1B15.6.20

page 56

    
2On Godes ælmihtiges naman.
3Ic æþestan æþeling geswutelige on þysum gewrite hu ic
4mine are & mine æhta geunnen hæbbe Gode to lofe
5& minre saule to alysednysse & mines fæder æþelredes
6cynges þe ic hit æt geearnode.
7þæt is ærest þæt ic geann þæt man gefreoge ælcne
8witefæstne mann þe ic on spræce ahte.
9& ic geann in mid me þær ic me reste Criste & sancte petre
10þæs landes æt Eadburgebyrig þe ic gebohte
11æt minan fæder mid twam hund mancosan goldes be gewihte &
12mid V pundan seolfres.
13& þæt land æt Merelafan þe ic gebohte æt minum fæder mid
14þridde healf hund mancosan goldes be gewihte
15& þæt land æt Mordune þæt min fæder me to let ic gean
16into þære stowe for uncer begra saule.
17& ic hine þæs bidde for Godes lufan & for sancta Marian &
18for sancte Petres þæt hit standan mote.
19& þæs swurdes mid þam sylfrenan hiltan þe Wulfric worhte &
20þone gyldenan fetels & þæne beh þe Wulfric
21worhte & þone drencehorn þe ic ær æt þam hirede
22gebohte on ealdan mynstre.
23& ic wille þæt man nime þæt feoh þe Aþelwoldes laf me ah
24to gyldene þe ic for hyre are gesceoten

page 58

25hæbbe
26& betæce ælfsige bisceope into ealdan mynstre for mine
27saule, þæt synd XII pund be getale.
28& ic geann into Cristes cyrican on Cantwarabyrig þæs landes
29æt Holungaburnan & þæs þe þærto hyrð buton
30þære anre sulunge þe ic Siferðe geunnen hæbbe & þæs
31landes æt Garwaldintune.
32& ic ann þæs landes æt Hryðerafelda into nunnan mynstre
33Sancta Marian þances & ænne sylfrene mele on
34fif pundon & into niwan mynstre ænne sylfrene hwer on fif
35pundon on þære halgan þrymnesse naman þe
36seo stow is forehalig.
37& ic geann to Sceaftenesbyrig to þære halgan rode & to
38sancte Eadwearde þara VI punda þe ic Eadmunde
39minon breðer gewissod hæbbe.
40& ic geann minon fæder æþelræde cynge þæs landes æt
41Cealhtune buton þam ehta hidan þe ic ælmære minon
42cnihte geunnennen hæbbe & þæs landes æt Norðtune &
43þæs landes æt Mollintune & þæs seolferhiltan
44swurdes þe Ulfcytel ahte & þære byrnan þe mid Morkære is
45& þæs horses þe þurbrand me geaf & þæs hwitan
46horses þe Leofwine me geaf.
47& ic geann Eadmunde minon breðer þæs swurdes þe Offa cyng
48ahte & þæs swurdes mid þam pyttedan hiltan
49& anes brandes & ænne seolforhammenne blædhorn & þara
50landa þe ic ahte on East Englan & þæs landes
51æt Peacesdele.
52& ic wylle þæt mon gelæste ælce geare ane dægfeorme þam
53hirede into Elig of þysse are on Sancte æþeldryðe
54mæssedæg & gesylle þær to mynstre an hund penega &
55gefede þær on þone dæg C þearfena & sy æfre
56seo ælmesse gelæst gearhwamlice age land se þe age þa
57hwile þe Cristendom stande.
58& gif þa nellað þa ælmessan geforðian þe þa land
59habbað gange seo ar into sancte æþeldryðe.
60& ic geann Eadwige minon breðer anes seolforhiltes swurdes.
61& ic geann ælfsige bisceope þære gyldenan rode þe is mid
62Eadrice Wynflæde suna & anne blacne stedan.
63& ic geann ælmære þæs landes æt Hamelandene þe he ær
64ahte.
65& ic bidde minne

page 60

66fæder fur Godes ælmihtiges lufan & fur
67minon þæt he þæs geunne þe ic him geunnen hæbbe.
68& ic geann Godwine Wulfnoðes suna þæs landes æt Cumtune
69þe his fæder ær ahte.
70& ic geann ælfswyðe minre fostermeder for hire myclon
71geearnungon þæs landes æt Westune þe ic gebohte
72æt minon fæder mid þridde healf hund mancusan goldes be
73gewihte.
74& ic gean ælfwine minon mæssepreoste þæs landes æt
75Heorulfestune & þæs malswurdes þe Wiðer ahte & mines
76horses mid minon gerædon.
77& ic geann ælmære minon discþene þara ehta hida æt
78Cateringatune & anes fagan stedan & þæs sceardan
79swurdes & mines targan.
80& ic geann Siferðe þæs landes æt Hocganclife & anes
81swurdes & anes horses & mines bohscyldes.
82& ic geann æþelwerde Stameran & Lyfingce þæs landes æt
83Tywingan.
84& ic ann Leofstane Leofwines breðer Cwattes þære landare
85þe ic of his breðer nam.
86& ic geann Leommære æt Biggrafan þæs landes þe ic him ær
87of nam.
88& ic geann Godwine Dreflan þara þreora hida æt
89Lutegaresheale.
90& ic geann Eadrice Wynflæde Sunu þæs swurdes þe seo hand
91is on gemearcod.
92& ic geann æþelwine minon cnihte þæs swurdes þe he me ær
93sealde.
94& ic geann ælfnoðe minon swurdhwitan þæs sceardan
95malswurdes & minon heardeorhunton þæs stodes þe is
96on Colungahrycge.
97& gehealde mon of minon golde ælfric æt Bertune & Godwine
98Drefelan æt swa miclon swa Eadmund min broðor
99wat þæt ic heom mid rihte to gyldanne ah.
100Nu þancige ic minon fæder mid ealre eadmodnesse on Godes
101ælmihtiges naman þære andsware þe he me sende
102on frigedæg æfter middessumeres mæssedæge be ælfgare
103ælffan suna.
104þæt wæs þæt he me cydde mines fæder worde þæt ic moste
105be Godes leafe & be his geunnan minre are &
106minra æhta swa me mæst ræd þuhte ægðer ge for Gode ge
107for worulde.

page 62

108& þysse andsware is to gewitnesse Eadmund min broðor &
109ælfsige bisceop & Byrhtmær abbod & ælmær ælfrices sunu.
110Nu bidde ic ealle þa witan þe minne cwyde gehyron rædan
111ægðer ge gehadode ge læwede þæt hi beon on
112fultume þæt min cwyde standan mote swa mines fæder leaf on
113minon cwyde stænt.
114Nu cyðe ic þæt ealle þa þingc þe ic to Gode into Godes
115cyrican & Godes þeowan geunnen hæbbe sy gedon
116for mines leofan fæder sawle æþelredes cyncges & for
117minre & ælfþryðe minre ealdemodor þe me afedde
118& for ealra þara þe me to þyson godan gefylstan.
119& se þe þysne cwyde þurh ænig þingc awende habbe him wið
120God ælmihtigne gemæne & wið Sancta Marian
121& wið Sancte Peter & wið ealle þa þe Godes naman heriað.