1B1.3.1

page 4

    
2ÆLFRIC GRET EADMODLICE ÆÐELWERD EALDORMAN and ic secge þe
3leof, þæt ic hæbbe nu gegaderod on þyssere bec þæra
4halgena þrowunga þe me to onhagode on englisc to awendene,
5for þan þe ðu leof swiðost and æðelmær swylcera gewrita
6me bædon, and of handum gelæhton eowerne geleafan to
7getrymmenne, mid þære gerecednysse, þe ge on eowrum
8gereorde næfdon ær.
9þu wast leof þæt we awendon on þam twam ærrum bocum
10þæra halgena þrowunga and lif, þe angelcynn mid
11freolsdagum wurþað.
12Nu gewearð us þæt we þas boc be þæra halgena ðrowungum
13and life, gedihton þe mynstermenn mid heora
14þenungum betwux him wurðiað.
15Ne secge we nan þincg niwes on þissere gesetnysse, forþan
16ðe hit stod gefyrn awriten on ledenbocum þeah þe þa
17læwedan men þæt nyston.

page 6

18Nelle we eac mid leasungum þyllic liccetan, forþan þe
19geleaffulle fæderas and halige lareowas hit awriton on
20ledenspræce, to langum gemynde, and to trymmincge
21þam towerdum mannum.
22Sum witega clypode þurh þone halgan gast and cwæð,
23Mirabilis deus in sanctis suis, et cet : Wundorlic is god
24on his halgum; he sylf forgifð mihte and strengðe
25his folce; gebletsod is he god.
26We awritað fela wundra on þissere bec, forþan þe god is
27wundorlic on his halgum swa swa we ær sædon, and his
28halgena wundra wurðiað hine, forþan þe he worhte
29þa wundra þurh hi.
30An woruldcynincg hæfð fela þegna and mislice wicneras; he
31ne mæg beon wurðful cynincg buton he hæbbe þa geþincðe
32þe him gebyriað, and swylce þeningmen, þe
33þeawfæstnysse him gebeodon.
34Swa is eac þam ælmihtigan gode þe ealle þincg gesceop; him
35gerisð þæt he hæbbe halige þenas þe his
36willan gefyllað, and þæra is fela on mannum anum þe he of
37middanearde geceas, þæt nan bocere ne mæg þeah he mycel
38cunne, heora naman awriten, forþan þe hi nat nan man.
39Hi synd ungeryme swa swa hit gerisð gode; ac we woldon
40gesettan be sumum þas boc, mannum to getrymminge and to munde
41us sylfum, þæt hi us þingion to þam ælmihtigan gode, swa
42swa we on worulde heora wundra cyðað.
43Ic bidde nu on godes naman gif hwa þas boc awritan wille,
44þæt he hi wel gerihte be þære bysne, and
45þær namare betwux ne sette þonne we awendon.