1B2.1.3

page 123

2

SECUNDUM LUCAM

    
3ðis godspel segð & swutelað þæt fela fortacna sculon
4geweorðan wide on worulde, ægðer ge on heofonlicum
5tunglum ge on eorðlicum styrungum, ær ðam þe se dom
6cume þe us eallum wyrð gemæne.
7And witodlice ealswa flod com hwilum ær for synnum, swa cymð
8eac for synnum fyr ofer mancynn, & ðærto hit nealæcð nu
9swyðe georne.
10And ðy is fela yfela & mistlicra gelimpa wide mid mannum, &
11eal hit is for synnum.
12And gyt weorþeð mare, þæs ðe bec secgað, wracu &
13gedrecednes þonne æfre ær wære ahwar on worulde; þæt
14bið, þonne Antecrist wedeð & ealle woruld bregeð, &
15ðærto hit nealæcð nu swyðe georne.
16And ðy hit is on worulde a swa leng swa wyrse, þæs þe we
17sylfe gecnawað ful georne.
18And eac is on us sylfum swytol & gesyne þæt we to wace
19hyrað urum Drihtne, & þæt we to ortreowe syndan
20Godes mihta & his mildheortnessa, &

page 124

21þæt we him oftor swyðor abelgað þonne we beþorftan, & eac
22betweonan us sylfum rihte getrywða healdað to wace for Gode &
23for worulde.
24And ðy us deriað & ðearle dyrfað fela ungelimpa, &
25ælþeodige men & utancumene swyðe us swencað, ealswa
26Crist on his godspelle swutollice sæde þæt scolde
27geweorðan.
28He cwæð: Surget gens contra gentem, et reliqua .
29ðæt is on Englisc, upp ræsað þeoda, he cwæð, &
30wiðerræde weorþað & hetelice winnað
31& sacað heom betweonan for ðam unrihte þe
32to wide wyrð mid mannum on eorðan.
33Leofan men, clæne wæs þeos eorðe on hyre frumsceafte, ac
34we hi habbað syððan afylede swyðe & mid urum
35synnum þearle besmitene.
36And ure misdæda eac wregeað us gelome, forðam þe we
37nellað Godes lage healdan swa swa we scoldan, ne
38Gode gelæstan þæt þæt we scoldan, ne we teoðunga
39syllað swa swa us gebyrede, ne we ælmessan dælað
40swa swa we beðorftan, ac on æghwylce wisan waniað to
41swyðe eal þæt we sceoldan on Godes est gelæstan.
42And forðy us eac swencað & ongean winnað manege gesceafta,
43ealswa hit awriten is: Pugnabit pro Deo
44orbis terrarum contra insensatos homines.

page 125

45ðæt is on Englisc, eal woruld winneð swyðe for synnum
46ongean þa oferhogan þe Gode nellað hyran.
47Seo heofone us winð wið þonne heo us sendeð styrnlice
48stormas & orf & æceras swyðe amyrreð.
49Seo eorðe us winð wið þonne heo forwyrneð eorðlices
50wæstmas & us unweoda to fela asendeð.
51Eac hit awriten is, ðæt sunne aþystrað ær worulde ende &
52mona adeorcað & steorran hreosað for manna
53synnum; & ðæt bið þonne Antecrist wedeð þæt hit bið
54gelic þam swylce hit swa sy.
55Hit is gecweden þæt sunne aðystrað; þæt is, þonne God
56nele cyðan on Antecristes timan his mægen ne
57his mihta swa swa he oft ær dyde, ðonne bið gelic þam
58swylce sunne sy aþystrad.
59And mona, hit cweð, adeorcað; ðæt is, þæt Godes halgan
60ænige tacna þonne ne wyrcað swa swa hy oft ær dydan.
61And steorran, hit cweð, hreosað ufene of heofonum; ðæt is,
62þæt licceteras & leaslice cristene hrædlice
63hreosað of rihtan geleafan & to Antecriste geornlice
64bugað & weorþaþ his gefylstan eallum heora
65mihtum.
66And ðonne geweorþeð egsa se mæsta þe æfre ær wære, &
67ehtnes seo mæste wide on worulde.
68Ne byrhð se gesibba þonne gesibban þe ma þe þam fremdan.
69And be ðam egeslican timan Matheus se godspellere soðlice

page 126

70þus cwæð: In diebus illis erit tribulatio
71talis qualis non fuit ab initio mundi nec postea erit .
72ðæt is on Englisc þæt swylc yrmð & earfoðnes bið þonne
73on worulde swylce æfre ær næs ne eft ne geweorþeð.
74And raðe æfter þam syððan astyred wyrð þurh godcunde
75mihte eal heofonlic mægen & eorðwaru aræred of
76deaðe to dome.
77ðonne mæg gecnawan se þe ær nolde soðes gelyfan þæt
78Crist þurh his mægenþrym þonne geleanað manna gehwylcum
79ærran gewyrhta.
80Wa þam þonne þe ær geearnode helle wite.
81ðær is ece bryne grimme gemencged, & ðær is ece gryre;
82þær is granung & wanung & aa singal heof; þær
83is ealra yrmða gehwylc & ealra deofla geþring.
84Wa þam þe þær sceal wunian on wite.
85Betere him wære þæt he man nære æfre geworden þonne he
86gewurde.
87Forðam nis se man on life þe areccan mæge ealle þa yrmða
88þe se gebidan sceal se ðe on þa wita ealles
89behreoseð; & hit is ealles þe wyrse þe his ænig ende ne
90cymð æfre to worulde.
91Eala, leofan men, utan don swa us þearf is, beorgan us georne
92wið þæne egesan & helpan ure sylfra þa
93hwile þe we magan & motan, þe læs we forweorðan þonne
94we læst wenan.
95Ac utan lufian God ofer ealle oðre þing & his wyllan wyrcan,

page 127

96swa we geornost magan.
97þonne geleanað he hit us swa us leofast bið þonne we æfre
98þæs betst beþurfan.
99Him symle sy lof & wuldor in ealra worulda woruld a butan
100ende, amen.