1B1.2.36

page 255

2

XXIX

3

VIII. X. KALENDAS SEPTEMBRIS. ASSUMPTIO SANCTE MARIE
4UIRGINIS.

5    Men ða leofostan hwilon ær we rehton eow ðone
6pistol þe se halga Hieronimus sette be forðsiðe þære
7eadigan Marian cristes meder. þurh þone he adwæscte ða
8dwollican gesetnysse þe samlærede men sædon be hire
9forðsiðe;
10Nu wylle we eow gereccan be ðam halgum godspelle þe man æt
11ðyssere mæssan eow ætforan rædde;
12Intrauit iesus in quoddam castellum. Et reliqua; Se
13hælend becom into sumere eaðelican byrig. and
14an wif martha gehaten gelaðode hine to hire gereorde;
15Heo hæfde ane swustor maria gehaten. seo sæt æt drihtnes
16fotum and georne his lare hlyste;
17Martha soðlice hire swuster eode carful. ymbe drihtnes
18ðenunge;
19Heo stod ða. and cwæð to ðam hælende;
20Drihten. hwi nelt ðu hogian. þæt min swuster me læt ana
21ðenian. sege hire þæt heo me fylste;
22Hire andwyrde se hælend and cwæð;
23Martha. martha. þu eart carful and bysig ymbe fela ðing;
24Witodlice. an ðing is nydbehof;
25Maria geceas þone selestan dæl. se ðe ne bið hire næfre
26ætbroden;
27Ne sprecð þis godspel nan ðing sinderlice be cristes meder.
28ac man hit ræt swa ðeah gewunelice æt hire mæssan. for
29ðære cyrclican gesetnysse;
30Augustinus trahtnunge we fyliað. on

page 256

31ðisum godspelle;
32Þas twa wif martha and maria wæron þæs lazares geswustru.
33þe se hælend of deaðe arærde;
34Hi wæron butu þæs hælendes leorningmen. and he gelome æt
35heora huse hine gereordode. mid his leorningcnihtum;
36Hi wæron gecyrrede to micelre eawfæstnysse ðurh cristes
37lare and wundrum. and he hi lufode for ði;
38He underfeng heora ðenunga. for ðan ðe he hæfde soðne
39lichaman. þurh ðone ðe him hingrode and þyrste;
40Se underfeng þæra wimmanna þenunge. in ðam huse. se ðe on
41westene wæs fram englum gereordod;
42Nu ðencað sume men þæt ða wif wæron gesælige. þæt hi
43swilcne cuman underfengon;
44Soð þæt is. gesælige hi wæron. ac swa ðeah ne ðurfe we
45ceorian þæt drihten nis lichamlice on ðyssere worulde
46wunigende nu swa swa he ða wæs. þæt we mihton hine eac
47to us gelaðian. for ðan ðe he cwæð. swa hwæt swa ge doð
48on minum naman anum ðam læstum. þæt ge doð me sylfum;
49Martha wæs swiðe bysig ymbe drihtnes ðenunge. and hire
50swuster maria sæt stille æt drihtnes fotum.
51heorcnigende his lare;
52Martha swanc. and maria sæt æmtig; On ðisum twam
53geswustrum wæron getacnode twa lif. þis geswincfulle ðe
54we on wuniað. and þæt ece ðe we gewilniað;
55Þæt an lif is wræcful. þæt oðer is eadig;
56An hwilwendlic. oðer ece;
57Martha spræc cuðlice to ðan hælende. wolde þæt he hete
58hire swuster hire fylstan æt ðære ðenunge þe heo micclum
59ymbhogode. þa beladode drihten marian and cwæð;
60Martha. martha. þu eart carful and bysig ymbe fela ðing.
61witodlice an ðing is nydbehof;
62An ðing bið geset. toforan eallum;
63Nis þæt an ðing fram manegum. ac manega ðing sind fram
64ðam anum;
65Fela ðing sind geworhte. ac an is se ðe geworhte heofenas
66and eorðan. sæ and ealle gesceafta. þa ealle gescop and
67geworhte an god. se ðe ana is soð god. on ðrim hadum
68wunigende;
69Efne ða gesceafta

page 257

70sindon swiðe gode. ac se ana is betere ðe hi ealle gescop;
71Þises anes gewilnode maria. ða ða heo gesæt æt godes
72fotum his word heorcniende;
73Martha wæs geornful hu heo mihte god fedan. maria hogode
74swiðor hu heo mihte þurh godes lare hire sawle gereordigan.
75for ðan þe ðæs modes gereordung is betere. þonne ðære
76wambe;
77Seo swuster hi wolde habban to hire bysegan. ac drihten wæs
78hire forespreca. and heo sæt ða orsorhgre;
79Drihten cwæð;
80Maria geceas þone selestan dæl. se ðe ne bið hire næfre
81ætbroden;
82God wæs marthan ðenung ða ða heo ðam ælmihtigan þenode.
83ac swa ðeah maria geceas þone selran dæl;
84Hwi selra? For ðan ðe hit ne bið hire næfre ætbroden;
85Witodlice þæt þæt martha geceas. is hire nu ætbroden;
86Heo geceas geswinc. ac hire is þæt ætbroden. for ðan ðe
87crist hi gebrohte to ecere reste on his rice. swa swa he behet
88eallum him ðeniendum. þus cweðende;
89ðær ðær ic sylf beo. þær bið min ðen;
90Martha swanc ða swilce on rewette. and maria sæt stille
91swilce æt ðære hyðe;
92Heo wæs bysig ymbe anum ðinge. and heold þæs witegan cwyde
93þe cwæð;
94Me is god þæt ic me to gode geðeode. and sette minne hiht
95on drihtne;
96Swiðe god ðenung is and herigendlic. þæt gehwa godes
97ðearfum ðenige. and swiðost ðam eawfæstum godes ðeowum.
98ac swa ðeah mare is þæt man þa heofenlican lare secge þam
99ungelæredum. and heora sawla gereordige þe næfre ne
100ateoriað. þonne man ðone deadlican lichaman mid
101brosniendlicum mettum afylle;
102ægðres men behofiað. ge bigleofan ge lare. ac swa ðeah
103hwonlice fremað þæs mannes lif. ðe bið nytene gelic.
104ðe hawað symle to ðære eorðan þæt is to eorðlicum
105ðingum. and for andgitleaste ne cann his mod awendan to
106ðam upplicum ðingum ne to ðam ecan life;
107Paulus cwæð. Se ðe ne cann. hine man eac ne cann;

page 258

108Eft he cwæð;
109Þa ðe buton godes æ. syngiað. ða losiað eac buton godes
110.æ;
111On ðisum wræcfullum life we sceolon earmra manna helpan. we
112sceolon ða hungrian fedan. nacode scrydan. cuman underfon.
113hæftlingas ut alysan. ða ungeðwæran gesibbian. untrume
114geneosian. deade bebyrian;
115ðas ðenunga sindon on ðisum life. þe martha getacnode;
116Witodlice on ðam toweardan life ðe maria getacnode ne beoð
117ðas neoda. ne ðas ðenunga;
118Þær we beoð gefedde. and we ðær nænne ne afedað. þær
119bið fulfremed þæt maria her geceas;
120Be ðan life cwæð se hælend. þæt he deð his halgan
121sittan. and he sylf farende him ðenað;
122ðam he ðenað þonne. ðe him nu ðeniað. þurh ðearfena
123ðenunge;
124For ði is marthan ðenung swiðe herigendlic. ðurh hi wæs
125maria geherod;
126Þeah ðe se lareow halig beo. hraðe asleacað his tunge to
127ðære godcundan bodunge. gif he næfð þone lichamlican
128fodan. is swa ðeah selre þæt þæt ece is;
129We sædon eow and gyt secgað. þæt ðas twa geswustru
130hæfdon getacnunge ðises andwerdan lifes. and ðæs ecan;
131On ðam anum huse wæron twa lif. and þæt soðe lif crist;
132On marthan wæs getacnung ðises andwerdan lifes. on marian
133ðæs toweardan;
134Þæt þæt martha dyde. þær we sind;
135Þæt þæt maria dyde. to ðam we hopiað;
136ægðer lif is herigendlic. ac þæt an is swa ðeah
137geswincful;
138Ne beo se carfulla leahterful. ne se ne lufige idelnysse se
139ðe on stilnysse is;
140ða ðe ymbe oðra manna bigleofan and scrude hogiað. þa
141geefenlæcað marthan;
142Þa ðe gymað þære heofenlican lare ða geefenlæcað
143marian. ðe drihten swiðor herode;
144Witodlice swa oft swa we ymbe oðra manna neode hogiað. we
145geefenlæcað marthan. and swa oft swa we to godes huse gað
146his lof to gehyrenne. and us to gebiddenne we geefenlæcað
147marian;
148Þis godspel is nu sceortlice getrahtnod. and we secgað eow
149þæt nan man hine ne sceal beladian þæt he godes cyrcan ne

page 259

150gesece. ðeah ðe he fyrlen sy;
151Swa he feorran godes hus gesecð. swa his med mare bið;
152Nis nan twyn þæt eow ne beo forgolden ælc ðæra stapa ðe
153ge to godes huse stæppað. ymbe eowere sawle ðearfe;
154Hwæt wille we eow swiðor secgan be ðisum symbeldæge. buton
155þæt maria cristes modor wearð on ðisum dæge of ðisum
156geswincfullum middanearde genumen up to heofenan rice.
157to hire leofan suna. ðe heo on life abær. mid ðam heo
158blissað on ecere myrhðe. a to worulde;
159Gif we mare secgað be ðisum symbeldæge þonne we on ðam
160halgum bocum rædað þe ðurh godes dihte gesette wæron.
161ðonne beo we ðam dwolmannum gelice. þe be heora agenum
162dihte oððe be swefnum fela lease gesetnyssa awriton. ac ða
163geleaffullan lareowas Augustinus. Hieronimus. Gregorius.
164and gehwilce oðre þurh heora wisdom hi towurpon;
165Sind swa ðeah gyt ða dwollican bec ægðer ge on leden. ge
166on englisc. and hi rædað ungerade menn;
167Genoh is geleaffullum mannum to rædenne and to secgenne þæt
168þæt soð is. and feawa is ðæra manna ðe
169mage ealle ða halgan bec. ðe þurh godes muð. oððe ðurh
170godes gast gedihte wæron fulfremedlice þurhsmeagan;
171Læte gehwa aweg ða dwollican leasunga ðe ða unwæran to
172forwyrde lædað. and ræde gehwa oððe hlyste þære halgan
173lare ðe us to heofenan rice gewissað. gif we hi gehyran
174wyllað;
175Uton nu geornlice biddan. þa eadigan marian. þe nu todæg
176wæs ahafen. and geuferod. bufon engla ðrymme. þæt heo us
177ðingige. to ðam ælmihtigan gode. se ðe leofað and rixað.
178on ealra worulda woruld. amen: