1B14.23

page 236

2    In nomine Domini, anno dominicae incarnationis MVIII .
3ðis is seo gerædnes, þe Engla cyng & ægðer ge gehadode ge
4læwede witan gecuran and geræddan.
5ðæt is þonne ærest, þæt we ealle ænne God lufian &
6weorðian & ænne Cristendom georne healdan & ælcne
7hæðendom mid ealle aweorpan; & þæt we habbað ealle
8ægþer ge mid worde ge mid wedde gefæstnod, þæt
9we under anum cynedome ænne Cristendom healdan willað.
10& ures hlafordes gerædnes & his witena is, þæt man rihte
11laga up arære & ælce unlaga georne afylle,
12& þæt man læte beon æghwylcne man rihtes wyrþe,

page 238

13& þæt man frið & freondscype rihtlice healde innan
14þysan earde for Gode & for worolde.
15& ures hlafordes gerædnes & his witena is, þæt man
16Cristene menn & unforworhte of earde ne sylle,
17ne huru on hæþene leode, ac beorge man georne, þæt man þa
18sawla ne forfare, þe Crist mid his agenum life gebohte.
19& ures hlafordes gerædnes & his witena is, þæt man
20Cristene men for ealles to lytlum to deaðe ne fordeme.
21Ac elles geræde man friðlice steora folce to þearfe & ne
22forspille for lytlum Godes handgeweorc &
23his agenne ceap, þe he deore gebohte.
24& ures hlafordes gerædnes & his witena is, þæt ælces
25hades menn georne gebugan for Gode & for worolde,
26ælc to þam rihte, þe him to gebyrige.
27& huruþinga Godes þeowas biscopas & abbudas, munecas &
28mynecena, preostas & nunnan to rihte gebugan
29& regollice libban & for eall Cristen folc þingian georne.
30& ures hlafordes gerædnes & his witena is, þæt muneca
31gehwylc, þe ute sy of mynstre & regoles ne gyme,
32do swa him þearf is: gebuge georne into mynstre mid
33eallum eadmettum & misdæda geswice & bete
34swyþe georne þæt he abrocen hæbbe; geðence word & wedd,
35þe he Gode betæhte.
36& se munuc, þe mynster næbbe, cume scirebiscope & trywsie
37hine sylfne wið God & wið men, & he huru
38þreo þing þanan forð healdan wille, þæt is his
39clænnese & munuclice scrudware & þeowian his Drihtne,
40swa wel swa he betst mæge.
41& gyf he þæt gelæste, þonne bið he wyrðe, þæt hine
42man þe bet healde, wunige þær he wunige.
43& canonicas, þær seo ar sy, þæt hy beoddern & slæpern
44habban magan, healdan heora mynster mid rihte
45& mid clænnesse, swa heora regol tæce: oððon riht is,
46þæt þolige þære are se ðe þæt nelle.
47& ealle mæssepreostas we biddað & lærað, þæt hy beorgan
48heom sylfum wið Godes yrre.
49Fulgeorne hy witan, þæt hy nagon mid rihte þurh
50hæmedþing wifes gemanan.

page 240

51& se ðe þæs geswican wille & clænnesse healdan, hæbbe he
52Godes miltse, & þær to eacan to woroldweorðscype,
53þæt he sy þegenweres & þegenrihtes wyrðe, ge on
54life ge on legere.
55& se þe þæt nelle þæt his hade gebyrige: wanige his
56weorðscype ge for Gode ge for worolde.
57& æghwylc Cristen man eac unriht hæmed georne forbuge &
58godcunde laga rihtlice healde.
59& sy ælc cyrice on Godes griðe & on ðæs cynges & on
60ealles Cristenes folces.
61& ænig man heonan forð cyrican ne ðeowige, ne cyricmagunge
62mid unriht ne macie, ne cyricþen ne utige
63butan biscopes geþehte.
64& gelæste man Godes gerihta georne æghwylce geare.
65ðæt is sulhælmessan XV niht onufan eastran & geogoðe
66teoðunge be pentecosten & eorðwæstma be ealra
67halgena mæssan & Romfeoh be Petres mæssan & leohtgescot
68þriwa on geare.
69& saulsceat is rihtast, þæt man symle gelæste æt openum
70græfe.
71& gyf man ænig lic of rihtscriftscire elles hwar lecge,
72gelæste man saulsceat swa þeh into þam mynstre,
73þe hit to hyrde.
74& ealle Godes gerihta fyrðrige man georne, ealswa hit þearf
75is.
76& freolsa & fæstena healde man rihtlice.
77Sunnandæges freols healde man georne, swa þærto gebyrige.
78& cypinga & folcgemota on ðam halgan dæge geswice man
79georne.
80& sancte Marian freolstida ealle weorðie man georne ærest
81mid fæstene & syððan mid freolse.
82& to æghwylces apostoles heahtide fæste man & freolsige;
83buton to Philippus & Iacobus freolse ne beode
84we nan fæsten for þam eastorlican freolse.
85Elles oðre freolsa & fæstena healde man georne, swa swa þa
86heoldan þa ðe betst heoldan.
87& sancte Eadwerdes mæssedæg witan habbað gecoren, þæt
88man freolsian sceal ofer eal Englaland on XV
89kalendas Aprilis .
90& fæstan ælce Frigedæg, butan hit freols sy.

page 242

91& ordal & aðas syndan tocweðen freolsdagum &
92rihtymbrendagum & fram Adventum Domini oð octabas Epiphanię
93& fram Septuagessimam oð XV niht ofer eastran.
94& beo ðam halgum tidan, ealswa hit riht is, eallum Cristenum
95mannum sib & som gemæne, & ælc sacu getwæmed.
96& gyf hwa oðrum scyle borh oððon bote æt woroldlican
97þingan, gelæste hit georne ær oððon æfter.
98& sy ælc wydewe, þe hy sylfe mid rihte gehealde, on Godes
99griðe & on þæs cynges.
100& sitte ælc XII monað werleas; ceose syððan þæt heo
101sylf wille.
102& æghwylc Cristen man do, swa him þearf is: gyme his
103Cristendomes georne & gewunige gelomlice to scrifte
104& unforwandodlice his synna gecyðe & geornlice bete,
105swa swa him man tæce.
106& gearwige eac to huslgange oft & gelome gehwa hine sylfne,
107& word & weorc fadige mid rihte & að
108& wedd wærlice healde.
109& æghwylc unriht aweorpe man georne of þysan earde, þæs
110þe man gedon mæge.
111& swicollice dæda & laðlice unlaga ascunige man swyðe,
112þæt is: false gewihta & woge gemeta & lease
113gewitnessa & fracodlice ficunga, & egeslice manswara &
114deoflice dæda on morðweorcan & on manslihtan,
115on stalan & on strudungan, on gitsungan & on gifernessan,
116on ofermettan & on oferfyllan, on swiccræftan
117& on mistlican lahbrycan, on hadbrycan & on
118æwbrican & on mæniges cynnes misdædan.
119Ac lufige man Godes riht heonan forð georne wordes & dæde;
120þonne wyrð þysse þeode sona God milde.
121& beo man georne ymbe friðes bote & ymbe feos bote æghwar
122on earde, & ymbe burhbota on æghwylcan ende
123& ymbe fyrdunga eac, be ðam þe man geræde, aa þonne
124neod sy.
125& ymbe scipfyrðunga, swa man geornost mæge, þæt æghwylc
126geset sy sona ofer eastran æghwylce geare.

page 244

127& gyf hwa butan leafe of fyrde gewende, þe se cyning sylf on
128sy, plihte him sylfum & ealre his are.
129& se þe elles of fyrde gewende, beo se CXX scillinga
130scyldig.
131& gyf ænig amansumad man, butan hit friðbena sy, on þæs
132cynges neaweste ahwar gewunige, ær ðam þe
133he hæbbe godcunde bote georne gebogene, þonne plihte he him
134sylfum & eallan his æhtan.
135& gyf hwa ymb cyninges feorh syrwe, sy he his feores scyldig;
136& gif he ladian wille, do þæt be ðæs
137cynges wergylde oððe mid þryfealdan ordale on Engla lage.
138& gyf hwa forsteal oððon openne wiþercwyde ongean lahriht
139Christes oððe cyninges ahwar gewyrce, gylde
140swa wer swa wite swa lahslite, aa be ðam þe seo dæd sy.
141& gyf he ongean riht þurh æhlyp geonbyrde & swa gewyrce,
142þæt hine man afylle, licge ægylde eallan his freondan.
143& æfre alicgan heonan forð þa unlaga, þe ær þysan
144wæran to gewunelice wide.
145& æghwylce unlaga alecge man georne.
146Forþam þurh þæt hit sceal on earde godian to ahte, þe
147man unriht alecge & rihtwisnesse lufie for Gode & for worolde.
148Ealle we scylan ænne God lufian & weorðian & ælcne
149hæðendom mid ealle aweorpan.

page 246

150& utan ænne cynehlaford holdlice healdan & lif & land samod
151ealle werian, swa wel swa we betst magan,
152& God ealmihtigne inwerdre heortan fultumes biddan.
153
154B14.24

page 246

155    Be witena gerædnessan.
156þis syndan þa gerædnessa, þe Engla rædgifan gecuran &
157gecwædan & geornlice lærdan, þæt man scolde healdan.
158& þæt is þonne ærest þæra biscpa frumræd, þæt we
159ealle fram synnum georne gecyrran, þæs þe we don magan,
160& ure misdæda andettan georne & geornlice betan, &
161ænne God rihtlice lufian & weorðian & ænne
162Cristendom anrædlice healdan & ælcne hæþendom georne
163forbugan, & gebedrædene aræran georne us betweonan,
164& sibbe & some lufian georne, & anum cynehlaforde
165holdlice hyran & georne hine healdan mid rihtan getrywðan.
166& witena gerædnes is, þæt abbodas & abbodissan heora agen
167lif rihtlice fadian & eac heora heorda wislice healdan.
168& þæt ælces hades men georne gebugan for Gode & for
169worolde, ælc to þam rihte þe him to gebyrige.
170& huruþinga Godes þeowas biscpas & abbodas, munecas &
171mynecena, canonicas & nunnan to rihte gecyrran
172& regollice libban & for eall Cristen folc þingian
173georne.

page 248

174& witena gerædnes is, þæt muneca gehwilc, þe ute of
175mynstre sy, & regoles ne gyme, do swa him þearf is.
176gebuge georne into mynstre mid eallum eaðmettum & misdæda
177geswice & bete swyþe georne þæt he abrocen
178hæbbe; geþence word & wedd, þe he Gode betæhte.
179& se munuc, þe mynster næbbe, cume to scirebisceope &
180trywsige hine sylfne wið God & wið men, þæt he
181huru þreo þing þanon forð healdan wille, þæt is: his
182clænnesse & munuclice scrudware & þeowian his
183Drihtne, swa wel swa he betst mæge.
184& gif he þæt gelæste, þonne bið he weorðe, þæt hine
185man þe bet healde, wunige þær he wunige.
186& canonicas, þær seo ar sy, þæt hy beodern & slæpern
187habban magan, healdan heora mynster mid clænnesse,
188swa heora regol tæce; oþþon riht is, þæt þolige
189þære are se þe þæt nelle.
190& ealle Godes þeowas, & huruþinga sacerdas, we biddað &
191lærað, þæt hy Gode hyran & clænnesse lufian
192& beorhgan him sylfum wið Godes yrre.
193Fulgeorne hi witan, þæt hy nagon mid rihte þurh ænig
194hæmedþing wifes gemanan.
195Ac hit is þe wyrse, þe sume habbað twa oððe ma, & sum,
196þeh he forlæte þa he ær hæfde, he be lifiendre
197þære eft oþere nimð, swa ænigan Cristenan mæn ne
198gedafenað to donne.
199& se ðe þæs geswican wille & clænnesse healdan, hæbbe he
200Godes miltse, & þær to eacan to woroldweorðscipe,
201þæt he sy þegenweres & þegenrihtes wyrþe ge on
202life ge on legere.
203& se þe þæt nelle, þæt his hade gebyrige, wanige his
204weorðscipe ægðer ge for Gode ge for worolde.
205& la gyt we willað biddan freonda gehwylcne & eal folc eac
206læran georne, þæt hy inwerdre heortan ænne
207God lufian & ælcne hæþendom georne ascunian.
208& gif wiccan oððe wigeleras, scincræftcan oððe
209horcwenan, morðwyrhtan oððe mansworan ahwar on earde
210wurðan agytene, fyse hy man georne ut of þysan earde &
211clænsige þas þeode, oþþe on earde forfare
212hy mid ealle, butan hy geswican & þe deoppor gebetan.

page 250

213& witena gerædnes is, þæt man rihte laga up arære for
214Gode & for worolde & æghwilce unlaga georne afylle,
215& þæt man heonan forð læte manna gehwylcne, ge
216earmne ge eadigne, folcrihtes wyrðe, & þæt
217man frið & freondscipe rihtlice healde innan þysan earde
218for Gode & for worolde.
219& witena gerædnes is, þæt man Christene men & unforworhte
220of earde ne sylle, ne huru on hæþene þeode;
221ac beorge man georne, þæt man þa sawla ne forfare, þe
222Crist mid his agenum life gebohte.
223& witena gerædnes is, þæt man Christene men for ealles to
224lytlan to deaðe ne forræde.
225Ac elles geræde man friðlice steora, folce to þearfe, & ne
226forspille for lytlum Godes agen handgeweorc
227& his agenne ceap, þe he deore gebohte.
228Ac æghwilce dæde toscade man wærlice & dom æfter dæde
229medemige be mæþe, swa for Gode sy gebeorhlic
230& for worolde aberendlic.
231& geþence swyþe georne se þe oþrum deme, hwæs he sylf
232gyrne, þonne he þus cweðe: Et dimitte nobis
233debita nostra et reliqua .
234& we lærað swyþe geornlice, þæt æghwilc Christen man
235unriht hæmed georne forbuge & Christene lage rihtlice healde.
236& æfre ne geweorðe, þæt Christen man gewifige in VI manna
237sibfæce on his agenum cynne, þæt is binnan
238þam feorþan cneowe, ne on þæs lafe, þe swa neah wære
239on woroldcundre sibbe, ne on þæs wifes nydmagan,
240þe he ær hæfde.
241Ne on gehalgodre ænigre nunnan, ne on his gefæderan, ne on
242ælætan ænig Cristen man ne gewifige æfre.
243ne na ma wifa þonne an hæbbe; ac beo be þære anre, þa
244hwile þe heo libbe, se þe wille Godes lage
245gyman mid rihte & wiþ hellebryne beorgan his sawle.
246& sy ælc cyrice on Godes griþe & on þæs cynges & on
247ealles Cristenes folces.
248& sy ælc cyricgrið binnan wagum & cyninges handgrið efen
249unwemme.
250& ænig man heonan forð cyrican ne þowige, ne cyricmangunge
251mid unrihte ne macige, ne cyricþen ne
252utige butan biscopes geþehte.

page 252

253& gelæste man Godes gerihta æghwilce geare rihtlice georne,
254þæt is sulhælmessan huru XV niht ofer eastron
255& geogoðe teoþunge be pentecosten & eorðwæstma be
256ealra halgena mæssan
257& Romfeoh be Petres mæssan & cyricsceat to Martinus mæssan
258& leohtgescot þriwa on geare
259& saulsceat is rihtast, þæt man symble gelæste aa
260æt openum græfe.
261& gif man ænig lic of rihtscire elles hwar lecge, gelæste
262man þone saulsceat swa þeh into þam mynstre,
263þe hit to hyrde.
264& ealle Godes gerihta fyrþrige man georne, ealswa hit þearf
265is.
266& freolsa & fæstena healde man rihtlice.
267Sunnandæges freols healde man georne, swa þærto gebyrige;
268& cypinga & folcgemota & huntaðfara & woroldlicra
269weorca on þam halgan dæge geswice man georne.
270& sancta Marian heahfreolstida ealle weorðige man georne,
271ærest mid fæstene & syþþan mid freolse.
272& to æghwilces apostoles heahtide fæste man georne, butan
273to Philippus & Iacobus freolse ne beode
274we nan fæsten for þam easterlican freolse, butan hwa wille.
275elles oþre freolsa & fæstena healde man georne, swa swa þa
276heoldan þa þe betst heoldan,
277& ymbren & fæstena, swa swa sanctus Gregorius Angelcynne
278sylf hit gedihte.
279& fæste man ælce Frigedæge, butan hit freols sy.
280& ordal & aþas & wifunga æfre syndan tocwedene
281heahfreolsdagum & rihtymbrenum & fram Aduentum Domini
282oð octabas Epiphanige & fram Septuagessima oð XV niht
283ofer eastran.
284& beo þam halgan tidan, ealswa hit riht is, eallum
285Cristenum mannum sibb & som gemæne, & ælc sacu
286totwæmed.

page 254

287& gif hwa oðrum scyle borh oððe bote æt woroldlican
288þingan, gelæste hit him georne ær oððon æfter.
289& sy ælc wydewe, þe hy sylfe mid rihte gehealde, on Godes
290griðe & on þæs cynges.
291& sitte ælc XII monað werleas; ceose syþþan þæt heo
292sylf wille.
293& æghwilc Christen man do, swa him þearf is: gyme his
294Christendomes georne & gewunige gelomlice to
295scrifte & unforwandodlice his synna gecyðe & geornlice bete,
296swa swa him man tæce.
297& gearwige eac to huslgange huru þriwa on geare gehwa hine
298sylfne, þe his agene þearfe wille understandan,
299swa swa him þearf is.
300& word & weorc freonda gehwilc fadige mid rihte & að & wedd
301wærlice healde.
302& æghwilc unriht aweorpe man georne of þysan earde, þæs
303þe man don mæge.
304& swicollice dæda & laðlice unlaga ascunige man swyðe,
305þæt is false gewihta & woge gemeta & lease
306gewitnessa & fracodlice ficunga & fule forligra & egeslice
307manswara & deoflice dæda on morðweorcum
308& on manslihtan, on stalan & on strudungan, on gitsungan & on
309gifernessan, on ofermettan & on oferfyllan,
310on swiccræftan & on mistlican lahbrican, on æwbrican
311& on hadbrican, on freolsbricon & on fæstenbricon,
312on cyricrenan & on mæniges cynnes misdædan.
313& la understande man georne, þæt eal swylc is to leanne &
314næfre to lufianne.
315Ac lufige man Godes riht heonan forþ georne wordes &
316weorces; þonne wyrð þysse þeode sona God milde.
317Wutan eac ealle ymbe friþes bote & ymbe feos bote smeagean
318swyðe georne:
319swa ymbe friþes bote, swa
320þam bondan sy selost & þam þeofan sy laþost,
321& swa ymbe feos bote, þæt an mynet gange ofer ealles
322þas þeode butan ælcon false.
323& gemeta & gewihta rihte man georne, & ælces unrihtes heonan
324forð geswice.
325& burhbota & bricbota aginne man georne on æghwilcon ende, &
326fyrdunga eac & scipfyrdunga ealswa, a
327þonne neod sy, swa swa man geræde for gemænelicre neode.
328& wærlic bið, þæt man æghwilce geare sona æfter eastron
329fyrdscipa gearwige.
330& gyf hwa folces fyrdscip awyrde, gebete þæt georne, &
331cyninge þa munde; & gif hit man amyrre, þæt
332hit ænote weorðe, forgylde hit fullice, & cyninge þone
333mundbrice.

page 256

334& gif hwa of fyrde butan leafe gewende, þe cyning sylf
335on sy, plihte his are.
336& gif morðwyrhtan oððe mansworan oððe æbære manslagan
337to þam geþristian, þæt hy on þæs cyninges neaweste
338gewunian, ær þam þe hy habban bote agunnen for Gode
339& for worolde, þonne plihton hy heora are
340& eallon heora æhtan, butan hit friðbenan syndan.
341& gyf hwa ymbe cyninges feorh syrwe, sy he his feores scyldig
342& ealles þæs þe he age, gif hit him
343ongesoþod weorðe; & gif he hine ladian wille & mage, do
344þæt be þam deopestan aðe oþþe mid þryfealdan
345ordale on ængla lage, & on Dena lage be þam þe heora lagu
346sy.
347& gif hwa forsteal ongean lahriht Cristes oþþe cyninges
348ahwar gewyrce, gylde wer oþþe wite be þam
349þe seo dæd sy; & gif he geonbyrde & sylf gewyrce, þæt hine
350man afylle, licge ægylde.
351& gif hwa nunnan gewemme oþþe wydewan nydnæme, gebete
352þæt deope for Gode & for worolde.
353& smeage man symle on æghwilce wisan, hu man fyrmest mæge
354ræd aredian, þeode to þearfe, & rihtne Christendom
355swyþost aræran & æghwilce unlaga geornost afyllan.
356Forþam þurh þæt hit sceal on earde godian to ahte, þe
357man unriht alecge & rihtwisnesse lufige for Gode & for worolde.
358
359B14.30.1

page 278

360    ðis is seo gerædnys, þe Cnut ciningc, ealles Englalandes
361ciningc & Dena cining mid his witena geþeahte
362gerædde, Gode to lofe & him sylfum to cynescipe & to
363þearfe; & þæt wæs on ðære halgan midewintres
364tide on Winceastre.
365ðæt is þonne ærest, þæt hi ofer ealle oþre þingc
366ænne God æfre woldan lufian & wurðian & ænne Cristendom
367anrædlice healdan, and Cnut cingc lufian mid rihtan
368getrywþan.

page 280

369And Godes cyrican griðian & friðian & gelomlice secean
370saulum to hæle & us sylfum to þearfe.
371ælc cyrice is mid rihte on Cristes agenan griðe; & ælc
372Cristen man ah mycele þearfe, þæt he on þam
373griðe mycele mæðe wite; forðam Godes grið is ealra
374griða selost to geearnigenne & geornost to healdenne,
375& þær nehst cininges.
376þonne is swiðe rihtlic, þæt Godes ciricgrið binnon wagum
377& Cristenes ciningces handgrið stande æfre
378unwemme; & se ðe aðor fulbrece, þolige landes & lifes,
379butan se ciningc gearian wylle.
380And gyf æfre ænig mann heonon forð Godes cyricgrið swa
381abrece, þæt he binnon ciricwagum mannslaga
382weorðe, þonne sig þæt botleas, & ehte his ælc þæra þe
383Godes freond sig, butan þæt geweorðe, þæt he
384þanon ætberste & swa deope friðsocne gesece, þæt se
385cyningc him þurh ðæt feores geunne, wiþ fulre bote
386ge wið God ge wið menn.
387And þæt is þonne ærest, þæt he his agenne wer Criste &
388þam cyningce gesylle, & mid þam hine sylfne
389inlagie to bote.

page 282

390& gif hit þonne to bote gega, & se cyningc þæt geþafige,
391þonne bete man þæt cyricgrið into þære cyricean
392be ciningces fullan mundbryce, & þa
393mynsterclænsunge begyte, swa þærto gebyrige, & ægþer
394mægbote ge manbote fullice gebete, & wið God huru þingie
395georne.
396And gyf elles be cwicum mannum ciricgrið abrocen sy, bete
397man georne be þam þe seo dæd sy, sy hit
398þurh feohtlac, si hit þurh reaflac, sig þurh þæt þe
399hit sy.
400Bete man ærest þone griðbryce into þære cyrican, be þam
401þe seo dæd sy & be þam þe ðære cyricean mæð sy.
402Ne synd ealle cyricean na gelicre mæðe woruldlice
403wurðscipes wyrðe, þeah hig godcundlice habban halsunge
404gelice.
405Heafodmynstres griðbryce is æt botwyrþum þingum be
406cingces munde, þæt is mid V pundum on Engla lage
407& on Centlande æt þam mundbryce V pund þam cingce & þreo
408þam arcebiscope, & medemran mynstres mid
409CXX scillingum, þæt is be cingces wite, & þonne gyt
410læssan, þær lytel þeowdom sig, & legerstow þeah
411sig, mid LX scillingum, and feldcyricean, þær legerstow ne
412sig, mid XXX scyllingum.

page 284

413Eallum Cristenum mannum gebyrað swiðe rihte, þæt hig
414haligdom & hadas & gehalgode Godes hus æfre swiþe
415georne griðian & friðian, & þæt hi hada gehwylcne
416weorðian be mæðe.
417Forþam, understande se ðe cunne, mycel is & mære þæt
418sacerd ah to donne folce to þearfe, gif he his
419Drihtne gecwemeð mid rihte.
420Mycel is seo halsung & mære is seo halgung, þe deofla
421afyrsað & on fleame gebringeð, swa oft swa man
422fullað oððe husel halgað; & halige englas þær abutan
423hwearfiað & þa dæda beweardiað & þurh Godes
424mihta þam sacerdon fylstað, swa oft swa hig Criste ðeniað
425mid rihte.
426& swa hi doð symle, swa oft swa hig geornlice inweardre
427heortan clypiað to Criste & for folces neode
428þingiað georne; & þi man sceal for Godes ege mæðe on
429hade gecnawan mid gesceade.
430And gyf hit geweorðe, þæt man mid tyhtlan & mid uncræftum
431sacerd belecge, þe regollice libbe, & he
432hine sylfne wite þæs clænne, mæssige, gyf he durre, &
433ladige on þam husle he ana hine sylfne, æt anfealdre
434spæce.
435& æt þryfealdre spæce ladige he, gyf he durre, eac on þam
436husle mid twam his gehadan.

page 286

437Gif man deacon tihtlige, þe regollice libbe, anfealdre
438spæce, nime twegen his gehadan & ladige hine mid þam.
439& gyf man hine tihtlige þryfealdre spæce, nime VI his
440gehadan & ladige hine mid ðam & beo he sylf seofeþa.
441Gif man folciscne mæssepreost mid tihtlan belecge, ðe
442regollif næbbe, ladige hine swa diacon þe regollife libbe.
443And gyf man freondleasne weofodþen mid tihtlan belecge, þe
444aðfultum næbbe, ga to corsnæde & þær þonne
445æt gefare þæt þæt God wylle, buton he on husle
446geladian mote.
447And gyf man gehadodne mid fæhþe belecge & secge, þæt he
448wære dædbana oððe rædbana, ladige mid his magum,
449þe fæhðe moton mid beran oððe forebetan.
450& gyf he sig mægleas, ladige mid geferan oððe on fæsten
451fo, gif he þæt þurfe, & ga to corsnæde & þæræt
452gefare, swa swa God ræde.
453And na þearf ænig mynstermunuc ahwær mid rihte fæhðbote
454biddan ne fæhþbote betan: he gæð of his mægðlage,
455þonne he gebyhð to regollage.
456And gyf mæssepreost æfre ahwær stande on leasre gewitnesse

page 288

457oððe on mænan aðe oððe þeofa gewita oððe
458gewyrhta beo, þonne sy he aworpen of gehadodra gemanan &
459þolige ægþer ge geferscipes ge freondscipes
460ge æghwylces weorðscipes, butan he wið God & wið menn
461þe deoplicor gebete, swa bisceop him tæce,
462& him borh finde, þæt he þanon forð æfre swylces
463geswice.
464& gyf he ladian wylle, geladige þonne be dæde mæðe, swa
465mid þryfealdre swa mid anfealdre lade, be
466ðam þe seo dæd sy.
467And we wyllað, þæt ælces hades menn georne gebugan, ælc
468to þam rihte þe him to gebyrige.
469& huruþinga Godes þeowas bisceopas & abbodas, munecas &
470mynecena, canonicas & nunnan to rihte gebugan
471& regollice libban & dæges & nihtes oft & gelome clypian
472to Criste & for eall Cristen folc þingian georne.
473& ealle Godes þeowas we biddað & lærað & huruþinga
474sacerdas, þæt hi Gode hyran & clænnesse lufian
475& beorgan heom sylfum wið Godes yrre & wið ðone weallendan
476bryne, þe weallað on helle.
477Fullgeorne hig witan, þæt hig nagon mid rihte þurh
478hæmedþingc wifes gemanan.

page 290

479& se ðe þæs geswican wille & clænnesse healdan, hæbbe he
480Godes miltse & to woruldwurðscipe si he þegenlage wyrðe.
481And æghwylc Cristen mann eac for his Drihtenes ege
482unrihthæmed georne forbuge & godcunde lage rihtlice healde.
483And we lærað & biddað & on Godes naman beodað, þæt
484ænig Cristen mann binnon VI manna sibfæce on his
485agenum cynne æfre ne gewifie, ne on his mæges lafe, þe
486swa neahsib wære, ne on þæs wifes nedmagon,
487þe he sylf ær hæfde.
488ne on his gefæderan, ne on gehalgodre nunnan, ne on
489ælætan ænig Cristen mann æfre ne gewifige.
490ne ænige forligru ahwar ne begange.
491ne na ma wifa þonne an hæbbe, & þæt beo his beweddode
492wif, & beo be þære anre, þa hwile þe heo libbe
493þus scyldon æfre ge, se ðe wyle Godes lage giman mid
494rihte & wið hellebryne beorhgan his sawle.
495And gelæste mann Godes gerihta æghwylce geare rihtlice
496georne.
497þæt is sulhælmesse XV niht ofer Eastran & geoguþe
498teoðunge

page 292

499be Pentecosten & eorðwæstma be Ealra halgena
500mæssan.
501& gyf hwa þonne þa teoþunge gelæstan nelle, swa we
502gecweden habbað, þæt is se teoða æcer, ealswa seo
503sulh hit gega, þonne fare þæs cingces gerefa to & þæs
504bisceopes & þæs landrican & þæs mynstres mæssepreost,
505& nime unþances ðone teoðan dæl to þam
506mynstre, þe hit to gebyrige.
507& tæcan him to þam nigoðan dæle, & todæle mann þa eahta
508dælas on twa, & fo se landhlaford to healfum,
509to healfum se bisceop, si hit ciningces mann, se hit
510þegnes.
511And Romfeoh be Petres mæssan; & se ðe ofer þæne dæg
512hit healde, agyfe þam bisceope þæne penig &
513þærto XXX & þam cingce CXX scyllinga.
514And cyricsceat to Martines mæssan. & se ðe hine ofer
515þæne dæg healde, agyfe hine þam bisceope
516& forgylde hine XI siðan & ðam cingce CXX scyllinga.

page 294

517Gyf hwa þonne þegna sig, þe on his boclande cyrican
518hæbbe, þe legerstow on sig, gesylle þone þriddan
519dæl his agenre teoþunge into his cyrican.
520And gyf hwa cyricean hæbbe, þe legerstow on ne sig, do he
521of ðam nigon dælum his preoste þæt þæt he wylle.
522& ga ælc cyricsceat into þam ealdan mynstre be ælcon
523frigan heorðe.
524And leohtgesceot þriwa on geare: ærest on Easteræfen
525healfpenigwurð wexes æt ælcere hide & eft on
526Ealra halgena mæssan ealswa mycel & eft to þæm sanctan
527Marian clænsunge ealswa.
528And sawlsceat is rihtast, þæt man symle gelæste a æt
529openum græfe.
530And gyf man ænig lic of rihtscriftscire elles hwær lecge,
531gelæste man þone sawlsceat swa þeah into
532þam mynstre, þe hit to hyrde.
533And ealle Godes gerihta fyrðrige man georne, ealswa hit
534þearf is.
535And freolsa & fæstena healde mon rihtlice.
536& healde man ælces Sunnandæges freolsunge fram
537Sæternesdæges none oð Monandæges lihtingce & ælcne
538oðerne mæssedæg, swa he beboden beo.
539& Sunnandaga cypingce we forbeodað eac eornostlice & ælc
540folcgemot,

page 296

541butan hit for micelre neodþearfe sig.
542& huntaðfara & ealra woruldlicra weorca on þam halgan dæge
543geswicæ man georne.
544
545B14.30.2

page 308

    
546þis is seo woruldcunde gerædnes, þe ic wylle mid minan
547witenan ræde, þæt man healde ofer eall Englaland.
548ðæt is þonne ærest, þæt ic wylle, þæt man rihte laga
549upp arære & æghwylce unlaga georne afylle, & þæt
550man aweodige & awyrtwalige æghwylce unriht, swa man
551geornost mæge, of þysum earde, & arære up Godes riht.
552& heonon forð læte manna gehwylcne, ge earmne ge eadigne,
553folcrihtes weorðne, and him man rihte domas deme.
554And we lærað, þæt, þeah hwa agylte & hine sylfne deope
555forwyrce, þonne gefadige man steore, swa hit
556for Gode sy gebeorhlic & for worulde aberendlic.
557& geþence swyþe georne se ðe domes geweald age, hwæs he
558sylf gyrne, þonne he þus cweðe: Et dimitte
559nobis debita nostra, sicut et nos dimittimus ; þæt is on
560Englisc: & forgyf us, Drihten, ure gyltas,
561swa we forgyfað þam ðe wið us agyltað.
562And we beodað, þæt man Cristene men for ealles to lytlum
563huru to deaþe ne forræde;

page 310

564ac elles geræde
565man friðlice steora folce to þearfe & ne forspille for
566lytlum Godes handgeweorc & his agenne ceap,
567þe he deore gebohte.
568And we beodað, þæt man Cristene men ealles to swiðe of
569earde ne sylle ne on hæðendome huru ne gebringe;
570ac beorge man georne, þæt man þa saule ne forfare,
571þe Crist mid his agenum life gebohte.
572And we beodað, þæt man eard georne clænsian aginne on
573æghwylcan ende & manfulra dæda æghwær geswice.
574And gif wiccean oððe wigleras, morðwyrhtan oððe horcwenan
575ahwær on lande wurðan agitene, fyse hig man
576georne ut of þysum earde, oððon on earde forfaran hig
577mid ealle, butan hig geswican & þe deoppar gebetan.
578And we beodað, þæt wiðersacan & utlagan Godes & manna of
579eardæ gewitan, butan hig gebugan & þe geornor gebetan.

page 312

580And þeofas & þeodsceaðan to timan forweorðan, butan hig
581geswican.
582And we forbeodað eornostlice ælcne hæðenscipe.
583Hæðenscipe byð, þæt man deofolgyld weorðige, þæt is
584þæt man weorþige hæðene godas & sunnan oððe monan,
585fyr oððe flod, wæterwyllas oððe stanas oððe
586æniges cynnes wudutreowa, oððon wiccecræft lufige
587oððon morðweorc gefremme on ænige wisan, oððon on blote
588oððon fyrhte, oððon swylcra gedwimera ænig þingc dreoge.
589Manslagan & manswaran, hadbrecan & æwbrecan gebugan &
590gebetan, oððe of cyððe mid synnan gewitan.
591Licceteras & leogeras, ryperas & reaferas Godes graman
592habban, butan hig geswican & þe deoppar gebetan.
593& se ðe eard wylle rihtlice clænsian & unriht alecgan &
594rihtwisnesse lufian, þonne mot he georne þyllices
595styran & þyllic ascunian.

page 314

596Uton eac ealle ymbe friðes bote & feos bote smeagan swyðe
597georne : swa embe friðes bote, swa ðam bondan
598si selost & þam þeofan si laþast; and swa embe feos
599bote, þæt an mynet gange ofer ealle þas þeode
600butan ælcan false; & þæt nan man ne forsace.
601And se ðe ofer þis fals wyrce, þolige þæra handa, þe he
602þæt fals mid worhte; & he hi mid nanon þingon
603ne gebicge, ne mid golde ne mid seolfre.
604And gyf man þonne þæne gerefan teo, þæt he be his leafe
605þæt fals worhte, ladige hine mid þryfealdre
606lade; & gyf seo lad þonne berste, hæbbe þone ylcan dom,
607þe se þe þæt fals worhte.
608And gemeta & gewihta rihte man georne & ælces unrihtes
609heonon forð geswice.
610& burhbota & bricbota & scipforðunga aginne man georne, &
611fyrdunga eac swa, a þænne þearf si for gemænelicre neode.

page 316

612And smeage man symle on æghwylce wisan, hu man fyrmest mæge
613ræd aredian þeode to þearfe & rihtne Cristendom
614swyðost aræran & æghwylce unlage geornost
615afyllan.
616Forðam þurh þæt hit sceal on earde godian to ahte, þæt
617man unriht alecge & rihtwisnesse lufige for
618Gode & for worulde. Amen.
619ðis syndon þa gerihta, þe se cingc ah ofer ealle men on
620Wessexan: þæt is mundbryce & hamsocne, forsteal
621& flymena fyrmðe & fyrdwite, butan he hwæne ðe
622furðor gemæðrian wylle & he him ðæs weorðscipes geunne.
623& se ðe utlages weorc gewyrce, wealde se cingc þæs friþes.
624And gyf he bocland hæbbe, þæt sy forworht þam cingce to
625handa, si ðæs mannes man, þe he sig.
626And lochwa þone flyman fede oððe feormie, gylde V pund
627þam cingce, butan he hine geladige, þæt he
628hine fleame nyste.

page 318

629And on Myrcean he ah, eallswa her beforan awriten is, ofer
630eall men.
631And on Dæna lage he ah fihtewita & fyrdwita, gryðbryce &
632hamsocne, butan he hwæne ðe furður gemæðrian wylle.
633And gyf hwa þæne friðleasan man healde oððe flyman
634feormie, bete þæt, swa hit ær lagu wæs.
635And se ðe unlage rære oððe undom gedeme heonon forð, for
636læððe oððe for feohfange, beo se wið þone
637cingc CXX scyllinga scyldig on Engla lage, butan he mid aðe
638cyðan durre, þæt he hit na rihtor ne cuþe,
639& þolige aa his þegnscipes, butan he hine æt þam
640cingce eft gebicge, swa he him geþafian wylle.
641And on Dena lage lahslites scyldig, butan he geladige, þæt
642he na bet ne cuðe.

page 320

643And se ðe rihte lage & rihtne dom forsace, beo se scyldig
644wið þone þe hit age: swa wið cyningc CXX
645scyllinga, swa wið eorl LX scyllinga, swa wið hundred XXX
646scyllinga, swa wið ælc þæra, gyf hit swa
647geweorðeþ, on Engla lage.
648And se ðe on Dena lage rihte lage wyrde, gylde he lahslit.
649And se þe oþerne mid wo forsecgan wylle, þæt he aðer
650oððe feo oððe freme þe wyrse sig, gyf þonne se
651oðer þæt geunsoðian mæge, þæt him man on secgan
652wolde, sy he his tungan scyldig, butan he hine mid
653his were forgylde.
654And ne gesece nan man ðone cingc, butan he ne mote beon
655nanes rihtes wyrðe innan his hundrede.
656And sece man hundredes gemot be wite, eallswa hit is to
657secenne.
658& hæbbe mann þriwa on geare burhgemot & tuwa scirgemot,
659butan hit oftor sig.
660& þær beo on þære scire bisceop & se ealdorman, & þær
661ægþer tæcan ge Godes riht ge woruldriht.
662And ne nime nan man nane næme ne innan scire ne ut of

page 322

663scire,
664ær mann hæbbe þriwa on hundrede his rihtes gebeden.
665Gif he æt þam þriddan cyrre nan riht næbbe, þonne fare
666he feorðan siðe to scirgemote, & seo scir him
667sette þone feorðan andagan.
668Gyf se þonne berste, nime þonne leafe ægþer ge heonon ge
669þanan, þæt he mote hentan æfter his agenan.
670& we wyllað, þæt ælc freoman beo on hundrede & on
671teoðunge gebroht, þe lade wyrðe beon wylle oððon
672weres wyrðe, gyf hine hwa teon wylle, ofer þæt he byð
673XIIwintre; oððon he ne beo syððan æniges freorihtes
674wyrðe.
675Si he heorðfæst, si he folgere, þæt ælc si on hundrede &
676on borge gebroht, & gehealde se borh hine
677& gelæde to ælcan rihte.
678Manig strec man wyle, gyf he mæg & mot, werian his man, swa
679hwæðer swa him þingð, þæt he hine eað
680awerian mæge,

page 324

681swa for frigne swa for þeowne; ac we nellað
682geðafian þæt unriht.
683Ac we wyllað, þæt ælc man ofer XII wintre sylle þone að,
684þæt he nelle þeof beon ne þeofes gewita.
685& sy ælc getrywa man, þe tihtbysig nære, & naðor ne
686burste ne að ne ordal, innan hundrede anfealdre lade wyrðe.
687And ungetrywan men ceose man anfealdne að on þrim
688hundredum, & þryfealdne að, swa wide swa hit to
689ðære byrig hyre; oððon ga to þam ordale.
690And ofga man anfealde lade mid anfealdan foraðe & þryfealde
691lade mid þryfealdan foraðe.
692And gyf þegen hæbbe getrywne man to foraðe for hine,
693þæt swa sig; gyf he næbbe, ofga sylf his spæce.

page 326

694& ne beo æfre ænig forað forgyfen.
695& ne beo ænig man æniges teames wyrðe, butan he getrywe
696witnesse hæbbe, hwanan him come þæt him man æt befehþ.
697& gecyðe seo gewitnes þæt on Godes helde & on hlafordes,
698þæt heo him on soðre gewitnesse sy, swa heo
699hit eagum oferseah & earum oferhyrde, þæt he hit mid
700rihte begeate.
701
702B14.32

page 380

    
703Norðhymbra preosta lagu.
704Gyf hwa ænigum preoste ænig woh beode, beon ealle geferan
705mid biscopes filste georne ymbe þa bote
706& beon to ælcan rihte, swa swa hit awriten is, quasi cor
707unum et anima una .
708And Godes forboda we forbeodað, þæt ænig preost oðre
709cirican naðer ne gebicgæ ne geþicgæ , buton
710hine hwa mid heafodgilte forwyrce, þæt he weofodþenunge
711þanon forð wyrðe ne sy.
712& gif hit ænig preost elles gedo, þolige his wurðscipes &
713geferena freondscipes & he nahwar ne mæssige,
714ær hig hæbbe se þe hi mid rihte age.
715& gilde se þe woh dide XX or þam biscope, XII or þam
716preoste, þe he of his circan asette, XII or eallum
717geferan, & þolige þæs feos eac, gif he on unriht
718ænig for oðres preostes circan sealde.
719& ælc preost finde him XII festermen, þæt he preostlage
720wille healdan mid rihte.
721And gif hwilc preost agilte & he ofer biscopes gebod
722mæssige, gilde for ðam gebode XX or, & þar to
723eacan þone gilt gebete, ðe hit ær geworhte.
724Gif preost biscopes agen geban forbuge, gilde XX or.
725Gif preost dom to læwedum sceote, þe he to gehadedum
726scolde, gilde XX or.
727Gif preost arcediacones geban forbuge, gilde XII or.
728Gif preost scildig sy & he ofer arcediacones gebod mæssige,
729gilde XII or.
730Gif preost fulluhtes oððe scriftes forwyrne, gebete þæt
731mid XII or & huru wið God þingige georne.
732Gif preost to rihtes timan crisman ne fecce, gilde XII or.
733æghwilc cild sy, we lærað, gefullod binnon nigon nihton,
734be wite VI or.

page 381

735& gif hæþen cild binnon IX nihton þurh gimeliste forfaren
736sy, betan for Gode buton worldwite; & gif
737hit ofer nigan niht gewurðe, betan for Gode, & gilde XII or
738for ðare heorde, þe he wæs hæþen swa lange.
739Gif preost folce miswissige æt freolse oððe fæstene, bete
740wið God & gilde XII or.
741Gif preost on unriht ut of scire had begite, gilde XII or, &
742diacon VI or; & þolian his hades, buton
743scirebiscop heom hades geunne.
744Gif preost on unhalgodon huse mæssige, gilde XII or.
745Gif preost buton gehalgedon weofode mæssige, gilde XII or.
746Gif preost on treowenan calice husl gehalgige, XII or.
747Gif preost buton wine mæssige, gilde XII or.
748Gif preost husl forgime, gilde XII or.
749Gif preost anes dæges mæssige oftor þonne ðriwa, gilde
750XII or.
751Gif man ciricgrið abrece, bete be circan mæðe & be þam
752þe hire mund sy.
753Gif man mid cirican mangie, bete be lahslite.
754Gif man cirican nydþeowige, gebete þæt be lahslihte.
755Gif man preost of circan on unriht utige, bete þæt be
756lahslite.
757Gif man preost gewundige, gebete man þa wyndlan &
758biscope to weofodbote for his hade sille XII or;
759æt diacone VI or to weofodbote.
760Gif man preost ofslea, forgilde man hine be fullan were &
761biscope feower & XX or to weofodbote; æt
762diacone XII or to weofodbote.
763Gif preost circan miswurðige, þe eal his wurðscipe of
764sceal arisan, gebete þæt.
765Gif preost on circan ungedafenlice þingc gelogige, gebete
766þæt.
767Gif preost ciricþingc utige, gebete þæt.
768Gif preost silfwilles þa circan forlæte, ðe he to gehadod
769wæs, gebete þæt.

page 382

770Gif preost oðerne forseo oððe gebismrige mid worde oððe
771mid weorce, gebete þæt.
772Gif preost wið oðerne gefeohte, bete him & biscope.
773Gif preost oðrum on unriht on fultume beo, gebete þæt.
774Gif preost oðrum rihtes fultumes forwyrne, gebete þæt.
775Gif preost oðerne unwarnode læte þæs, þe he wite, þæt
776him hearmian wille, gebete þæt.
777Gif preost sceare misgime beardes oððe feaxes, gebete
778þæt.
779Gif preost cwenan forlæte & oðre nime, anathema sit .
780Gif preost on gesetne timan tida ne ringe oððe tida ne
781singe, gebete þæt.
782Gif preost mid wæpnum innan circan cume, gebete þæt.
783Gif preost misendebirde ciriclice gearþenunga, dæges oððe
784nihtes, gebete þæt.
785Gif preost ordol misfadige, gebete þæt.
786Gif preost searwað bewinde, gebete þæt.
787Gif preost oferdruncen lufige oððe gliman oððe ealascop
788wurðe, gebete þæt.
789Gif preost forhele, hwæt on his scriftscire betweox mannum
790to unrihte rixige, gebete þæt.
791Gif preost geargerihta unmynegode læte, gebete þæt.
792Gif preost sinoð forbuge, gebete þæt.
793Gif preost to rihte gebugan nelle, ac ongean biscopes
794gerædnesse wiðerige, gebete þæt oððe beo he
795asyndred of gehadodra gemanan & þolige ægðer ge geferscipes
796ge æghwilces wurðscipes, buton he gebuge
797& ðe deoppor gebete.
798Gif hwa Godes lage oððe folclage wirde, gebete hit georne.
799Ealle we sculon ænne God wurðian & lufian & ænne
800Cristendom georne healdan & ælcne hæþendom mid ealle
801awurpan.

page 383

802Gif þonne æni man agiten wurðe, þæt ænigne hæðenscipe
803heonan forð dreoge oððe on blot oððe on firhte
804oððe on ænig wiccecræft lufige oððe idola wurðinge,
805gif he sy cynges þegn, gilde X healfmarc, healf
806Criste, healf þam cynge.
807Gif hit sy elles landagende man, gilde VI healfmarc, healf
808Criste & healf landrican.
809Gif hit si færbena, gilde XII or.
810Gif cyninges þegn ætsace, þonne nemne man him XII, and
811nime his maga XII & XII wallerwente; & gif
812his berste, þonne gilde he lahsliht: X healfmarc.
813Gif landagende man ætsace, þonne nemne man him his gelican
814ealswa micel wente swa cyninges þegne;
815gif him þæt berste, gilde lahsliht: VI healfmarc.
816Gif cyrlisc man ætsæce, þonne nemne man him his gelicena
817ealswa micel wente swa ðam oðrum; gif him
818þæt berste, þonne gilde he lahsliht: XII or.
819Gif friðgeard sy on hwæs lande abuton stan oððe treow
820oððe wille oððe swilces ænigge fleard, þonne
821gilde se ðe hit worhte lahsliht, healf Criste healf
822landrican.
823& gif se landrica nelle to steore filstan, þonne habbe Crist
824& cyningc þa bote.
825Sunnandæges cypingc we forbeodað æghwar & ælc folcgemot &
826ælc weorc & ælce lade ægðer ge on wæne ge
827on horse ge on byrdene.
828Se þe ænig þissa do, gilde wite: friman XII or, ðeowman
829ða hyde; buton wegferende, þa moton for neode
830meteneade ferian; & for unfriðe man mot freolsæfenan
831nide fulfaran betweonan Eferwic & six mila
832gemete.

page 384

833Se þe freols oððe riht fæsten brece, gilde wite XII or.
834& we willað, þæt ælc Rompæni beo gelæst be Petres
835mæssan to ðam bisceopstole.
836& we willað, þæt man namige on ælcon wæpengetace II
837triwe þegnas & ænne mæssepreost, þæt hi hit gegaderian
838& eft agifan, swa hi durran to swerian.
839Gif cyninges þegn oððe ænig landrica hit forhæbbe, gilde
840X healfmarc, healf Criste healf cynge.
841Gif hwilc tunesman ænigne pænig forhele oððe forhæbbe,
842gilde se landrica þone pænig & nime ænne oxan
843æt ðam men; & gif landrica þæt forgime, þonne fo Crist
844& cyningc to fulre bote: XII or.
845Gif hwa teoðinge forhealde & he sy cyninges þegn, gilde X
846healfmarc, landagende VI healfmarc, ceorl XII or.
847And we forbeodað on Godes forbode, þæt nan man na ma wifa
848næbbe buton I; & seo beo mid rihte beweddod & forgifen.
849& þæt nan man ne wifige on neahsibban men þonne wiðutan
850þam IIII cneowe; ne nan man on his godsibbe ne wifige.
851& gif hit hwa gedo, nabbe he Godes mildse, buton he geswice &
852bete, swa biscop getæce.
853Gif he þonne on ðam unrihte geendige, þolige he clænes
854legeres & Godes mildse.
855Gif hwa wið nunnan forlicge, sy ægðer his weres scildig,
856ge he ge heo.
857& gif hi on ðam geendigan buton geswicennesse, þolian
858clænes legeres & Godes mildse.
859Gif hwa his rihtæwe lifigende forlæte & on oðran wife on
860unriht gewifige, næbbe he Godes myldse, buton he hit gebete.
861Ac healde gehwa mid rihte his æwe þa hwile þe heo libbe;
862buton þæt gewurðe, þæt hi buta geceosan be
863biscopes geþeahte, þæt hi getwæman & þanon forð willan
864clænnesse healdan.
865Gif ænig man heonan forð rihte laga wyrde, gebete hit
866georne.
867Ealle we sculon ænne God lufian & wurðian & ænne
868Cristendom georne healdan & ælcne hæðendom mid ealle
869awurpan.

page 385

870& we willað, þæt landceap & lahceap & witword & getrywe
871gewitnes & riht dom & fulloc & frumtalu fæste
872stande & dryncelean & hlafordes rihtgifu, & huru an
873Cristendom & an cynedom æfre on ðeode.