1B1.2.9

page 67

2

VIII

3

DOMINICA SECUNDA IN QUADRAGESIMA.

4    EGressus inde IESUS. Secessit in partes tyri et sidonis; ET
5RELIQUA. Drihten hælend ðreade mid wordum þæra Iudeiscra
6ðwyrnysse. and geleafleaste. and hi mid hospe his lare
7forsawon;
8Þa ferde he ðanon to ðære burhscire þe is gehaten Tyrus.
9and to ðære oðre þe is gehaten sidon;
10And efne ða ferde an Chananeisc wif of ðam gemærum togeanes
11ðam hælende. and him to clypode þus cweðende;
12Dauides bearn. gemiltsa me. min dohtor is yfele fram deofle
13gedreht. and awedd;
14He suwade. and hire nan word ne geandwyrde;
15Þa genealehton his leorningcnihtas him to. and hine bædon.
16La leof forlæt hi. for ðan ðe heo clypað æfter us;
17Þa andwyrde se hælend. and cwæð; Ne eom ic asend buton
18to ðam sceapum. Israhela hiwrædenne. ðe losedon;
19Mid þam ða com þæt wif. and hi astrehte æt his fotum.
20þus cweðende;
21Drihten leof. help min;
22He andwyrde;
23Nis na god þæt man nyme his bearna hlaf. and awurpe hundum;
24Þæt wif andwyrde. Gea leof drihten. swa ðeah ða hwelpas
25etað of ðam crumum þe feallað of heora hlafordes mysan;
26Þa andwyrde se hælend þam wife and cwæð;
27Eala ðu wif. micel is ðin geleafa;
28Getimige ða swa swa ðu wilt. and ðærrihte of ðære tide
29wearð hire dohtor gehæled and gewittig;
30Þis chananeisce wif wæs of hæðenum folce. and hæfde
31getacnunge godes gelaðunge. þe fram hæðenscipe
32to criste mid soðum geleafan gebeah. þa ða þa Iudeiscan
33hine forleton;

page 68

34Þæt wif wæs afaren fram gemærum hire eðeles. for ðan þe
35heo forlet ða ealdan gedwyld hire hæðenscipes. and mid
36geleaffullum mode þone soðan hælend gesohte. to
37biddenne hire wodan dehter gesundfulnysse;
38Heo clypode;
39Dauides bearn. gemiltsa me. min dohtor is yfele fram deofle
40gedreht;
41Hit wæs soðlice swa gedon. ac seo dohtor þe on wodum dreame
42læg dweligende. getacnode þæra hæðenra manna sawle.
43ðe wæron yfele þurh deofol gedrehte. ða ða hi ne cuðon
44heora scyppend. ac gelyfdon on deofolgyldum;
45Seo moder cwæð dauides bearn gemiltsa min. and godes
46gelaðung seo ðe is ure moder gelyfð. þæt crist is dauides
47bearn on þære menniscnysse. and heo bitt us miltsunge æt
48him. for ðan ðe he is god ælmihtig ure alysend;
49æfter ðeawlicum andgite se ðe leahtras begæð deofle to
50gecwemednysse his scyppende on teonan. his dohtor is untwylice
51awedd. for ðan ðe his sawul is ðearle ðurh deofol gedreht.
52ac him is neod þæt he his agene wodnysse tocnawe. and mid
53geleafan æt godes halgum þingunge bidde. and mid micelre
54anrædnysse drihtnes fet gesece. biddende þæt he his sawle
55fram ðam wodan dreame ahredde. swa swa he dyde þæt
56chananeisce mæden;
57He ne andwyrde ðam wife æt fruman na for modignysse. ac he
58nolde his cwyde awendan ðurh ðone þe he
59bead his leorningcnihtum ær his ðrowunge þus cweðende;
60Ne fare ge on hæðenra manna wege. and on Samaritaniscra
61burgum ne becume ge. he nolde syllan intingan þam Iudeiscum
62þæt he hi forsawe. ðe godes .æ. heoldon. and þæt
63hæðene folc him to getuge þe deofolgild beeodon;
64Nu suwade crist æt fruman wið þæs wifes clypunge. for ðan
65ðe he ða liflican bodunge on his andwerdnysse hæðenum
66leodum bedigelode;
67Witodlice æfter his æriste of deaðe he bebead his apostolum
68þus cweðende;
69Farað. and lærað. ealle ðeoda. and fulliað hi on naman
70þæs ælmihtigan fæder. and his suna. and þæs
71halgan gastes. and lærað hi þæt hi healdon ealle ða ðing
72þe ic eow bebead;

page 69

73Cristes leorningcnihtas to him genealæhton. and ðam wife to
74him geðingodon. þus cweðende;
75La leof. forlæt hi. for ðan ðe heo clypað æfter us;
76Swilce hi cwædon forlæt ðone gylt. and forgif hire þine
77miltsunge. for ðan ðe heo urne fultum mid inweardre heortan
78sehð;
79Ne clypode heo synderlice to Petre. ne heo ne namode Andream.
80ne heora nænne synderlice. ac eal þæt
81apostolice werod samod mid micelre anrædnysse bæd. þæt hi
82to ðam mildheortan hælende hire geðingodon;
83Drihten andwyrde his apostolum mid þisum wordum. and cwæð;
84Ne eom ic asend buton to ðam sceapum israhela hiwrædene. þe
85losedon;
86Soðlice se ælmihtiga fæder asende his ancennedan sunu. mid
87soðre menniscnysse befangenne to ðam Iudeiscum folce. þæt
88hi sceoldon ærest gif hi woldon to fulluhte bugan. ðurh
89cristes lare;
90Him gedafenode þæt hi ærest on crist gelyfdon. for ðan ðe
91hi heoldon þa ealdan .æ. and hæfdon cyððe to gode fram
92ealdum dagum. ða bodade crist þurh hine sylfne ðam anum
93folce. and of ðam his apostolas geceas. and fela oðre
94gecorene halgan;
95Ac ða ða he geseah þæt se mæsta dæl ðære ðeode his
96lare forsawon. and sume eac ymbe his lif syrwdon. ða forlet
97he hi on heora geleafleaste. and geceas ða hæðenan leoda
98þe geond ealne middaneard on deofolgyldum gelyfdon oð þæt;
99Þæt wif com. and hi astrehte ætforan drihtne. þus
100cweðende;
101Drihten leof help min;
102Þreo halige mægnu we gehyrað be ðisum wife on ðissere
103rædinge. þæt is geleafa. and geðyld. and eadmodnyss;
104Geleafan heo hæfde for ðan ðe heo gelyfde þæt drihten
105mihte hire aweddan dohtor gehælan;
106Geðyld heo hæfde. ða ða heo forsewen wæs. and swa ðeah
107anrædlice on hire benum þurhwunade;
108Eadmod heo wæs. ða ða heo hi sylfe to hwelpum geemnette;
109Drihten cwæð to ðam wife. Nis na god þæt man nime his

page 70

110bearna hlaf. and wurpe hundum;
111Þæt israhela folc wæs gyo geteald to godes bearnum. and
112hæðen folc geond ealle woruld to hundum. for heora fulum
113ðeawum;
114Nu is seo endebyrdnys þæra namena awend. mid ðam geleafan;
115Hi sind gehatene hundas. and we scep;
116Witodlice se witega cwæð be cristes ehterum. ðe hine
117acwealdon;
118Fela hundas me ymbe eodon;
119Se witega þurh godes gast het ða Iudeiscan cristes slagan
120hundas. þe hine mid facenfullum mode ymbe eodon;
121Eft crist sylf cwæð be us. Ic hæbbe oðre scep. þa ðe ne
122sind of ðyssere eowde. and ða ic sceal lædan. and hi
123gehyrað mine stemne;
124Þæt wif cwæð to criste;
125Gea leof drihten;
126Swa ðeah ða hwelpas etað of ðam crumon. þe feallað of
127heora hlafordes mysan;
128Swiðe getacnigendlice spræc þis wif;
129Witodlice seo myse is seo boclice lar. seo ðe us ðenað
130lifes hlaf;
131Be ðære mysan cwæð se witega;
132Drihten þu gegearcodest mysan on minre gesihðe. togeanes
133ðam þe me gedræfdon;
134Soðlice æfter gastlicum andgite. þa hwelpas etað ða
135cruman þe of heora hlafordes beode feallað. þonne ða
136ðeoda þe on hæðenscipe ær lagon. nu sind mid geleafan
137to heora scyppende gebigede. and þære gastlican lare
138haligra gewrita brucað;
139We hedað þæra crumena ðæs hlafes. and ða Iudeiscan
140gnagað þa rinde. for ðan ðe we understandað þæt
141gastlice andgit þæra boca. and hi rædað þa stæflican
142gereccednysse buton andgite;
143Ealle heora bec ðe se heretoga moyses. oððe witegan be
144godes dihte gesetton. ealle hi sprecað ymbe
145cristes menniscnysse. and ymbe cristenra manna lif mid digelum
146andgite. and ða Iudeiscan ne hedað na mare. buton ðære
147stæflican gereccednysse;
148We cristene men soðlice licgað under godes mysan. and
149etað þa cruman his gastlican lare. for ðan
150ðe we sind eadmodlice mid lichaman and mid sawle godcundlicum
151spræcum underðeodde. to gefyllenne his beboda. þæt he us
152his behat gelæste;
153Drihten andwyrde. þam chananeiscum wife. and cwæð;
154Eala ðu wif. micel is ðin geleafa. Getimige ðe swa swa ðu
155wylt;
156And hire dohtor wearð þa gehæled of ðære tide;
157For ðam

page 71

158micclum geleafan þære meder. forlet se deofol ða dohtor;
159Mid ðam is geseald bysen urum fulluhte. þæt ða
160unsprecendan cild beoð gehealdene on ðam fulluhte ðurh
161geleafan þæs fæder. and ðære moder. and þæs
162foresprecendan godfæder. ðeah ðe þæt cild nyten sy;
163Cristenra manna geleafan hæfð se ælmihtiga god mid manegum
164tacnum gewurðod. þurh his halgan. ærest on heora life.
165and siððan æt heora halgum byrgenum. þam sy
166wuldor and wurðmynt. A. on ecnysse. Amen