1B1.8.3

page 146

    
2Eala ge mæssepreostas, mine gebroþra.
3We secgað eow nu þæt we ær ne sædon.
4Forþonþe we todæg sceolan dælan urne ele, on þreo wisan
5gehalgodne, swaswa us gewissað seo boc: Id est oleum sanctum
6et oleum crismatis et oleum infirmorum ; þæt is on englisc:
7halig ele, oþer is crisma and seoccra manna ele.
8And ge sceolon habban þreo ampullan gearuwe to þam þrym
9elum.
10Forþanþe we ne durran don hi togædere on anum elefate,
11forþanðe hyra ælc

page 148

12bið gehalgod on sundron to synderlicre þenunge.
13Mid þam haligan ele ge scylan þa hæþenan cild mearcian on
14þam breoste and betwux þæm ge sculdru on
15middeweardan mid rode tacne, ærþanþe ge hit fullian on
16þam fantwætere.
17And þonne hit of þæm wætere cymð, ge scylan wyrcan rode
18tacen upp on þæm heafde mid þam haligan crisman.
19On þam haligan fante, ærþanþe ge hy fullian, ge scylon don
20crisman on Cristes rode tacne.
21And man ne mot besprengan men mid þæm fantwætere, syþþan
22se crisma bið þæron gedon.
23Mid seoccra manna ele ge scylan smyrian þa seocan, swaswa
24Iacob se apostol on his pistole tæhte.
25Ut alleuet eos dominus, et si in peccatis sint, dimittentur
26eis þæt drihten hi arære fram hyra seocnysse, and gif hy
27on synnum syndon, þæt hy beon forgifene.

page 150

28Man sceal huslian þone seocan, þa hwyle þe he hit
29forswelgan mæg.
30And man ne sceal hit na don nanum samcwyce men.
31Forþanþe he hit sceal etan, swaswa ure drihten cwæð:
32Qui manducat carnem meam et bibit sanguinem meum,
33in me manet et ego in eo , þæt is: Seþe yt min flæsc
34and drincgð min blod, se wunað on me and
35ic wunige on him.
36Sume seoce synd swa dysige, þæt hy ondrædað him, þæt hi
37sceolan swyltan sona for þam husle.
38Ac we secgeað to soþan, þæt he ne swylt na for þy,
39þeahþe he ælce dæge underfo þæt husel, ac his synna
40beoð adylegode þurh þone drihtenlican hlaf and he bið
41eac gescyld wið deofles syrwunga.
42Se seoca man sceal swyþe behreowsian his ærran synna and
43geswycennysse behatan and

page 152

44he mot hy andettan oþ þa nyhstan orþuncge.
45And he sceal forgifan eallum þam mannum, þe him ær abulgon,
46and biddan hym forgifnysse.
47Ge sculon huslian þa cild, þonne hi gefullode beoð, and hy
48man bere to mæssan, þæt hyg beon gehuslode ealle
49þa seofon dagas, þa hwile þe hig unþwogene beoð.
50Ge ne motan mæssian on læwedra manna huse.
51Ne man ne mot drincan ne dwollice plegan, ne etan innan
52cyrican, ne unnytte word þærinne sprecan; ac hine gebiddan.
53Forþonþe heo his gebedhus.
54And eac forþanþe se hælend adræfde of þam haligan temple
55ealle þa gedwolan mid hyra gedwylde and cwæð þus:
56min hus is gecweden gebedhus.
57SERMO IN CENA DOMINI ET SEXTA FERIA ET SABBATO SANCTO .

page 154

58In cena domini et in parasceue et in sancto sabbato .
59On þyssum þrym swigenihtum ge sceolan singan ætgædere be
60fullan eowerne uhtsang, swaswa se antifonere tæcð.
61And feower and twentig candela acwencan æt þam sealmum and
62æt ælcere rædingce oþ þone æftemynstan
63antifon.
64And geendian þone æftersang swa, þæt ælc singe his pater
65noster on sundron and þa preces þærto butan ælcum
66leohte licgende on cneowum.
67On þam þunresdæge ge singað ætgædere ealle eower
68tydsangas.
69Singað swaþeah æfre þæt pater noster and þa
70preces on sundran.

page 156

71On frigedæg and on sæternesdæg singað eowre tyddsangas
72ælc preost on sundran, butan þam uhtsange.
73On þunresdæg ge sculan aþwean eower weofodu, ærþanðe ge
74mæssian and ge elles ne motan.
75And æfter æfensange ge sculon unscrydan þa weofodu, and
76standan hi swa nacode oþ þone sæternesdæg.
77And man þa weofodsceatas awahxe betwux þam.
78And healdað on þam dæge eower fæsten oþ non.
79Implete mandatum domini in caena ipsius , Doð on

page 158

80þam þunresdæge, swaswa ure drihten bebead.
81Aþweað þearfena fet and him fodan doð; scrud, gif eow to
82onhagige.
83And eac eow betwynan eowre fet aþweað mid eadmodnysse,
84swaswa Crist sylf dyde and us swa don het.
85On þam dæge ge ne motan cweþan æt þære mæssan:
86dominus uobiscum , butan se bisceop ana, þe þone ele
87halgað.
88Ne ge eac ne sculon gan to pacem ne agnus dei singan.
89Ac þær man þone ele halgað, man sceal cyssan þa fatu.

page 160

90And ge sculon healdan of þam husle, þe ge halgiað þæs
91dæges, to þicgenne on frigedæg æt þære þenuncge.
92Forþanþe man ne mot halgian nan husel on þam dæge, þe
93Crist on þrowode for ure alysednysse.
94On frigedæge ær none æt fruman man sceal rædan þæs
95witegan rædincge: In tribulatione sua mane .
96And syþþan þone traht singan: Domine audiui .
97æfter þam trahte: Flectamus genua ; þonne: Deus a quo
98et Iudas .
99Eft oþre rædincge: Dixit dominus ad Moysen et Aaron and
100þonne traht: Eripe me, domine .

page 162

101Ræde man þonne Cristes þrowunge be Iohannes gesetnysse.
102æt þære ne man sceal cweþan: Dominus uobiscum ne nænne
103gloria tibi domine .
104æfter þison cweþe se preost þa collecta swaswa seo
105mæsseboc him tæcð.
106æfter þam beran twegen gebroþru þa rode forð mid hrægle
107bewæfed and singan þa fers: Popule meus .
108Twegen gebroþru him andwyrdon on grecisc: Agios o theos
109oþ ende.
110And hi ealle þonne þæt ylce singan on leden: Sanctus
111deus, sanctus fortis .

page 164

112þonne þæt oþer fers: Quia eduxi uos ; þonne eft:
113agios, o theos , and: sanctus deus .
114þonne þæt þrydde fers: Quid ultra debui and: Agios
115and: Sanctus; Unwreon þonne þa rode and singan:
116Ecce lignum crucis and þa oþre antifonas.
117þa hwile þe þa gebroþru hi gebiddað æt þære rode and
118þæt læwede folc eallswa do.
119Lecge se diacon syððan corporale uppon þæm weofode mid
120þæm husle, þe wæs on þæm ærran dæge gehalgod
121and sette þone calic þæron emn mid ungehalgodum wine.

page 166

122And cweþe se mæssepreost be sone: Oremus: Preceptis
123salutaribus moniti and pater noster oð ende.
124Cweþe þonne fægre: Libera nos, quæsumus, domine, ab
125omnibus malis .
126Eft syþþan be sone: Per omnia secula seculorum .
127Do se mæssepreost þonne of þam husle mid swygan into þam
128calice.
129And gange he to husle and ealle þa gebroþru.
130Singan syþþan hyra æfensang, ælc on sundron, and gan
131syþþan to hyra gereorde.

page 168

132And ne beo hyra nan gesceod þæs dæges, butan he untrum sy,
133ærþanþe þis gefylled sy.
134On easteræfen man sceal halgian ærost þone tapor.
135And syþþan rædan þa rædincge: In principio fecit deus
136celum et terram .
137Don syþþan þa seofon lętanias þenuncge, swa eower bec eow
138tæceað and mid fif letanias halgie fant.
139Ac ge ne scylan singan offerendan on þæm dæge ne
140agnus dei ne communia ne gan to pacem.

page 170

141Singan swaþeah: Gloria in excelsis deo .
142æfter þæm huselgange singað alleluia be sone and þone
143sceortan sealm þærmid: Laudate dominum, omnes gentes .
144Aginnan syþþan þone antiphon: Uespere autem sabbati and
145fulsingan magnificat.
146æfter þæm antiphone cweðe se mæssepreost þa collectan:
147Post communionem and geendige swa þa mæssan
148and þone æfensang mid anre collectan.
149Se mæssepreost sceal halgian sealt and wæter on ælcum
150sunnandæge ærþanþe he mæssige and stredan geond þa
151cyricean and ofer þæt folc.

page 172

152And healdan þæt wæter, gif hwa habban wylle, oþ þæt he
153oþer halgige on þam oþrum sunnandæge.
154Man sceal to mæssan don gemencged win and wæter togædere
155well clænlice.
156Forþanþe þæt win getacnað ure alysednysse þurh þæs
157hælendes blod, þe he for us ageat, and þæt wæter
158getacnað witodlice þæt folc, þe Crist alysde mid his
159leoffæstan blode.
160Gif hwa win næbbe ofer ealne þone gear, he nime lynen
161hrægl, þe to note ær ne com and bedyppe on wine, þæt he
162þurhwæt sy. Dryge hine ðonne on sunnan and dyppe hine
163oþre syþan, dryge hine eft and dyppe þryddan syþe, dryge
164hine þonne eft on þære hatan sunnan, and healde hine
165clænlice and on clænum wætere wæte of þam claðe and
166wringe on his calic. Do swa lytlum and lytlum,
167oþ þæt se clað sy asoht.
168Se preost sceal hogian, þæt he his offrunga do swyðe
169clænlice þurh clað geseohgod.

page 174

170And his ofletan ne beon na to eald bacene.
171And he aþwea his calic æfre ymbe seofon niht.
172Forþanþe se wytega segð, þæt se bið awyrged, seþe Godes
173þenunge deð mid gymeleaste.
174Forþy ne mot nan blynd preost mæssian næfre, forþanþe he
175ne gesyhð hwæt he sylf offrað.
176Mycele mede geearnað æt þam ælmihtigan Gode, seþe him
177clænlice þenað æt his clænum weofode.
178And þam folce deð for Gode þa þenunga, þe to cyricean
179gebyriað on asettum tyman.
180And genoh halig byð lif þam, þe hylt his clænnysse and
181Gode swa þenað on his gastlican þeowdome.
182Gif he fram heafodleahtrum gehealden byð.
183Nu cwyð, ic wene, eower sum to me: we nabbað þone fultum,
184þæt we þis forðbringan magan.
185þonne we standað ana æt urum weofode.
186And ic secge eow to soþan, þæt ge sceolan

page 176

187læran cnapan and geonge men eow to fultume, þæt hig æfter
188eow don þa ylcan þenunga.
189Na eower agene cild, þe ge unrihtlice gestrynað, ac þa
190ælfremedan, þæt hy eowre cild beon þurh þa
191gastlican lare.
192And ge beoð þonne lareowas.
193And ge magon swa begytan þa mæstan geþyngðu.
194Swaswa Daniel se witega on his witegunge gesette: Qui autem
195docti, fulgebunt quasi splendor firmamenti et qui ad iustitiam
196erudiunt multos, quasi stelle in perpetuas æternitates ;
197þæt is on engliscre spræce: þaþe gelærede beoð,
198hy scynað swaswa steorran soðlice on ecnisse.
199Ne most þu na ana mæssian, butan man ðe andwyrde, ðeahþe
200þu for unkiste clerec nabban nelle, oþþe
201ðu for Godes lufan oþre læran nylle.

page 178

202Ac healst Godes pund on þinum swat claðe, þe to ecum wite,
203swaswa us segð þæt godspell.
204Sume preostas afyllað hyra husel boxcs on eastran and healð
205ofer twelf monað to untrumum mannum, swilce þæt husel sig
206haligre þonne oþer.
207Ac hig doð swiþe unwislice, forþonðe hit wanað oððe mid
208ealle forrotað on swa langum fyrste.
209And he bið þonne scyldig, swaswa us secgð seo boc.
210Seðe husel forhilt oððe hit forlyst oððe hit mis etað
211oþþe oþre nytenu, sceawa ða penitentialem hwæt
212heo segð be ðysum.
213Eal swa halig is þæt husel, þe bið gehalgod todæg, swa
214þæt, þe bið gehalgod on þam haligan easterdæge.
215Healdað forðy, ic bidde, þonne haligan Cristes lichaman mid
216maran wisdome to seocum mannum fram sunnandæge to sunnandæge
217on swiþe clænum boxcse, oððe be þam mæstan xiv
218nyht and

page 180

219ðicgan hit þonne and lecgan þær oðer.
220We habbað bysne be þam on Moyses æ, þæt se sacerd sceolde
221on ælcum saternes dæge settan twelf hlafas on þam
222tabernacula, ealle nibace. þa wæran gehatene
223panis propositionis . And hyg sceoldan þær standan on
224þam Godes getelde oð oðerne sæternes dæg and etan hyg
225ðonne þa sacerdas sylfe and settan þar oðre to.
226Sume preostas nellað þicgan þæt husel, þe hyg halgiað.
227Nu willað we eow secgað, hu seo boc segð be þam:
228Presbiter missam celebrans et non audens sumere sacrificium,
229accusante conscientia sua, anathema sit ; Se mæsse preost,
230þe mæssað and ne dear ðæt husel ðicgan, wat hine
231scildigne, se is amansumad.
232Læsse pleoh is to ðicganne þæt husol þonne to halgienne.
233Seðe aniges þinges abirigð, ætes oððe wætes, ostran
234oþþe ofet, wines oðð wæteres, ne ræde he pistol
235ne godspell to mæssan.
236Gif hit

page 182

237hwa þonne deð, he unarwirðað God and mid þære
238dyrstignysse hine sylfne fordeð.
239Seðe tuwa halgað ane ofeletan to husle, se bið ðam
240gedwolan gelic, þe an cyld fulað tuwa.
241Crist silf gehalgode husel ær his þrowuncge.
242He bletsode þonne hlaf and tobræc, þus cweþende to his
243haligum apostolum: ætað þisne hlaf, hit is min lichama.
244And he eft bletsode ænne calic mid wine and cwæd him ðus
245to: Drincað ealle of þissum, hit is min agen blod þare
246niwan gecyðnesse, þe byð for manegum agoten on sinna
247forgifnesse.
248Se drihten, þe halgode husol ær hys þrowuncge and cwæd,
249þæt se hlaf wære his agen lichama and þæt win wære
250witodlice his blod, se halgað dæghwamlice þurh his
251sacerda handa hlaf to his lichaman and win to his blode on
252gastlicre gerine, swaswa we rædað on bocum.
253Ne bið se liflica hlaf lichamlice swaðeah se ylca lichama,
254þe Crist on þrowade.
255Ne ðæt halige win nis ðæs hælendes blod, þe for us
256agoten wæs on lichamlicam ðincge.

page 184

257Ac on gastlicum andgite ægðer bið soðlice se hlaf his
258lichaman and þæt win eac his blod.
259Swaswa se heofonlica hlaf wæs, þe we hatað manna, þe
260feowertig geara afedde Godes folc, and þæt luttre wæter
261wæs witodlice his blod, þe arn of þam stane on
262þam wæstene ða.
263Swa Paulus awrat on sumum his pistole: Omnes patres nostri
264eandem escam spiritalem manducauerunt et omnes eundem potum
265spiritalem biberunt et cetera . Ealle ure fæderas ætan on
266ðam westene þone ylcon gastlican mete and gastlican drinc
267druncon. Hyg druncon of ðam gastlican stane and se stan
268wæs Crist.
269Se apostol sæde, swaswa ge nu gehyrdan, ðæt hig ealle ætan
270þone ylcan gastlican mete and hyg ealle druncon þone
271gastlican drenc.
272Ne cwæð he na lichamlice ne ac gastlice.
273Næs Crist þa gyt geboren, ne his blod næs agoten, ðaða
274þæt Israhela folc geæt þæne mete and of ðam
275stane dranc.

page 186

276And se stan næs lichamlice Crist, þe ac þe swa cweðende
277wære.
278Hit wæron ða ylcan gerinu on þare ealdan æ and hyg
279gastlice getacnodon þæt gastlice husol ure hælendes
280lichaman, þe we halgiað nu.
281Sume preostas nellað syllan þam folce husol, buton hi hyt
282gebicgan.
283Ne heora bearn fullian.
284Ac hyg sceoldan understandan, hu se hælend adræfde mid
285geworhtre swipe ða cypan of þam temple.
286Nolde þæt hyg mangedon on þam mæran huse.
287And hu he eac bebead on his godspelle: Gratis accepistis;
288gratis date .
289Ge hit underfencgon butan gearnuncgum; doð hit eac oðrum
290butan gearnuncgum.
291Gyf we þa þenunga haligan, þe we ðam hælende doð,
292sillað wið feo, hwæt silð he us þonne?
293þara laca we motan be Godes leafe brucan, þe man silfwilles
294deð, ac we sceolan geearnian.

page 188

295Mann ne mot na logian andluman innan cyrican, ne corn ne nan
296ðing on Cristes huse, buton þam anum þincgum, þe to his
297þenuncgum gebyriað.
298Sume preostas mencgað win to þam fantwætere, swiðe
299unrihtlice.
300Ongean þa setnyss, swaswa he cwyð to Gode on þære
301bletsunge: Tu has simplices aquas tuo ore benedicito ;
302ðæt is on engliscum gereorde bletsa, ðu drihten,
303þas anfealdan wætum mid þinum haligum muþe.
304Ac þæt wæter ne bið nanfeald, gyf þar bið win to gedon.
305And Crist ne het na fullian his folc mid wine, ac mid
306anfealdum wætere, swaswa us gewisað ðæt godspell.
307Ge sceolan cunnan gemindelice and mannum eac

page 190

308secgan þa tyn ænlican word,
309þe God tæhte Moysen and mid his fingre awrat
310on twam stænenum tabulum on ðam munte Synai, eallum mannum
311to steore, eallum folce þa, ðe geo wæs , ge us, þe nu
312sindan.
313Hoc est decalogum Moysi .
314þæt sint þa tin beboda, þe eac God sylf geclipode on þam
315munte myd micelre stemne to eallum ðam mannum, þe mid Moyse
316wæron on þam wæstene þa: Ego sum dominus deus tuus,
317qui eduxi te de terra Egypti; Non habebis deos alienos coram
318me ; þæt is on englisc: Ic eom drihten, ðin God; ic,
319þe þe alædde of Egypta lande; ne hafa þu ællfremde godas
320ætforan me nateshwon.

page 192

321ðis is ðæt forme bebod, þæt we simle wurðian þone
322ælmihtigan God, seðe ana is God, seo halige þrinis,
323þe ealle ðincg gesceop on anre godcundnisse æfre
324rixiende, and we ne sceolan na weorðian þa dwolican godas;
325hi ne sind na godas, ac gramlice deoflu.
326ðæt oþer bebod is þus: Non adsumas nomen domini dei tui
327in uanum ; Ne underfoh ðu on idelnisse þines drihtines
328naman.
329Seðe gelif swa on Crist, þæt he si gesceapen and nele
330gelifan, þæt he æf God wære mid his ælmihtigan fæder on
331anre godcundnisse and mid þam halgan gaste on anum
332mægenþrimme.

page 194

333He nis na gesceaft, ac is soð scippend and ælc gesceaft is
334soðlice underðeod nu idelnisse, þæt is awendedlicnesse,
335forðonðe þa gesceaftum beoð to beteran þincgum awende.
336ðæt þridde bebod is Memento ut diem sabbati
337sanctifices ; þæt is on urum gereorde: Beo ðu gemindig,
338þæt þu gehalige restendæg.
339Under Moyses æ men halgodan þa þone sæternesdæg mid
340swiðlican weorðmynte fram ðeowetlicum weorcum,
341and we sculon us healdan fram ðeowetlicum weorce, þæt
342sindan sinna gewiss, þe gebrincgað on ðeowete
343þa ðe hi swyðost begað, swaswa se hælend cwæð on his
344haligan godspelle: Omnis qui facit peccatum,

page 196

345seruus est peccati ; ælc þara ðe sinna gewyrcð, is ðara
346sinna ðeow. We sculon gastlice healdan Godes restendæg, swa
347þæt we silfe beon fram sinnum æmptige and se dæg beo
348gehalgod on us sylfum swa. Fela þincga getacnað se foresæda
349restendæg. Ac we healdað nu æfter þæs hælendes æriste
350ðone sunnandæg freolice, forðonðe he of deaðe aras on
351ðam easterlican sunnandæge, and se sunnandæg is on
352gesceapennisse firmest and we sculon eac hine æfre
353weorðian, Gode to wyrðminte, on gastlicum ðeowdome.
354þas þreo beboda wæron on anre tabulan awritene and ða
355oðre seofon on oðre tabulan.
356ðæt feorðe bebod is: Honora patrem tuum et matrem tuam ;
357ðæt is engliscre spræce: Arwyrða þinne fæder and eac
358þinre meder. Seðe wyrgeð fæder oððe modor, se is deaðes
359scyldig.

page 198

360æfter gastlicum andgite God is ure fæder and his halige
361gelaðuncg, þæt is geleaffull folc, ure gastlice modor,
362on ðære we beoð accennede on þam haligan fulluhte,
363Gode to bearnum, and we forþig sceolan God, urne fæder,
364and his gastlice bride, þa haligan cyrican, simble wurðian.
365ðæt fifte bebod is: Non occides ; Ne ofsleh ðu nænne
366mann.
367þæt is seo mæste sinn, þæt man mann ofslea unscyldigne
368oððe his sawle ofslea, gyf he hine to sinne
369tiht.
370And yfel bið þam mann, þe mæg gehelpan þam wædligan menn
371and forwyrnð him his goda and læt hine acwellan for his
372uncyste.

page 200

373ðæt sixte bebod is: Non mechaberis ; Ne unriht hæm ðu.
374ælc þæra manna, þe butan rihtre æwe hæmð, he hæmð
375unrihtlice.
376ðæt seofoðe bebod is: Non furtum facies ; ðæt is: Ne
377stala þu.
378Forþon seðe stilð, he hæfð wulfes wican and na wises
379mannes, and se rica, þe berypð and myd reðnysse ofsitt þa
380unscildigan menn, he is soðlice wyrsa þonne se digla þeof,
381forðonðe he deð openlice þæt, þæt se oðer deð
382dearnunga symble.
383ðæt eahtoðe bebod is: Non loqueris contra proximum tuum
384falsum testimonium ; Ne beo ðu leas gewyta.

page 202

385Hit is soðlice awriten: Ne bið se leasa gewita ungewitnod
386nateshwon.
387And seðe spicð leasuncga he sceal losian sylf.
388Wa ðam, ðe for sceattum forsylþ hyne silfne and awent soð
389to leasum and leas to soðum.
390ðæt nigoðe bebod is: Non concupisces uxorem proximi
391tui ; Ne gewylna ðu oðres mannes wifes.
392ðæt teoðe bebod is: Non concupisces ullam rem proximi
393tui ; Ne gewilna ðu oðres mannes æhta.
394Hyt bið riht, þæt gehwa hæbbe þæt, þæt he sylf begitt,
395butan he his geunne oþrum menn sylf willes,
396dincg oþþe he hit forgange.

page 204

397Nu ge habbað gehyred be þam healican tyn bebodum.
398Nu willæ we eow secgan sceortlice eac swilce be þam eahta
399heafodleahtrum, ðe ða unwaran menn fordeð
400and witodlice besencað on ða ecan witu.
401Se forma heafodleahtor is on leden superbia and on englisc
402modygniss.
403Seo macode to deoflum þa wlitigan encglas, þe wunedon on
404heofonum.
405And se modiga mann ne mæg cuman to heofonum, ac byð ðara
406deofla gefera, butan he þæs dysiges geswice.
407Forðonþe modigniss is swiðe micel dysig and se wisa mann
408nat, on hwan he modige.
409Seo modigniss is ælces yfeles ord and ende, ac heo bið
410oferswiðeð þurh þa soðan eadmodnysse.

page 206

411Seo eadmodnyss gedeð, þæt þa eaðmodan beoð encglum
412gelice on þam ecum lyfe.
413Se oðer heafodleahtor is castrimargia uel gula , þæt is
414on englisc gyferniss.
415Seo awearp æt fruman þa frumsceapenan menn of neorxna wange,
416ðaða hig ætan of ðam forbodenan treowe.
417And se mann byð gifre, þe for gyfernisse ne mæg his mæles
418onbidan, swaswa mann don sceal.
419And seðe drunconnysse to dyselice begæð and on
420oferflowednysse gefadað his lyf.
421þone unþeaw oferswyð seo gesceadwyse gemetegung, þæt he
422hæbbe gemet on mettum and on druncen.
423Seo þridda heafodleahtor is Fornicatio , þæt is seo
424galniss, þa oferswið seo clænnis.

page 208

425Seo feorða heafodleahtor is Auaritia on leden and on
426englisc gytsuncg.
427Seo ontent þane mann to maran æhte æfre and heo næfre ne
428byð full.
429Seo bið oferswiðed þurh cystignesse swaþeah.
430Se fifta is Ira , þæt is weamodniss, þæt se mann ne
431mæge his mod gewildan, ac butan ælcum wisdome waclice
432irsað and mannslihtas gefremað and fela reþnissa.
433þone mæg oferswyðan þæs modes geðild, seðe mid gesceade
434him sylfan gewissað.
435Se sixta is accidia , þæt is asolcennyss, ðæt is modes
436swærniss and ungemetegod slapulniss.
437Se leahtor bið oferswiðed þurh þæs modes anrædnisse,
438þæt se mann beo anræde æfre on godum weorcum.

page 210

439þæt se mann beo ungearo to ælcum gode æfre.
440þes leahtor gemacað micel yfel þam menn, þonne he þurh
441asolcennysse swa aswunden leofað, þæt he nan
442ðing to gode ne deð on his life and nan edlean næfð butan
443ece wite.
444Se seofoða heafodleahtor is Tristitia on leden, þæt
445is on englisc unrotnyss for mislicum gelimpum,
446þe mannum becymð on cwelme and on lyrum oþþe on freonda
447forðsiðe.
448þonne murcnað se mann on his mode to swiðe and ceorað
449ongean God ungesceadwislice.
450Twa unrotnisse sindan swaswa us seccað bec.
451An is ðeos yfele, ðe we embe sprecað, oþer is halwende,
452swaswa we her secgað, ðæt se mann unrotsi for his ærrum
453sinnum and hig behreowsige mid rædfæstum mode.

page 212

454Seo yfele unrotnyss byð eac oferswiðed þurh ða gastlican
455blisse, þe mann for Gode habban sceal.
456Se eahtoðe heafodleahtor is: cenodoxia, id est, iactantia
457uel uana gloria , þæt is gylp on englisc
458oððe getot, gereht, þæt se mann beo leofgeorn and mid
459gylpe afylled, þeahðe he nateshwon hergendlic ne si.
460And byð þonne hiwere þurh þone heafodleahter and ranc on
461his gyrelum and unrædfæst on dædum.
462þone leahter oferswið se soðe lufu on Gode, on urum heortan
463agoten þurh þone haligan gast.
464Nu ge habbað gehyred þa eahta heafodleahtris and eac þa
465eahta mihta , þe hi magan oferswiðan.

page 214

466þa unsigendan deor and heora toðum ætberstan.
467Forþonþe ne byð nan ðing swa yfel on ðissum life, þæt
468næbbe læcedom þurh ðæs hælendes foresceawunge, þe hylt
469ealle ðingc, gyf we ða læcedomas us sylfum don cunnan.
470Debetis in purificatione sanctę Marię candelas benedicere
471et cetera .
472Ge sculon on þam mæssedæge, þe is gehaten purificatio
473sanctę Marię , bletsian candela and beran mid
474lofsange, ge gehadode ge læwede, to processionem and ofrian
475hig swa byrnende æfter þam godspelle þam mæssepreoste mid
476ðam offrumsange.
477Ge sculon bletsian axan on caput ieiunium and mid halig
478wætere besprencgan.
479Do þonne se mæssepreost on ufeweardum his heafde myd ðære
480haligan rode tacne and on ealra þara manna,

page 216

481þe æt þære mæssan beoð, ærðamþe he mæssige
482and gan to processionem.
483Ge sculon on palmsunnandæge palmtwigu bletsian and beran mid
484lofsange to processionem and habban on
485handa, ge gehadade ge læwede, and offrian hig æfter þam
486godspelle þam mæssepreoste mid þam offrungsange.
487Nu gyf hwa nyte hwæt þis getacnige , he leornige æt
488oðrum menn on leden oððe on englisc.
489Beoð soðfæste, ic bidde, and betweox eow getriwe.
490Beoð eac snotere and swiðe rihtwyse.
491Ne beswice nan oðerne.
492Ne ge næ swerian man.
493Ne lufige higeleaste.
494Ne ge gligmenn ne beon.
495Sprecað butan aðe mid anfealdre bilewitnesse, swaswa se
496hælend tæhte on his haligum godspelle.

page 218

497Lufiað eow betweonan and gyf hwa lare ne cunne, he leornige
498æt oðrum, þe gelæred si and se mid eaðmodnysse hine
499gewissige.
500þæt we willað eac don, gif us hwa ahsað, swaswa us manað
501Moyses gesetniss: Interroga patrem tuum et adnuntiabit tibi
502et cetera ; Ahsa þinne fæder and he cyð þe ymbe God.
503Ahsa þine yldran; hi ðe andwyrdað and secgað.
504Uton beon gemyndige, hu se mildheorta Crist cwæð: Lufa
505ðinne drihten God mid ealre þinre heortan, and lufa þinne
506nihstan swaswa ðe sylfne.
507þas twa bebodu belucaþ ealle þa haligan lare.
508Forðon seðe God lufað, he gelyfð eac on hine and nele nan
509ðincg don þæs ðe Gode oflicige, ac, swaswa he firmest
510mæge, he gefilð his bebodu.
511And seðe his nihstan lufað, nele he him nan lað don ne his
512æhta him ætbredan dearnuncga oþþe eawuncga.

page 220

513Gefultmige us se hælend to his bebodum, seðe leofað and
514rixað mid his leofan fæder and þan haligum
515gaste on anre godcundnisse, hig ðri an God, æfre ryxiende a
516woruld.
517Amen.