1B3.4.20

page 107

2

ASSUMPTIO S. MARIÆ VIRGINIS.

    
3Men ða leofostan, hwæt nu anra manna gehwylcne ic myngie &
4lære, ge weras ge wif, ge geonge ge ealde,
5ge snottre ge unwise, ge þa welegan ge þa þearfan,
6þæt anra gehwylc hine sylfne sceawige & ongyte,
7& swa hwæt swa he on mycclum gyltum oþþe on
8medmycclum gefremede, þæt he þonne hrædlice gecyrre
9to þam selran & to þon soþan læcedome.
10þonne magon we us God ælmihtigne mildne habban; forþon þe
11Drihten wile þæt ealle men syn hale & gesunde,
12& to þon soþan andgite gecyrran.
13swa Dauid cwæþ, þa eaðmodan heortan & þa forhtgendan &
14þa bifigendan & þa cwacigendan & þa ondrædendan
15heora Scyppend, ne forhogaþ þa næfre God ne ne
16forsyhþ; ah heora bena he gehyreð, þonne hie
17to him cleopiað & him are biddaþ.
18Magon we þonne nu geseon & oncnawan & swiþe gearelice
19ongeotan þæt þisses middangeardes ende swiþe
20neah is, & manige frecnessa æteowde & manna wohdæda &
21wonessa swiþe gemonigfealdode.
22& we fram dæge to oþrum geaxiað ungecyndelico witu &
23ungecynelice deaþas geond þeodland to mannum
24cumene, & we oft ongytaþ þæt ariseþ þeod wiþ þeode, &
25ungelimplico gefeoht on wolicum dædum.
26& we gehyraþ oft secggan gelome worldricra manna deaþ þe
27heora lif mannum leof wære, & þuhte fæger
28& wlitig heora lif & wynsumlic.
29swa we eac geaxiað mislice adla on manegum stowum

page 109

30middangeardes, & hungras wexende.
31& manig yfel we geaxiaþ her on life gelomlician & wæstmian,
32& nænig god awunigende & ealle worldlicu
33þing swiþe synlicu; & colaþ to swiþe seo lufu þe we
34to urum Hælende habban sceoldan, & þa godan
35weorc we anforlætaþ þe we for ure saule hæle began
36sceoldan.
37þas tacno þyslico syndon þe ic nu hwile big sægde be
38þisse worlde earfoþnessum & fræcnessum, swa
39Crist sylfa his geongrum sægde, þæt þas þing ealle
40geweorþan sceoldan ær þisse worlde ende.
41Uton we nu efstan ealle mægene godra weorca, & geornfulle
42beon Godes miltsa; nu we ongeotan magon
43þæt þis nealæcþ worlde forwyrde; forþon ic myngige &
44manige manna gehwylcne þæt he his agene dæda
45georne smeage, þæt he her on worlde for Gode rihtlice
46lifge, & on gesyhþe þæs hehstan Cyninges.
47Syn we rummode þearfendum mannum, & earmum ælmesgeorne, swa
48us God sylfa bebead þæt we soþe sibbe
49heoldan, & geþwærnesse us betweonon habban.
50& þa men þe bearn habban læran hie þam rihtne þeodscipe,
51& him tæcean lifes weg & rihtne gang to
52heofonum.
53& gif hie on ænigum dæle wolice libban heora lif, syn hie
54þonne sona from heora wonessum onwende,
55& fram heora unrihtum oncyrron.
56þæt we þurh þæt ealle Gode lician, swa hit eallum
57geleaffullum folcum beboden standeþ, næs na þam
58anum þe Gode sylfum underþeodde syndon mid myclum hadum,
59biscopas, & cyningas, and mæssepreostas,
60& heahdiaconas, ac eac soþlice hit is beboden subdiaconum
61& munecum.
62& is eallum mannum nedþearf & nytlic þæt hie heora fulwiht
63hadas wel gehealdan.
64Ne beo nænig man her on worldrice on his geþohte to modig,
65ne on his lichoman to strang, ne niþa
66to georn, ne bealwes to beald, ne bregda to full, ne inwit
67to leof, ne wrohtas to webgenne, ne searo to renigenne.
68Ne þearf þæs nan man wenan þæt his lichama mote oþþe
69mæge þa synbyrþenna on eorþscrafe gebetan.
70ah he þær on moldan gemolsnaþ & þær wyrde bideþ, hwonne
71se ælmihtiga God wille þisse worlde ende
72gewyricean, & þonne he his byrnsweord getyhþ & þas world
73ealle þurhslyhþ, & þa lichoman þurh sceoteð,
74& þysne middangeard tocleofeð, & þa deadan
75upastandaþ, biþ þonne se flæschoma ascyred swa glæs,

page 111

76ne mæg ðæs unrihtes beon awiht bedigled.
77Forðon we habbaþ nedþearfe þæt we to lange ne fylgeon
78unwitweorcum, ac we sceolan us geearnian þa
79siblecan wæra Godes & manna, & þone rihtan geleafan
80fæste staðelian on urum heortum þæt he ðær
81wunian mæge & mote, & þær growan & blowan.
82& we sceolan andettan þa soþan geleaffulnesse on urne
83Drihten Hælende Crist, & on his ðone acendan
84Suna & on ðone Halgan Gast, se is efnece Fæder & Sunu.
85& we sceolan gehyhtan on Godes þa gehalgodan cyricean & on
86ða rihtgelefedan, & we sceolan gelyfan
87synna forlætnessa & lichoman æristes on domos dæg.
88& we sceolan gelefan on þæt ece lif & on þæt heofonlice
89rice þæt is gehaten eallum þe nu syndan
90godes wyrhtan.
91þis is se rihta geleafa þe æghwylcum men gebyreð þæt he
92wel gehealde & gelæste; forðon þe nan wyrhta
93ne mæg god weorc wyrcean for Gode buton lufon &
94geleafan.
95& us is mycel nedþearf þæt we us sylfe geðencean &
96gemunan & þonne geornost, þonne we gehyron Godes
97bec us beforan reccean & rædan, & godspell secggean, &
98his wuldorþrymmas mannum cyþan.
99Vton we þonne georne teolian þæt we æfter þon ðe
100beteran syn & þe selran for ðære lare ðe we oft
101gehyrdon.
102Eala men ða leofostan, hwæt we sceolan geðencean þæt we
103ne lufian to swyþe þæt þæt we forlæton sceolan,
104ne þæt huru ne forlætan to swiþe þæt we ecelice
105habban sceolan.
106Geseo we nu forgeorne þæt nænig man on worlde toðæs
107mycelne welan nafað, ne toðon modelico gestreon
108her on worlde þæt se on medmycclum fyrste to ende ne
109cume, & þæt eall forlæteð þæt him ær her
110on worlde wynsumlic wæs, & leofost to agenne & to hæbbene.
111& se man næfre toðon leof ne bið his nehmagum & his
112worldfreondum, ne heora nan hine to þæs swiþe
113ne lufað þæt he sona syþþan ne sy onscungend, seoþþan
114se lichoma & se gast gedælde beoþ, & þincð
115his neawist laþlico & unfæger.
116Nis þæt nan wundor; hwæt biþ hit la elles buton flæsc
117seoððan se ecea dæl ofbiþ, þæt is seo sawl?
118hwæt biþ la elles seo laf buton wyrma mete?
119Hwær beoþ þonne his welan & his wista?
120hwær beoð þonne his wlencea & his anmedlan?
121hwær beoþ þonne his idlan gescyrplan?
122hwær beoþ ðonne þa glengeas & þa mycclan gegyrelan þe
123he þone lichoman ær mid frætwode?

page 113

124hwær cumaþ þonne his willan & his fyrenlustas ðe he her
125on worlde beeode?
126Hwæt he þonne sceal mid his saule anre Gode ælmihtigum
127riht agyldan, ealles þæs þe he her on worlde
128to wommum gefremede.
129Magon we nu geheran secggean be sumum welegum
130men & worldricum; ahte he on þysse worlde mycelne
131welan & swiðe modelico gestreon & manigfealde, & on
132wynsumnesse lifde.
133þa gelamp him þæt his lif wearð geendod, & færlic ende
134onbecom þisses lænan lifæs.
135þa wæs his nehmaga sum & his worldfreonda þæt hine swyþor
136lufode þonne ænig oþor man, he þa for þære
137langunga & for þære geomrunga þæs oþres deaþes
138leng on þam lande gewunian ne mihte.
139ac he unrotmod of his cyþþe gewat & of his earde, & on
140þæm lande feala wintra wunode, & him næfre
141seo langung ne geteorode, ac hine swiþe gehyrde & þreade.
142þa ongan hine eft langian on his cyþþe, forþon þæt he
143wolde geseon eft & sceawian þa byrgenne, hwylc
144se wære þe he oft ær mid wlite & mid wæstmum
145fægerne m geseah.
146him þa tocleopodan þæs deadan ban, & þus cwædon, Forhwon
147come þu hider us to sceawigenne?
148Nu þu miht her geseon moldan dæl & wyrmes lafe, þær þu
149ær gesawe godweb mid golde gefagod.
150Sceawa þær nu dust & dryge ban, þær þær þu ær gesawe
151æfter flæsclicre gecynde fægre leomu on to
152seonne.
153Eala þu freond & min mæg, gemyne þis & ongyt þe sylfne,
154þæt þu eart nu þæt ic wæs io; & þu byst æfter
155fæce þæt ic nu eom.
156gemyne þis & oncnaw þæt mine welan þe ic io hæfde syndon
157ealle gewitene & gedrorene, & mine herewic
158syndon gebrosnode & gemolsnode.
159Ac onwend þe to þe sylfum & þine heortan to ræde gecyr &
160geearna þæt þine bena syn Gode ælmihtigum andfenge.
161He þa swa geomor, & swa gnorngende, gewat from þære
162dustsceawunga & hine þa onwende from ealre þisse
163worlde begangum, & he ongan godes lof leornian & þæt
164læran, & þæt gastlice mægen lufian; & þurh
165þæt geearnode him þa gife Haliges Gastes, & eac þæs
166oþres saule of witum generede, & of tintregum alesde.
167Magon we þonne, men þa leofestan, us þis to gemyndum
168habban, & þas

page 115

169bysene on urum heortum staþelian,
170þæt we ne sceolan lufian worlde glengas to swiþe ne
171þysne middangeard; forþon þe þeos world
172is eall forwordenlic & gedrofenlic & gebrosnodlic &
173feallendlic, & þeos world is eall gewiten.
174Uton we þonne geornlice geþencean & oncnawan be þyses
175middangeardes fruman, þa he ærest gesceapen
176wæs, þa wæs he ealre fægernesse full, & he wæs
177blowende on him sylfum on swyþe manigfealdre wynsumnesse,
178& on þa tid wæs mannum leof ofor eorþan, &
179halwende & heal smyltnes wæs ofor eorþan, & sibba
180genihtsumnes, & tuddres æþelnes.
181& þes middangeard wæs on þa tid toþon fæger & toþon
182wynsumlic , þæt he teah men to him þurh his wlite
183& þurh his fægernesse & wynsumnesse fram þon
184ælmihtegan Gode; & þa he þus fæger wæs & þus wynsum,
185þa wisnode he on Cristes haligra heortum, & is nu on
186urum heortum blowende swa hit gedafen is.
187Nu is æghwonon hream & wop, nu is heaf æghwonon, & sibbe
188tolesnes, nu is æghwonon yfel & slege,
189& æghwonon þes middangeard flyhþ from us mid mycelre
190biternesse, & we him fleondum fylgeaþ & hine
191feallendne lufiaþ.
192Hwæt we on þam gecnawan magon þæt þeos world is scyndende
193& heononweard.
194Uton we þonne þæs geþencean, þa hwile þe we magon
195and moton, þæt we us georne to gode þydon.
196Uton urum Drihtne hyran georne, & him þancas secggan ealra
197his geofena, & ealra his miltsa, & ealra
198his eaðmodnessa & fremsumnessa þe he wiþ us æfre
199gecyþde, þæm heofonlican Cininge þe leofað &
200rixaþ on worlda world aa buton ende on ecnesse, AMEN.