil, byrse, scafan, sage, cimbiren, tigehoc,
234næfebor, mattuc, ippingiren, scear, culter & eac gadiren,
235siðe, sicol, weodhoc, spade, scofle, wadspitel, bærwan,
236besman, bytel, race, geafle, hlædre, horscamb & sceara,
237fyrtange, wæipundern.
238& fela towtola: flexlinan, spinle, reol, gearnwindan,
239stodlan, lorgas, presse, pihten, timplean,
240wifte, wefle, wulcamb, cip, amb, crancstæf, sceaðele,
241seamsticcan, scearra, nædle, slic.
242And gif he smeawyrhtan hæfð, ðam he sceal to tolan
243fylstan: mylewerde, sutere, leodgotan & oðran wyrhtan
244ælc weorc sylf wisað, hwæt him to gebyreð; nis
245ænig man, þæt atellan mæge ða tol ealle,
246ðe man habban sceal.
247Man sceal habban wængewædu, sulhgesidu, egeðgetigu & fela
248ðinga, ðe ic nu genæmnian ne can, ge eac
249mete, awel & to odene fligel & andlamena fela: hwer, lead,
250cytel, hlædel, pannan, crocca, brandiren, dixas, stelmelas,
251cyfa, cyflas, cyrne, cysfæt, ceodan,
252wilian, windlas, systras, syfa, sædleap,
253hriddel, hersyfe, tæmespilan, fanna, trogas, æscena, hyfa,
254hunigbinna, beorbydene, bæðfæt, beodas,
255butas, bleda, melas, cuppan, seohhan, candelstafas, sealtfæt,
256sticfodder, piperhorn, cyste, mydercan, bearmteage, hlydan,
257sceamelas, stolas, læflas, leohtfæt, blacern, cyllan,
258sapbox, camb, yrsebinne, fodderhec, fyrgebeorh, meluhudern,
259ælhyde, ofnrace, mexscofle.
260Hit is earfoðe eall to gesecganne, þæt se beðencan sceal,
261ðe scire healt.
262Ne sceolde he nan ðing forgyman, ðe æfre to note mehte: ne
263forða musfellan ne, þæt git læsse is, to hæpsan pinn.
264Fela sceal to holdan hames gerefan & to gemetfæstan manna
265hyrde.
266Ic gecende be ðam ðe ic cuðe; se ðe bet cunne, gecyðe
267his mare.